‘Măng pơdơh lêh Quốc khánh sơnăm ‘nâu pơdui đunh 4 năr, ‘năr rŏ tŏ hơlăng. ‘Nâu jĭ tơdrong ‘lơ̆ng vă tơmoi truh hăm Khánh Hòa chă tơmang lăng, pơdơh ngôi. Kiơ̆ kơ Anih vei lăng Joh ayŏ kơdŏ xoang, Tơplŏng kơdâu păng Tơmang lăng dêh char, lơ̆m dêh char sơng vă jê̆ 908 rơbâu ‘nu tơmoi, tŏk hloh 10% pơting hăm khei ‘nâu sơnăm sơ̆.

Lơ̆m kơsô̆ tơmoi truh tơ̆ Khánh Hòa, đei hloh 1/4 ‘noh tơmoi ƀĭch pơdơ̆h ngôi, tơmoi đơ̆ng apŭng plĕnh teh tŏk vă jê̆ hloh 1 puăt kơ sơnăm hơdrol. Lăm ƀĭch pơdơ̆h đei bơngai truh ƀich vă jê̆ 80%. Hăm kơsô̆ jên iŏk đei vă jê̆ 1.000 ti hlak jên đơ̆ng chă tơmang lăng, hŏk hloh 25% pơting hăm sơnăm adrol. Khánh Hòa hơnơ̆ng tơƀôh hơdăh tơdrong ‘lơ̆ng kơ anih truh hăm đak dơsĭ, achon kông tơm kơ teh đak, ‘măn đei lơ tơdrong hơiă ‘lơ̆ng lơ̆m jơhngơ̆m tơmoi tơmang lăng ƀât năr Quốc khánh. ‘Nâu jĭ tơƀôh chơt hơiă đơ̆ng tơdrong atŏk tơiung tơmang lăng đơ̆ng Khánh Hòa – Ninh Thuận ƀơ̆t tơmơ̆t hơdai.