Mưh đei bơngai lơ̆m pơlei lôch, kră pơlei tĕnh koăng năm tơ̆ hnam đe lôch ‘noh ra sơkơ̆r tơroi tơbăt tơdrong sơ ‘ngon păng chă pơđou dih băl tơdrong jang ou to. Mưh băt đei bơngai lôch, rim răih lơ̆m pơlei ưh kơ ngê̆ chă hơvơh, bu bu jei vang năm tơgŭm djru hloi: đei bơngai chă pai gŏ, sŏ nhak, proh hơmet chĭng chêng, bơngai năm tơroi tơbăt ăn kơtum kơtŏng ‘nhŏng oh pơlei anai. Ƀok Rưm, 50 sơnăm oei tơ̆ pơlei K’tu, tơring Kông Chêng, dêh char Gia Lai, tơroi:“Tơdrong nê̆ kou lơ̆m tơring, ba ƀôh kon pơlei năm hơpoong tôch kơ lơ. Kon pơlei chă tôn chĭng chêng, hơsoang đơ̆ng năr pơdong truh groong ƀŭ, vang ơh sơ-‘ngon hơdoi hăm ŭnh hnam đei bơngai lôch ... Kơtum kơtŏng ‘nhŏng oh ‘noh tơra kon jên, kon tơrong, mĭnh ƀar ŭnh hnam vang tơra chă răt nhŭng teh ăn”.

Jei nhen rim hơdrung anai, hăm bơngai Bahnar, tơdrong brư̆ yang đang pơsat ‘noh jintg tơdrong gĭt kăl hloh, ưh khan lăp hơdrô̆ ŭnh hnam đe sư, ‘nou tơdrong pơđĭ kơ pơlei, kơna pă bĭ gô chang đe chă hơvơ̆h, jei năm kơdih kơdih, vang tơgŭm djru hloi. Ƀok Đinh Pơr, 58 sơnăm, oei lơ̆m pơlei Pŏng, tơring Chư̆ A Thai, dêh char Gia Lai, tơbăt: “Lơ̆m pơlei nhôn, tơdăh đei bơngai hiong ‘noh pơđĭ kon pơlei năm hơpong, tôn chĭng prăt gơmăng. Bu bu jei vang ngôi hơpong ưh kơ đei năm tơ̆ nai. Truh năr ƀŭ, pơm pơsat đang ‘noh rim bơngai chă jang sa kơdih kơdih.”

Lơ̆m dôm năr pơdong, tơ̆ ŭnh hnam bơngai nê̆ ou jĭ kĕt kang bơngai vih vơ̆t. Đe sư truh vă hơpong hăm ŭnh hnam. Tơ̆ gơmăng, khul tôn chĭng chêng kơ pơlei klăh asong dih băl mĭnh ƀar khul, chă tôn chĭng chêng phoăh hơdăh. Kon pơlei vang pơgou, chĕp ba khăn sơ kok năm pơgou, pơma dơnuh, mưh pă kĕ krŏng ‘noh tep tơ̆ noh hloi. Hmă hmă đe kră pơgou pơma dơnuh dih băl ƀơ̆t pôi ŭnh, chă tơroi dih băl tơdrong ou to, adoi đei hloi chă tơroi găh tơdrong bơngai nê̆ kou ou lơ̆m mă sư oei hơrih sơ̆.

Tơdrong chă teh kơpô, rơmo, nhŭng iĕr ‘noh ưh khan vă et sa hiôk chơt, mă lei vă tơbăt jơhngơ̆m đon ‘mêm tôch bach hmach tôch kơ dêh hăm bơngai nê̆ kou, pơhiơ̆ ăn kơ sư păng bơnê kơ kon pơlei, tơmoi đơ̆ng hơtăih plăih kơjung năm hơpong hăm ŭnh hnam. Ƀok Đinh Brơi, 67 sơnăm, kră pơlei kơ Plei Chưp, tơring Lơ Pang, dêh char Gia Lai sơkơ̆t hơdăh, tơdrong gĭt kăl hloh lơ̆m brư̆ yang đang pơsat kơ bơngai Bahnar ‘noh jơhngơ̆m đon tơgoăt dih băl pơlei pơla. Pơtih gia, tơdăh ŭnh hnam đei bơngai lôch hơrih sa tơnap tap ‘noh kon pơlei vang chă tơra kon jên vă răt nhŭng, iĕr, tơdrô. Đe drŏ kăn mưh năm hơpong ‘noh chĕp ba mĭnh kơlong phe. “Mưh đei tơdrong nê̆ kou ‘noh bu bu jei ‘mêm tôch bach hmach tôch kơ dêh ngăl, mă kăl hăm bơngai lơ̆m ŭnh hnam, bơngai tơgram dih băl, bơngai mĭnh pơlei. Kơna mưh đei bơngai lôch ‘noh kon pơlei chă ƀuh nhŭng, koh rơmo vă tơbăt ăn jơhngơ̆m đon ‘mêm tôch bach hmach tôch kơ dêh hăm bơngai hiong păng vă pơvih pơvăn por ‘nhot ăn kơtum kơtŏng ‘nhŏng oh, tơmoi năm hơpong”.

Hrei ou, mĭnh ƀar tơdrong pơgơ̆r lơ̆m pơdong groong bŭ kơ bơngai Bahnar hlôi pă gan nhen sơ̆ ki, hlôi hŭt ƀiơ̆ mĭnh ƀar tơdrong pă gan trŏ lăp, pơhoach brăh brư, lăp vei răk dôm tơdrong trŏ lăp hloh hăm tơdrong hơrih chăl hle, mă lei jơhngơ̆m đon tơgoăt tơgoăl dih băl, vang tơgŭm djru dih băl oei vei kơjăp.