Hăm 18 anih vang akŏm hrŭk tơƀôh, Giĕng lêh Ao tai păng Hơbăn ao kon kông roi tơƀôh lơ tơdrong 'lơ̆ng hơiă joh ayŏ kơ dôm hơdrĕch hơdrŭng, tơring tơrang akŏm tơ̆ Đắk Lắk. Đơ̆ng ao tai, ao tứ thân truh hơbăn ao tanh Ê Đê, Jarai, M'nông, Thái, Tày, Mường… minh tơdrong hrŭk tơƀôh hơdăh 1 tơdrong ‘lơ̆ng hơdrô̆ lơ̆m tơdrong hơiă joh ayŏ kơ Đắk Lắk đơ̆ng rŏng kơ tơmơ̆t hơdai.

Vang năm akŏm ‘noh đei dôm kang ƀô̆, bơngai jang lơ̆m khŭl drŏ kăn, drŏ kăn hơgei, drŏ kăn jang mơdro sa păng drŏ kăn lơ̆m khŭl linh ƀô̆ đô̆i. Dôm anih jang hơnhăk hơnih pơchơt dôm hơbăn ao tanh kŭm hăm chơ choh kiơ̆ chăl hle, hơdai hăm ao tai.

Hrŭk hơbăn ao hơdrĕch Thái, mŏ Hoàng Thị Dương, truh đơ̆ng xăh Buôn Đôn tơroi, ‘nâu jĭ ‘măng vă bơngai jang lơ̆m khŭl drŏ kăn tơ̆ rim tơring tơƀơ̆p pơma dơnuh păng chă hơlen lăng dơ̆ng joh ayŏ kơ rim hơdrĕch hơdrŭng.

“'Nâu jĭ mĭnh năr lêh kơ đe drŏ kăn păng kŭm jing tơdrong hiôk vă bơngai drŏ kăn tơguăt đơ̆ng đe mŏ oh kơ dôm Khŭl Drŏ kăn đơ̆ng dôm xăh. Hmă hmă bơ̆n tôch kơ hrăt, ưh kơ đei jơ vă chă pơma dơnuh dih băl păng 'nâu jĭ mĭnh tơdrong hiôk vă mŏ oh chă pơma dơnuh, tơguăt, hŏk pơhrăm dih băl păng kŭm chă hơlen băt đei dơ̆ng lơ tơdrong lơ̆ng kơ rim tơring".

Kŭm hăm tơdrong jang pôk pơ ư joh ayŏ joăt joe, tơdrong jang oei tơƀôh muh măt Kâu lak ƀô̆ KOLs KOCs Đắk Lắk, vă tơguăt kon pơlei jang chŭn mir, hơp tak xăh hăm dôm bơngai pơcheh tơdrong tơroi, roi tơƀôh păng tĕch tơmam lơ̆m kơmăy sô̆. Yă H'Giang Niê, Kơdră Khul vei lăng kon pơlei jang chŭn mir dêh char Đắk Lắk akhan, đei dơ̆ng lơ kon pơlei jang chŭn mir jing dôm bơngai đei bưng ai lơ̆m mạng tơpôl păng hơtŏk tơdrong đei yoa tơdrong jang đơ̆ng kâu lak ƀô̆, kŭm jing trong tơgop ăn tơdrong jang tŏk đơ̆ng choh jang xa tơ̆ tơring.

“Nhôn hơmĕng akhan kâu lak ƀô̆ KOLs, KOC kơ dêh char gô tơgoăt dơ̆ng lơ anih tĕch mơdro tih lơ̆m jơ̆p teh đak pơma atŭm păng ƀơ̆t lăp 'noh jĭ lĕch tơ̆ ‘ngoăih apŭng plĕnh teh hai, pơjing đei mĭnh trong jang vă vă roi tơƀôh dôm tơmam đơ̆ng dêh char Đắk Lắk pơma hơdrô̆ păng dôm dêh char nai lơ̆m teh đak pơma atŭm. Kiơ̆ đơ̆ng kâu lak ƀô̆ âu, nhôn 'meh pơtho jingminh lăm kon pơlei jang chŭn mir, pơcheh hơgei păng lui ngeh năm lĕch tơ̆ anih tĕch mơdro kơsô̆".

Kŭm lơ̆m ‘măng âu, tơ̆ Buôn Ma Thuột, Đắk Lắk, pơgơ̆r pơdă rup che tanh Tơley brai Groi kông. Hnam kơjung, tơdrong jang pơm ge gŏ, không tanh brai kŭm hăm dôm um rup tơjê̆ lơ̆m tơdrong arih xa kơ kon pơlei Tây Nguyên đei dôm bơngai chhơ̆ rup chơ̆ tơ̆ che hăm rup ‘lơ̆ng, ƀĕnh tơdrong hơiă.

Bơngai chhơ̆ rup Trương Văn Linh, Kơdră vei lăng Khoa Mỹ thuật, Hnam trưng Cao đẳng Văn hóa Nghệ thuật Đắk Lắk hơnhăk truh tơdrong pơdă 3 tŏ rup kiơ̆ trong chhơ̆ hơiă. Lơ̆m noh, rup Tơmam đơ̆ng teh gôh đei ƀok iŏk jơhngâm hơiă đơ̆ng teh bazan păng 'long cheh phe, mă lei ưh đei tơƀôh hăm dôm um rup tơƀôh juăt jue. Bơngai chhơ̆ rup Trương Văn Linh tơroi:

“Cheh phe kơ Đăk Lăk hlôi đei yak lĕch tơ̆ apŭng plenh teh, noh inh iŏk tơdrong ‘lơ̆ng ‘noh jĭ “Tơmam đơ̆ng teh gôh” hăm um rŭp hơiă. Mưh đe dơ̆ng tơ̆ hơnăp um rŭp, kiơ̆ tơdrong ƀlŏk đơ̆ng rim bơngai ‘noh đei tơdrong ƀôh băt kơdih”.

Rim rup tơ̆ pơdă tă kơ tơƀôh tơdrong ‘mêm đơ̆ng bơngai pơcheh hăm tơring teh păng joh ayŏ Tây Nguyên. Pơdă Tơley brai Groi kông pơgơ̆r tơ̆ Anih 'măn răk tơmam drăm so apŭng plenh teh Cheh phe, Buôn Ma Thuột, Đắk Lắk, pơih 'măng pơvih ăn tơpôl truh đĭ 'năr 30/10/2026.