Kiơ̆ tơdrong Tơchơ̆t đơ̆ng Khŭl kơdră teh đak, kon pơlei Trung Quốc đei hla ar hô̆ chiê̆u hmă oei đei khei ‘năr gơ̆h yoa ‘nŏh ưh kơ kăl pơm hla ar mât lĕch mưh năm kiơ̆ khŭl đơ̆ng 2 'nu tơ̆ kơpal, chă tơmang lăng ưh đei hloh 30 năr yua Anih jang găh tơmang lăng lơ̆m apŭng plĕnh teh kơ Việt Nam pơgơ̆r. Tơmoi chă tơmang lăng athei păr tơpăt đơ̆ng Trung Quốc truh tơ̆ Cham gre păr apŭng plĕnh teh Cam Ranh, atŭm hăm 'noh pơm hla ar mơ̆t păng lĕch tơ̆ 1 anih âu hloi.

Tơdrong tơgŭm âu đei pơm kiơ̆ truh đĭ ‘năr 31/12/2027, lơ̆m Sơnăm jang hơdoi găh tơmang lăng Việt Nam – Trung Quốc 2026–2027. Anih chă tơmang lăng Khánh Hòa hơpơi ‘meh tơdrong tơgŭm ưh đei pơm hla ar mơ̆t lĕch gô pơjing đei tơdrong hiôk hian ăn anih jang tơlĕch tour chă tơmang lăng, tơguăt trong jang hơdoi păng iŏk yua ‘lơ̆ng dôm ‘măng păr tơpăt đơ̆ng Trung Quốc truh tơ̆ Cam Ranh. Kiơ̆ đơ̆ng noh, tơring đei dơ̆ng tơdrong ‘lơ̆ng chă sơng tơmoi lơ̆m dôm khei hơtuch sơnăm 2026 păng sơnăm 2027, hơtŏk tơdrong jang xa, tep pơdơh, chă tơmang lăng păng dôm tơdrong pơvih pơvăn.