Lơ̆m hnam tơ̆r bơbŭng găch hlôi tơkloh đak kơ-ang kiơ̆ khei năr dăr sơnăm, ngê̆ nhơ̆n H’Brơi tŏk bŏk oei hơtơng dĭng dŭng pơlung sou hăm dôm tơdra hơri juăt jue kră sơ̆ kơ bơngai M’nông. Ah tơnăr tơ̆r noh hơtol hla bar hmach bơnê đei răk vei kiơ̆ lơ jơhnơr bơngai nhen vă bơ̆ng pang ăn tơdrong pơtoi kơ minh unh hnam jang kăch mang.

 Ngê̆ nhơ̆n H'Brơi rơneh sơnăm 1975 lơ̆m minh unh hnam mĕ ƀă gah klo păng mĕ ƀă kơtơh adoi vang jang lơ̆m khul pơvih ăn hơnih jang kơ kăch mạng B4 Nâm Nung lơ̆m khei năr tơjră ayăt Phalăng păng Mi tơgar. Đei rơneh ah khei năr pơlei pơla teh đak 'nao đei jơnei rơngei, tih vơ̆ lơ̆m jơ va chĭng chêng kơ mĕ, nơ̆r hơri brông kơ mĕ, đon lăp kơ joh ayŏ M'nông hlôi hram lơ̆m đon bơnôh yă đơ̆ng oei 'lơ̆p. Ngê̆ nhơ̆n H’Brơi tơroi: "Inh băt păng rơbot dôm tơdrong hơri ou đơ̆ng oei 'lơ̆p. Hơdrol ki, rim 'măng pơlei pơla pơgơ̆r tơdrong et xa, inh hơnơ̆ng kiơ̆ mĕ inh năm hơri bua. Tơ̆ hnam noh mơ̆ng mĕ inh hơri pơlung kon, pơlung sou, 'noh kiơ̆ khei năr hăp hlôh klĕch lơ̆m hơkou inh layơ ưh kơ băt. Pơhrăm hơri brông 'noh ưh đei tơnap kiơ ôh, mă kăl noh ba athei pơ-'nam chă tơmơ̆ng, tơƀlŏk păng pơhrăm hơri kiơ̆..."

Hăm bơngai M’nông, tơdrong hơri brông ưh hơdrô̆ jĭ nơ̆r hơri mă oei răk vei gru grua kơ jơhnơr hơrih, khôi juăt păng tơdrong hơrih kơ pơlei pơla. Đơ̆ng dôm ƀai hơri pơlung, hơri tơtơl truh tơdrong hơri hơ-'mon (Ot Ndrong), tôm noh akŏm pơtruh nơ̆r pơtho akhan đơ̆ng yă ƀok gah đon băt 'mêm kơ-eng, tơdrong tơguăt tơguăl dih băl.

Tih vơ̆ djơ̆ 'lơ̆ng lơ̆m tơdrong hơri kơ mĕ, pơmai H'Như, kon drăkăn yă H'Brơi đơ̆ng hrôih tơguăt hăm dôm tơdrong akŏm joh ayŏ juăt jue kơ pơlei pơla. Dang ei, sư jang Kơdră khul joh ayŏ kơdŏ suang kon kông M'nông kơ xah Nâm Nung: "Đơ̆ng oei 'lơ̆p, inh kiơ̆ mĕ inh năm pơhrăm hơri, hơsuang atŭm hăm đe mih ma duch nă lơ̆m khŭl joh ayŏ kơdŏ suang kon kông tơ̆ xah. Mĕ inh 'noh kơdră khŭl, 'noh inh hơnơ̆ng đei tơmơ̆ng dôm tơdrong hơri brông, dôm tơdrong hơsuang juăt jue, păng kiơ̆ kơ sơnăm 'noh inh jing lăp hăm tơdrong hơri hơsuang kon kông M’nông inh"

Jĭ Ƀĭ thư Chi đoan hơdruh tơdăm pơlei Ja Rah, xah Nâm Nung, pơmai H'Như lăng tơdrong vei răk tơƀăk mong joh ayŏ kon kông adoi jing tơdrong jang kơ đe sơnăm mơlôh. Lơ̆m dôm tơdrong akŏm hŏk hôp đoan ah kơmăng ưh hơdrô̆ jĭ 'măng vă đe đoan viên pơma dơnuh gah tơdrong jang mă oei jing hơnih chă pơhrăm hơri hơsuang. Tôm đe đoan viên, hơdruh tơdăm păng đe hơ-ioh vang akŏm hŏk hôp Chi đoan pơlei Ja Rah đei pơhlom 30 'nu, lơ̆m noh đei minh ƀar hơdruh tơdăm đei rơih akŏm lơ̆m khŭl joh ayŏ kơdŏ suang kon kông kơ xah Nâm Nung yuơ H’Như vei lăng. Pơmai H’Như tơroi: "Gah lơ bơngai lơ̆m khŭl hơsuang 'noh tơtă đoan viên hơdruh tơdăm lơ̆m pơlei, 'noh tơdrong hơvơn chă pơtơ̆p pơhrăm ưh đei tơnap kiơ ôh. Nhôn hơnơ̆ng akŏm pơhrăm hơri hơsuang atŭm hăm akŏm hŏk hôp chi đoan, vă pơjing cham pơhiơ̆ 'lơ̆ng hơ-iă ăn đe hơdruh tơdăm, tơgop vei răk tơƀăk mong dôm tơdrong joh ayŏ juăt jue kră sơ̆"

Rim 'măng pơgơ̆r tơdrong hơri hơsuang kon kông, um ai kơ bre mĕ kon yă H'Brơi atŭm băl hơri pơdah hlôi jing juăt. Lơ̆m jơva chĭng chêng re ang tơ̆ pơlei pơla, mĕ pơre nơ̆r hơri brông 'lơ̆ng hiôk. Kon drăkăn hrau kiơ̆ hăm tơdra hơsuang rơmuơn 'lơ̆ng juăt jue.

Lơ̆m dôm sơnăm tơjê̆ ou, khul joh ayŏ kơdŏ suang kon kông xah Nâm Nung hơnơ̆ng vang akŏm pơdah joh ayŏ kơdŏ suang lơ̆m jơ̆p teh đak păng đei iŏk lơ hơpah kăp gĭt. Păng yă H'Brơi, pơmai H’Như tŏk bŏk pơtoi oei pơlan să đon lăp kơ joh ayŏ juăt jue kon kông M’nông truh hăm đe sơnăm mơlôh. Yă H'Thương Knul, Phŏ Kơdră Hơnih jang Joh ayŏ - Tơpôl kơ Hô̆i đŏng kon pơlei xah Nâm Nung ăn tơbăt: " U Nhim (Yă H'Brơi) dang ei 'noh kơdră khŭl chĭng chêng – hơri brông, oei kon drŏkăn yă 'noh pơgơ̆r khŭl hơsuang. Lơ̆m lơ sơnăm kơ ou, bre mĕ kon hăt hot hăm tơdrong jang vei răk tơƀăk mong păng pơtho pơhrăm joh ayŏ juăt jue ăn đe sơnăm mơlôh. Lơ̆m dôm sơnăm ou ki, khŭl ngê̆ nhơ̆n joh ayŏ kon kông kơyua ngê̆ nhơ̆n H'Brơi pơtơm, hlôi năm akŏm lơ tơdrong pơlong joh ayŏ kơdŏ suang kon kông lơ̆m păng 'nguaih kơ dêh char. Lơ̆m 'măng pơlong joh ayŏ kơdŏ suang kon kông đei pơgơ̆r tơ̆ Quảng Trị ah sơnăm 2024 ou ki, khŭl đei iŏk 9 tơdrong hơpah, lơ̆m noh đei 4 hơpah A atŭm hăm lơ hơpah B păng hơpah C hăm lơ tơdrong hơri hơsuang"

Đơ̆ng bơbŭng hnam iĕ ioch tơ̆ pơlei Ja Rah, ngê̆ nhơ̆n H’Brơi tŏk bŏk oei kơ-'nôh pơdjoi tơdrong juăt jue kơ unh hnam hăm dôm tơdrong jang pơyua ăn pơlei pơla. Mưh chăl yă ƀok tơgop jơhngơ̆m ăn kăch mạng 'noh chăl kon sou hrei ou tŏk bŏk tơgop ăn tơdrong jang vei răk tơƀăk mong joh ayŏ kơdŏ suang kon kông. Đơ̆ng nơ̆r yă hơri pơlung, nơ̆r mĕ hơri brông truh dôm tơdra hơsuang kơ kon drăkăn, joh ayŏ kơdŏ suang kon kông M’nông adoi oei đei pơtoi kiơ̆ rim jơhnơr kon sou, vă tơdra chĭng chêng, nơ̆r hơri ling lang re ang tơ̆ pơlei pơla hrei ou.