Hăm bơngai K’Ho, tanh reo broong jak ưh khan lăp pơkoel ăn ti hơbĕch hơbal gơh hơgei, hơdrin mă oei jing tơdrong joăt đei mĕ ƀă yă ƀok pơtho ăn. Nghệ nhân Rơ Ông Ha Bông, (hơdrung K’Ho kơtŏng Cil, oei lơ̆m thôn K’Nơh, tơring Đam Rông 4, dêh char Lâm Đồng) jĭ mĭnh lơ̆m dôm bơngai oei hơngŭr tơklep kơjăp hăm tơdrong jang joăt joe sơ̆ ki. Kiơ̆ đơ̆ng ƀok, mĭnh kơ loăi reo broong jak đei trong chă tanh phara dih băl.“Tơdrong chă rơih kram pơ o ling lang đei bơngai chă tanh rơih kơtang hloh. Bơngai tanh năm tơ̆ bri đei kon pơlei ăn asong păng tơchă kram pơ o  2 sơnăm vă koh, rơih pơ o ‘lơ̆ng ‘mơ̆i mă koh. Mưh koh tung brŏk, rơih dôm pơ o ‘lơ̆ng ‘noh mă gơh chă tanh. Pơ o vă tanh tơvăih jei pha hăm pơ o vă chă tanh reo. Pơ o ‘lơ̆ng ‘noh mă gơh chă tanh reo, jak ‘lơ̆ng. Tơdrong chă rơih ou ưh khan dai dai băt rơih ôh. Tơdrong chă rơih ou đei mĕ ƀă yă ƀok chă pơtho ăn kơna mă băt.”

Lăp đơ̆ng rŏng rơih pơ o, bơngai tang koh jăl, blăh jĭt tơnanh păng chă tanh. Mơ̆ng kiơ̆ kơ vă, chă tanh ler pêng, puăn, tơhnam, mơjĭt dăh mă jĭt ƀar trong. Bơngai tanh hơlen tôch kơ brĕ, tanh trĕp ‘lơ̆nh, tơnanh ưh kơ tơ gơ̆; adoi lăng hơlen, chă trơ trơp tơnanh mă ‘lơ̆ng vă reo, jak ‘lơ̆ng.

Dôm tơdrong chă tanh reo jak ‘noh jĭ hơdrin, hơlen rôch brĕ ‘mơ̆i mă pơjing đei reo jak ‘lơ̆ng. Păng tơdrong ‘nou tŏk bŏk đei nghệ nhân Rơ Ông Ha Bông chă pơtho ăn jơhnơr mơlôh lơ̆m ŭnh hnam kiơ̆ yok rok jơ̆ng. Bon Niêng Hoàng Đức, rơneh sơnăm 2013, ‘noh sou nghệ nhân Rơ Ông Ha Bông. Mơti mĕ ƀă đơ̆ng lơ̆m 3 sơnăm, oh đei klo hơkăn nghệ nhân rong ‘me. Tih vơ̆ djơ̆ ‘lơ̆ng lơ̆m tơpang ti ƀok yă vei lăng năng tông, Hoàng Đức hrôih hưch hanh hăm tơdrong jang tanh jĭt păng dang ei gơh vang chă tanh bơ̆n reo hăm ƀok.“Ĭnh ‘meh dêh. Ba ‘meh vei răk tơƀăk mong tơdrong jang joăt joe sơ̆ ki đơ̆ng mĕ ƀă yă ƀok chă pơsư̆ ăn. Ĭnh tôch ‘meh vă chă tanh. ‘Nou ‘noh reo, ‘nou ‘noh jak…”

Dôm reo jak jĭ tơmam iŏk yoa lơ̆m tơdrong hơrih sa kơ kon pơlei K’Ho đơ̆ng sơ̆ khơ̆ dang ei. Mŏ Cơ Liêng K’Joan, (oei lơ̆m thôn K’Nơh tơring Đam Rông 4, dêh char Lâm Đồng), tơbăt.“Reo ‘noh tôch hơ iă lơ̆m hơrih sa. Mưh năm tơ̆ mir chă pŭ đak dăh mă năm tơ̆ bri phĕ tăh ‘nhot ... bơ̆n tăh tơmam drăm lơ̆m reo jĭ tôch hơ iă. Adoi reo hăp hoei pơm jơnê̆ truh cham char, kơ yuơ hăp đei pơm tơlĕch đơ̆ng tơmam bri brăh, mưh hiăh pă gơh vă iŏk yoa bơih ‘noh hăp bŭk. Reo tôch hơ iă ăn tơdrong hơrih sa kơ nhôn đơ̆ngmĕ ƀă yă ƀok sơ̆ ki khơ̆ chăl nhôn hrei ou.”

Hăm bơngai K’Ho kơtŏng Cil, tơdrong jang tanh jĭt oei tơklep hăm tơdrong joăt găh hơnăp jang kơ bơngai drŏ nglo lơ̆m ŭnh hnam păng kon pơlei. Nghệ nhân Rơ Ông Ha Bông tơroi.“Kiơ̆ đơ̆ng mĕ ƀă yă ƀok đơ̆ng sơ̆: ‘meh vă tanh reo jak kăl tơchă pơ o, ‘meh vă sa sôk ‘noh tơchă kram, ‘meh vă pơma sa ‘lơ̆ng dih băl kăl mơ̆ng hơlen, ‘meh vă đei jing bơngai ƀok, ƀă lơ̆m ŭnh hnam lei kăl băt tanh reo jak. Tanh jĭt ‘noh ‘long pơtŏ vă ƀôh hơdăh hơnăp jang kơ bơngai drŏ nglo lơ̆m kon pơlei. Nhen ba đơ̆ng ‘lơ̆p hlôi pơhrăm tanh jĭt păng truh dang ei ĭnh hlôi 58 sơnăm oei hơnơ̆ng tanh jĭt đĕch”.

Đơ̆ng dôm tơdrong hŏk pơhrăm blŭng a hăm ƀă truh tơdrong chă tanh jĭt tŏk bŏk đei pơtho ăn kôn mon kon sou, chăl sơnăm kơ nghệ nhân Rơ Ông Ha Bông jĭ tơdrong tơroi găh tơdrong hơrih sa kơ bơngai janh tanh broong jak joăt joe đơ̆ng sơ̆ ki tơ̆ Dơng K’Nơh. Mĭnh tŏ reo broong jak đei chă tanh ưh khan lăp tơƀôh hơdăh tơdrong gơh hơgei hơbĕch hơbal, hlôh vao kơ bơgai tanh mă oei vei kơjăp tơdrong kăp gĭt lơ̆m tơdrong joăt kơ bơngai K’Ho kơtŏng Cil. Mưh nghệ nhân oei hơngŭr vei kơjăp tơdrong jang, mưh khul mơlôh đei hưch hanh hăm tơdrong joăt joe oei hơnơ̆ng tơgoăt kơjung, tơgop lơ̆m vei răk tơƀăk mong tơdrong oei sa joăt joe ‘lơ̆ng rŏ sơ̆ ki kơ kon pơlei pơla lơ̆m chăl hơrih ‘nao hrei ou.