Tŏk bŏk tơdrong hơrih sa chơt hơiă kơ pơlei tơm Hồ Chí Minh, dôm kơmăng hơtuch giĕng tơjê̆ âu, lơ tơmoi apŭng plĕnh teh păng kon pơlei pơlei tơm ‘noh tơchă truh 1 tơdrong chă lăng pha ra. Ưh kơsĭ anih kơdrơ̆m tĕch mơdro dăh mă kơphô̆ năm jơ̆ng hoh, đe sư rơih tơoei ngôi lơ̆m 1 hơnih joh ayŏ kơdŏ soang vă mơ̆ng, lăng dôm tơmam tôn reh hiôk hơiă hơdrĕch hơdrŭng Việt Nam, đei tơroi hăm nơ̆r pơma dang ei.

Tơ̆ âu, nơ̆r đàn tranh, đàn bầu, đàn nhị, chĭng klơk, chĭng tơmo dăh mă dôm tơdra chĭng chêng Tây Nguyên re jơva tŏk bŏk kơmăy re 3D ‘nao, hơ nhăk tơmoi yak mơ̆t lơ̆m tơdrong chă mơ̆ng, lăng joh ayŏ Việt Nam, đơ̆ng tơring găh Tu mơ̆t tơ̆ tơring Pơbăh. Hloh 30 tơmam tôn reh kon kông kŭm hăm 12 ƀai hle dang ei hlôi tơƀôh dơ̆ng tơdrong ‘lơ̆ng hơiă so hai ‘nao hai.

‘Noh jĭ tơdrong joh ayŏ kơdŏ soang "Chào Show," pơgơ̆r tơ̆ hơnih kơsô̆ 6 Nguyễn Siêu, phường Sài Gòn, pơlei tơm HCM. Truh tơ̆ âu, tơmoi ưh khan lăp đei mơ̆ng, lăng tơmam tôn reh, mă oei đei sa lăng dôm tơmam sa ‘lơ̆ng hơdrô̆ 3 tơring găh Tu - Tŏk bŏk - Pơbăh. Tơdrong hơdai đơ̆ng tơmam tôn reh, um rup păng tơmam sa, tơgŭm rim kơmăng tôn reh jing 1 ‘măng năm lăng joh ayŏ Việt Nam hăm lơ tơdrong.

Nŏng kơ mơ ‘ngiưt gơgŭ hơkâu kiơ̆ tơdra tôn reh, ƀok Edgar, tơmoi truh đơ̆ng Canada tơroi, ƀok hlôi năm lơ hơnih tơ̆ Việt Nam mă lei ‘nâu ‘noh mă blŭng đei mơ̆ng păng lăng ƀôh lơ tơmam tôn reh mơ̆t hơdai mĭnh ‘măng. Ƀok akhan ‘noh jĭ 1 tơdrong mơ̆ng, lăng tôch kơ hơiă.

“Tơpă ‘nei inh ƀôh tôch hơiă. Inh ưh đei tơchĕng tơdrong tôn reh, hơri hơsoang âu iŏk yoa lơ tơmam tôn reh thoi noh. Tơdrong pơm ăn inh lăp đon hlŏh jĭ đei lơ tơmam tôn reh ‘măng mă blŭng inh đei lăng ƀôh păng mơ̆ng ngôi. Tơdrong mơ̆ng ngôi dôm tơmam tôn reh pha ra băl tôn reh hơdai, mơ̆t jing minh ‘nŏh hiôk hơiă tơpă. Jơ sŏng sa năr ‘nâu kŭm tôch ‘lơ̆ng, đei por, đei ƀĕnh mi păng lơ tơmam sa ‘lơ̆ng đơ̆ng Việt Nam.”

Kơplăh ‘nŏh, mŏ Zamanie truh đơ̆ng teh đak Mi tơroi, tơdrong ‘nâu hơiă hlŏh tơdrong ‘mĕh vă đơ̆ng mŏ, sư tơgŭm ăn mŏ ƀôh hơdăh tơdrong juăt, jŏh ayŏ kơ dŏ soang păng kon bơngai Việt Nam kiơ̆ đơ̆ng tơdrong tôn reh, hơri hơsoang. Tơdrong pơm ăn mŏ hơiă hlŏh jĭ jơhngơ̆m hưch hanh đơ̆ng dôm bơngai tôn reh, hơri hơsoang.

“Inh băt truh tơ̆ âu ‘nŏh gơnơm đơ̆ng chă hơlen năng lơ̆m mang, inh ƀôh đei lơ tơdrong tôch ‘lơ̆ng hơiă, kơna inh khŏm năm truh lăng tơ̆ âu. Păng tơpă ‘nei, tơdrong pơgơ̆r tơ̆ âu hơiă hlŏh tơdrong inh gô chang. Đơ̆ng rŏng kơ lăng, inh gơ̆h pơma jơhngơ̆m đon inh tôch chhhôk ‘nă. Hơiă hlŏh jĭ hăm tơdrong tôn reh, jơhngơ̆m hưch hanh đơ̆ng dôm bơngai tôn reh, hơri hơsoang ƀôh hơiă tơpă. Inh kŭm ƀôh tơdrong joh hơri nhen tơroi kơ 1 tơdrong tôch ‘lơ̆ng kơ dôm tơring păng rim tơdrong joh ayŏ kơ dŏ soang pha ra băl đơ̆ng Việt Nam kiơ̆ đơ̆ng tơdrong tôn reh, hơri hơsoang”.

Kiơ̆ ƀok Trần Minh Hoàng, Kơdră Jang xa Chào Show, đon tơchĕng pơjing tơdrong joh hơri hơsoang đei đơ̆ng đon hơpơi ‘mĕh pơjing 1 tơmam chă tơmang lăng tơ̆ kơmăng ‘nao ăn pơlei tơm Hồ Chí Minh. Tơplih ăn tơdrong hơri hơsoang hmă, ê-kíp chă rơih trong pơgơ̆r ‘lơ̆ng hơiă ƀiơ̆ vă hơnhăk tơdrong joh ayŏ kơ dŏ soang Việt Nam truh jê̆ ƀiơ̆ hăm kon pơlei, mă loi jĭ tơmoi chă tơmang lăng đơ̆ng apŭng plenh teh.

“Hơpơi ‘mĕh tih hlŏh đơ̆ng nhôn ‘nŏh jĭ roi tơbăt tơdrong joh hơri hơsoang păng dôm tơdrong juăt ‘lơ̆ng đơ̆ng Việt Nam truh hăm bôl boăl lơ̆m apŭng plenh teh kŭm nhen tơmoi lơ̆m teh đak. Đei pơgơ̆r hơnơ̆ng rim kơmăng, nhôn kŭm hơmĕng Chào Show gô jing 1 anih jŏh ayŏ kơ dŏ soang tơ̆ kơmăng ‘lơ̆ng hơiă păng hui kơđei tơ̆ pơlei tơm Hồ Chí Minh vă pơvih ăn tơmoi chă tơmang lăng. Yoa thoi noh, nhôn kŭm chih hơdăh show tôn reh hơri hơsoang nhen thoi 1 tơdrong dơ̆ng tang ăn jŏh ayŏ kơ dŏ soang đơ̆ng kră sơ̆, vang tơgop roi tơbăt tơdrong hơri hơsoang păng um ai ‘lơ̆ng hơiă kơ Việt Nam truh hăm tơpôl apŭng plenh teh”.

Đơ̆ng đei tơmât yoa đơ̆ng khei 3/2025, tơdrong joh hơri hơsoang iŏk đei lơ nơ̆r pơma lăp đon đơ̆ng bơngai lăng. Dang ei, Chào Show hlôi sơng đei hlŏh 30.000 ‘nu tơmoi, lơ̆m noh đei vă jê̆ 1 puăt ‘nŏh tơmoi đơ̆ng teh đak đe.