Lơ̆m pơgơ̆r “Khei hơlen hơnih truh tơmang pơhiơ̆ dêh char Lâm Đồng sơnăm 2025”, Hơnih mong răk mŭk drăm dêh char Lâm Đồng tơƀôh tơbăt ăn tơmoi păng kon pơlei dôm tơdrong oei sa joăt joe ‘lơ̆ng rŏ kơ kon pơlei M’nông păng Mă. Tŏk bŏk lơ̆m cham char phơi rơngơp kơ Hơnih mong răk mŭk drăm tơ̆ Đà Lạt, tơmoi đei hloi năm lăng tơdrong jang dui brai vai tanh khăn păng chă mơ̆ng tôn chĭng chêng. Mă đơ̆ng hơbĕn ao mei đang kĕt keng, bơngai Mnông păng Mạ oei vei kơjăp tơdrong jang joăt joe đơ̆ng sơ̆ dunh brai vai tanh khăn nhen lĕ pơhngol kơ tơdrong hơrih sa joăt joe kơ hơdrĕch hơdrung. Ching chêng ưh khan lăp djơ djrĭng lơ̆m jơ ‘năr kơ̆m kang kơnang giĕng mă lei dang ei oei chă pơvih ăn tơmoi tơmang pơhiơ̆, adoi pơjing đei jang sa iŏk yoa kơjăp, adoi tơgop lơ̆m vei răk tơƀăk mong, tơƀôh tơbăt tơdrong oei sa joăt joe ‘lơ̆ng rŏ đơ̆ng sơ̆ kơ hơdrech hơdrung. Hrei ou, dêh char Lâm Đồng đei hloh 127.000 ‘nu bơngai Mnông păng hloh 50.000 ‘nu bơngai Mạ, oei vei kơ jăp lơ tơdrong jang joăt joe, tơdrong joăt, tơdrong kơ̆m kang kơnang giĕng ‘lơ̆ng rŏ sơ̆ ki.