Hơnih hơdah lơ̆m tơdrong pơdah Joh ayŏ chĭng chêng hăm hơnăn ““Jơva năr unh om” pơdah dơ̆ng khôi juăt sơng ŏng lơ̆m tơdrong pơkong juăt jue kơ bơngai  Ê Đê. Lơ̆m cham să hơla 'long kră yơp, đe ngê̆ nhơ̆n đơ̆ng pơlei Tơng Jŭ, phương Ea Kao hlôi pơdah dơ̆ng tôm khôi sơng ŏng (Iêô wĭt sang mniê) kơ bơngai Ê Đê. Tơ̆ trong sơng, ƀok ŏng găn ga lơ tơdrong nol kiơ̆ khôi juăt. Sư dar deh pơjao kong păng tơmam pôk ăn 'nhŏng oh, bôl buăl 2 pah hơdrol kơ sơng mơ̆t lơ̆m hnam hơkăn vă pơkong. Hăm bơngai Ê Đê, kong jĭ tơmam pơtih ăn đon bơnôh tơguăt kơjăp, oei dôm tơdrong nol kiơ̆ trong sơng ŏng 'noh pơtruh tơdrong hơpơi 'meh kơ bre klo hơkăn gô atŭm băl găn hloh tơnap tap vă pơjing tơdrong hơrih 'lơ̆ng jơnap.

Ngê̆ nhơ̆n Y Djing Adrơng, pơlei Tơng Jŭ ăn tơbăt, tơdrong 'nhăk khôi juăt 'măn ăn tơmoi tơmang lăng, vă tơgop vei răk joh ayŏ, vă pơih đei lơ trong jang pơyua đơ̆ng tơmang pơhiơ̆ pơlei pơla: “Inh chơt hơ-iă đei akŏm pơdah dơ̆ng khôi juăt sơng ŏng, 'nou jĭ tơdrong 'lơ̆ng kơ joh ayŏ bơngai Ê Đê. Pơlei Tơng Jú dang ei jang tơmang pơhiơ̆ pơlei pơla, ou jĭ trong jang 'lơ̆ng vă pơjing tơdrong jang xa ăn kon pơlei, atŭm hăm noh vei răk tơƀăk mong joh ayŏ kon pơlei nhen tanh brai vai khăn, tôn chĭng chêng dah mă pơdah dơ̆ng khôi juăt so nhen 'năr ou. Inh 'meh vă tơdrong 'lơ̆ng kơ joh ayŏ Ê Đê đei pơlan să vă lơ bơngai lơ̆m kơpal teh băt truh păng răk vei ling lang”

Đơ̆ng rŏng kơ pơdah dơ̆ng khôi juăt so, bơngai lăng pơtoi đei lăng pơdah tôn chĭng chêng, tôn chĭng kram, chĭng tơmo, hơri dôm ƀai hơri hiôk kơ Tây Nguyên păng chă et lăng tơdrô ge. Dôm tơdrong akŏm hlôi răk 'măn lơ tơdrong 'lơ̆ng hăm tơmoi lơ̆m păng 'nguaih kơ teh đak. Ƀok Steve, truh đơ̆ng Scotland ăn tơbăt, dôm tơdra chĭng chêng păng trong mă kon pơlei tơ̆ tơring vei răk tơƀăk mong joh ayŏ pơm ăn kơ ƀok lăp kơ đon:  “Ou jĭ 'măng blŭng inh đei lăng tơdrong pơdah păng inh lăp kơ đon. Inh tôch lăp hăm tơdra hơri brông kơ bơngai Ê Đê. Kiơ̆ kơ inh, dôm kơjă joh ayŏ kăp gĭt thoi noh kăl đei pơlan lơ hloh lơ̆m tơdrong tơroi tơbăt vă lơ bơngai băt truh. Khei năr kơnh inh gô chôt vih tơmang tơ̆ tơring teh ou”

Kiơ̆ tơlĕch jang, tơdrong pơdah Joh ayŏ chĭng chêng gô pơtoi pơgơ̆r kiơ̆ pơkăp tơ̆ Hơnih Pơdah Tơmam so Đăk Lăk. Rim khei dêh char pơdah minh khôi juăt so kơ kon pơlei kon kông tơ̆ tơring, tơgop vei răk tơƀăk mong joh ayŏ păng pơjing đei lơ tơmam drăm tơmang pơhiơ̆ joh ayŏ 'măn tơmoi truh tơmang lăng.