Khánh Hòa sơng ‘măng păr jur kơ gre păr Nordwind đơ̆ng Moscow đơ̆ng rŏng vă jê̆ 5 sơnăm pơdơ̆h
Thứ ba, 10:39, 30/09/2025
VOV/Amazưt tơblơ̆
VOV/Amazưt tơblơ̆
VOV.Bahnar - ‘Năr dơ̆ng năr 29/9, tơ̆ Hnam bơ̆ jang gre păr apŭng plĕnh teh T2 Cham gre păr apŭng plĕnh teh Cam Ranh, Hơnih vei lăng kon pơlei dêh char Khánh Hòa hlôi pơgơ̆r sơng ‘măng păr jur mă blŭng đơ̆ng Moscow kơ Hơnih jang gre păr Nordwind Airlines, pơih dơ̆ng trong păr Nga – Nha Trang đơ̆ng rŏng 5 sơnăm pơdơ̆h.
Kơtă tơ̆ hơnih sơng tơmoi apŭng plĕnh teh T2, 20 ‘nu tơmoi blŭng a đei pôk ăn pơkao păng tơmam pơsư̆. Pơgơ̆r joh hơsoang kră sơ̆, joh hơri joăt joe hơvak kuh ka hla bat, pơjing đei jơ ‘năr chơt hơ iă, phăl hơlăng hloh. Lơ tơmoi lŭ lăp mưh đei vih năm ngôi dơ̆ng tơ̆ Khánh Hòa, hơnih truh joăt joe hăm đak dơsĭ jơk, chuơ̆h kok tơhmŭng, ‘năr tŏ pơchrang ƀrach. Tơdrong hơmet ming trong păr Nga ưh khan lăp tơdrong kăl lơ̆m ‘măng tơmang pơhiơ̆ apŭng plĕnh teh gĭt kăl, mă oei sơkơ̆t hơdăh Khánh Hòa ‘noh hơnih truh hơ iă hloh, lăng truh trong tơlĕch ăn jing hơnih tơm tơmang pơhiơ̆ đak dơsĭ tơm dơnơm kơ Đông Nam Á.
Viết bình luận