Lăp lơ̆m hloh 2 khei, hăm jơhngơ̆m hơdrin tôch kơ dêh đơ̆ng khŭl kơdră chĕp kơ̆l, bơngai chih hơmet ming, ki sư păng bơngai jang ki thuơ̆t kơ Radiô nơ̆r pơma Việt Nam hlôi hăt hot pơjing jơ pơre, rơih ƀai hơri, hơmet pơ ‘lơ̆ng tơdrong jang ki thuơ̆t, hơmet ăn 1 hơnih pơih pơre ‘nao, hơnih joh hơri ƀĕnh tơdrong hơiă đei tơgŭm hơdrol tơgoăt tơdrong hiôk hăm bơngai mơ̆ng. Đơ̆ng dôm ƀai hơri hiôk hơiă pơih blŭng ăn năr ‘nao lơ̆m tơdrong pơre “Re jơva măt ‘năr”, truh dôm ƀai giao hưởng so kơ “Tơdra ‘lơ̆ng rŏ”, dăh mă hơnih mơ̆ng tôn reh lơ̆m tơdrong jang “Hnam joh hơri” - Concert Hall, rim jơ pơre tă kơ đei 1 tơdrong hơiă hơdrô̆.

Vă dôm ƀai giao hưởng, dôm tơdra thính phòng, Jazz ưh khan lăp re jơva lơ̆m hơnih joh hơri, mă oei đei ƀôh đơ̆ng tơdrong hơrih sa rim năr; vă rim bơngai mơ̆ng đei dơ̆ng tơdrong hiôk ƀôh tơdrong hơiă, tơdrong ‘lơ̆ng đơ̆ng joh hơri, pơjing tơdrong joăt kơ mơ̆ng joh hơri păng rong jơhngơ̆m đon hiôk. ‘Noh kŭm jing kơjă kăp gĭt mă VOV Sonata FM 89 lăng truh - vă tơdrong joh hơri ưh khan lăp răp mơ̆ng, mă oei tơgop pơm ‘lơ̆ng tơdrong hơrih jơhngơ̆m đon păng păr ang dôm kơjă kăp gĭt joh ayŏ kơdŏ soang kơjăp lơ̆m tơpôl. VOV Sonata FM 89 pơih pơre 24/24 jơ rim năr lơ̆m kơmăy FM 89 MHz