Lơ̆m tơring bri kông jơk ƀlik Nâm Nung, jơva đak ro đơ̆ng chơkơi Leng Ôm Rveh re ang nhen nơ̆r hơvơn tơmoi truh tơmang lăng tơring teh akŏm ƀenh kơ joh ayŏ bơngai M’nông. 'Nhŏng Y Krêu, Kơdră khul chă hơlen lăng cham char kơ Khul tơmang pơhiơ̆ pơlei pơla Yôk Nâm Nung, xah Nâm Nung, dêh char Lâm Đồng tơroi:  “Kiơ̆ nơ̆r đe kră chă tơroi, sơ̆ ki tơ̆ tơring ou đei minh pôm rôih huăng tơ̆ chơkơi đak păng lôch tơ̆ ou. Đunh kơ 'noh hơkou rôih ôm ƀou noh kon pơlei pơtơm băt tơdrong. Kon pơlei tơ̆ tơring iŏk tơdrong 'noh vă krao hơnăn ăn chơkơi đak noh “Ôm Rveh”. Ah mă tơroi hăm tơmoi truh tơmang, nhôn hơnơ̆ng tơblang tơdrong pơhle akhan “Chơkơi Rôih Ôm” vă tơmoi ƀônh kơ băt. Pơyan ou chă tơmang lăng hiôk dêh, yuh 'năr rơngơp, đak hlăng 'lơ̆ng, bri 'noh oei kơdrơ̆ng noh lơ tơmoi đe lăp dêh”.

Tơdrong tơroi đei pơdjoi đơ̆ng chăl bơngai ou truh chăl bơngai nai ưh hơdrô̆ pơm ăn tơdrong tơmang hiôk chơt, mă oei jing trong vă bơngai M’nông vei răk tơdrong 'lơ̆ng kơ pơlei pơla. Đơ̆ng dôm tơdrong kăp gĭt joh ayŏ 'noh, ah sơnăm 2022, kon pơlei tơ̆ pơlei Ja Răh, Yôk Ju păng R’Cập hlôi atŭm băl pơjing Khul jang tơmang pơhiơ̆ pơlei pơla Yôk Nâm Nung hăm tơdrong hơpơi 'meh 'nhăk tơdrong joh ayŏ kon kông truh tơjê̆ hloh hăm tơmoi. Dang ei khul đei hloh 40 'nu jang, asong jing dôm khul joh ayŏ kră sơ̆, homestay, hơlen lăng cham char plenh teh păng 'nhot xa. Rim bơngai iŏk minh sơnong jang, atŭm pơjing đei dôm tơmam drăm tơmang pơhiơ̆ akŏm ƀenh kơ tơdrong hơrih kơ bơngai M’nông.

Truh hăm Yôk Nâm Nung, tơmoi ưh hơdrô̆ đei hơlen lăng dôm tơring bri so kơdrơ̆ng, dôm chơkơi đak ro jăng mă oei đei hơlen băt gah tơdrong hơrih sơnêp sơnoi kơ pơlei pơla, păng hơlen băt gah tơdrong juăt jue kăch mạng tơ̆ Hơnih gru grua kơ teh đak Tơring kăng kư̆ B4 - Liên tĭnh IV Nâm Nung. Mă kăl, lơ̆m pơyan et xa nhen Tăm Blang M’Prang dah mă et soi kơ đak 'mi, tơmoi đei akŏm dơh po lơ̆m joh ayŏ M’nông kiơ̆ đơ̆ng jơva chĭng chêng, tơdrong hơri brông, tanh brai vai khăn, tanh brong jak... Atŭm hăm noh, tơmoi đei xa dôm tơmam xa juăt jue nhen 'nhot pro tăng, 'nhot hơte, 'nhot prung pai đơ̆ng hla ƀep păng tơ-'mơ̆ng hre, iĕr pơhang, por prung, hla ƀlang, et tơdrô ge... Yă H'Thương, Phŏ Kơdră Hơnih jang Joh ayŏ - tơpôl kơ Jơnŭm vei lăng kon pơlei xah Nâm Nung, Kơdră Jơnŭm vei lăng Khul jang tơmang pơhiơ̆ pơlei pơla Yôk Nâm Nung ăn tơbăt:  “Khŭl jang tơmang pơhiơ̆ pơlei pơla kơ nhôn yơ̆ng ou ki sơng lơ tơmoi truh tơmang đơ̆ng teh đak Italia, pơlei tơm Hồ Chí Minh, Hà Nội. Mă kăl, lơ̆m khei lêh akŏm, tơmoi truh tơmang lăng tôch lơ. Lơ tơmoi đơ̆ng teh đak đe 'meh oei xa atŭm hăm kon pơlei vă chă hơlen băt gah khôi juăt păng tơdrong hơrih kơ kon pơlei. Nhôn jang tơmang pơhiơ̆ pơlei pơla tơguăt hăm Buôn Choáh, xah Nam Đà hloi. Tơ̆ noh đei lơ cham char 'lơ̆ng, oei nhôn đei khŭl joh ayŏ juăt chă hơri brông, tôn chĭng chêng ăn tơmoi lăng. 'Nguaih kơ sơng tơmoi tơ̆ tơring, nhôn oei đei dôm hơnih jang tơmang pơhiơ̆ nhen Dray Sap hơvơn truh pơdah ăn lơ khŭl tơmoi truh tơmang lăng”.

Yă Trần Kim Tuyền, Phŏ Kơdră Hơnih jang Joh ayŏ - tơpôl xah Nâm Nung ăn tơbăt, tơring tŏk bŏk oei hơdrin iŏk yua mŭk drăm cham char, tơdrong juăt jue kăch mạng păng tơdrong joh ayŏ kăp gĭt vă hơtŏk jang tơmang pơhiơ̆ pơlei pơla. Hơdah nhen, Đảng uy, jơnŭm pơgơ̆r tơring tŏk bŏk oei pơtoi sơkơ̆t hơdah hơtŏk tơmang pơhiơ̆ tơguăt hăm rim hơnih tơmang lăng păng tơring oei xa kơ kon pơlei vă pơjing đei lơ tơmam drăm hơlen băt kăp gĭt hloh.  “Dang ei Khŭl jang tơmang pơhiơ̆ pơlei pơla Yôk Nâm Nung đei 42 'nu vang jang. Xah sơkơ̆t hơdah: hơtŏk jang tơmang pơhiơ̆ pơlei pơla tơguăt hăm Tơring kăng kư̆ B4 - Liên tĭnh IV Nâm Nung jĭ hơnih gru grua kơ teh đak. Lơ đe sơnăm mơlôh tơ̆ tơring adoi vang tơgŭm chă 'nhăk tơmoi trekking lơ̆m bri, tơmang lăng cham char, chơkơi đak păng chă hơlen băt lơ̆m tơring. 'Nguaih kơ Khŭl jang tơmang pơhiơ̆ pơlei pơla Yôk Nâm Nung, xah adoi sơkơ̆t hơdah hơtŏk jang tơmang pơhiơ̆ pơlei pơla tơ̆ thôn Quảng Hà kơ kon pơlei Dao păng akŏm kơchơ tơmam drăm xa vă tơguăt hăm tơdrong jang tơmang pơhiơ̆ pơlei pơla kơ pơlei Ja Răh.”

Lơ̆m tơdrong hơrih 'nao hrei ou, bơngai M’nông tơ̆ Yôk Nâm Nung, xah Nâm Nung, dêh char Lâm Đồng adoi oei vei kơjăp nơ̆r chĭng chêng, vei răk tơdrong hơri brông, tơdrong jang juăt jue păng tơdrong hơrih kơ pơlei pơla. Tơmang pơhiơ̆ pơlei pơla ưh hơdrô̆ pơih trong hơtŏk mŭk drăm mă oei jing gơng vă dôm tơdrong kăp gĭt kơ joh ayŏ bơngai M’nông gơh đei răk vei păng pơlan să.