Tơ̆ tơring groi kông gah Pơmơ̆t dêh char Quảng Ngãi, kon pơlei kon kông pơgơ̆r Soi ƀlŏk kơ Ƀok Dơnơm Hùng Vương, tơrĕk gah tơm a la chă kon pơlei pơla, hơvơn lơ tơmoi truh akŏm.

Atŭm hăm chă tơmang lăng cham char 'lơ̆ng rŏ, hơlen băt gah joh ayŏ kon pơlei kon kông tơ̆ tơring, lơ tơmoi adoi akŏm jơ năr năm truh dôm tơring oei vei răk khôi juăt soi ƀlŏk kơ Pơtao Hùng, nhen Đình Lương Khế tơ̆ phương Kon Tum, hnam chua Tháp Kỳ Quang, xah Đăk Hà, vă atŭm hăm kon pơlei tơ̆ tơring soh plang hlôt nhang ƀlŏk tơbăt kơ tơm a la chă kơ kon pơlei pơla. Pơmai Y Kha, oei tơ̆ xah Đăk Mar ăn tơbăt: “Nhôn akŏm tôn pơdah chĭng chêng, hơsuang vă ƀlŏk tơbăt păng pôk bơnê kơ jơhngơ̆m plang đơ̆ng yă ƀok dơnơm hlôi akŏm jơhngơ̆m tih tên hăm pơlei pơla, teh đak”.

Tơ̆ Hơnih gru grua kơ jơhơr hơrih joh ayŏ kơ teh đak Đình Lạc Giao, phương Buôn Ma Thuột, jơnŭm pơgơ̆r tơring păng kon pơlei dêh char Đăk Lăk kăp gĭt pơgơ̆r Soi ƀlŏk kơ Ƀok Dơnơm Hùng Vương vă ƀlŏk bơnê kơ rim Ƀok Pơtao Hùng hlôi akŏm jơhngơ̆m tơ-iung pơjing teh đak. 'Măng pơgơ̆r kăp gĭt pơtơm hăm tơdrong  pơtơm tôn hơgơ̆r, tôn chĭng chêng kiơ̆ khôi juăt kră sơ̆; plang nhang, plang tơmam drăm soi tơbeh đơ̆ng kon pơlei lơ̆m dêh char Đăk Lăk; lêh ƀlŏk bơnê, đŏk tơbang tơbăt kơ jơhnơr hơrih nuih mơng kơ kon pơlei. Tơ̆ ou oei pơgơ̆r dôm tơdrong akŏm chih kơthơ kiơ̆ khôi so, tơbang tơmam xa kră sơ̆, pơdah hơri chèo, kuan hŏ, akŏm kâu lak ƀô̆ brŏ tĭnh, hơri then... păng pơdah dôm tơmam drăm OCOP kơ dêh char Đăk Lăk.

Tơ̆ hơnih soi ƀlŏk Âu Lạc tơ̆ kơ̆l kông Phượng Hoàng lơ̆m Hơnih tơmang pơhiơ̆ chơkơi Prenn Đà Lạt, dêh char Lâm Đồng kăp gĭt pơgơ̆r Soi ƀlŏk kơ Ƀok Dơnơm Hùng Vương, hơvơn lơ tơmoi păng kon pơlei truh akŏm. Đơ̆ng rŏng kơ khôi juăt sơng tơmam soi plang kơ Ƀok Dơnơm ăn teh đak păng khôi soi tơbeh juăt jue, khul kơdră kơpal păng kon pơlei dêh char Lâm Đồng atŭm hăm lơ tơmoi truh tơmang pơhiơ̆ hlôi soh plang hlôt nhang ƀlŏk tơbăt kơ Ƀok Dơnơm. Tơ̆ ou oei đei dôm tơdrong pơdah joh ayŏ kơdŏ suang kră sơ̆, dôm tơdrong pơsuh pơchơt kră sơ̆ nhen kơ tướng, hao jrăng 'lŏng pik rơmă, teh gŏ lơ̆n, akŏm kơchơ tơmam drăm xa, cham akŏm tơbang hla che Việt Nam, thư phap păng pơdah um rup... tơƀôh dơ̆ng tơdrong kăp gĭt kơ joh ayŏ kră sơ̆.

Tơ̆ hơnih soi ƀlŏk kơ Ƀok Pơtao Hùng tơring sơlam Tuy Đức, dêh char Lâm Đồng, kon pơlei kon kông kăp gĭt pơgơ̆r Soi ƀlŏk kơ Ƀok Dơnơm Hùng Vương. Hơnih soi ƀlŏk kơyuơ kon pơlei đơ̆ng Phú Thọ pơjing đơ̆ng sơnăm 2018 lơ̆m cham să hloh 2.100 m². 'Nou hlôi jing hơnih pơgơ̆r lơ tơdrong soi ƀlŏk kơ tơm a la chă, vei răk tơƀăk mong juăt jue, tơgop hơtŏk tơdrong tơguăt tơguăl tôm kon pơlei tơ̆ tơring sơlam. Ƀok Chử Anh Chương, jang lơ̆m Jơnŭm vei lăng hơnih soi ƀlŏk kơ Ƀok Pơtao Hùng tơ̆ Tuy Đức ăn tơbăt: “Tôm bơngai adoi tơrĕk truh tơm a la chă po kơdih, kon pơlei ling lang băt hơdah: ‘Mă năm truh tơring ayơ, ƀlŏk truh năr soi ƀlŏk kơ Ƀok Dơnơm năr 10 khei 3 'noh vih’. Kon pơlei rim bơngai adoi hơdơ̆r thoi noh”

'Năr ou, kon pơlei pơla đơ̆ng Phú Thọ tŏk bŏk oei hơrih jang xa tơ̆ dôm xah gah Pơmơ̆t dêh char Gia Lai akŏm chôt vih Hơnih soi ƀlŏk kơ Ƀok Pơtao Hùng tơ̆ phương Pleiku, kŭp yom pơgơ̆r soh plang hlôt nhang. Tơ̆ ou, ƀlŏk tơbăt kơ tơm a la chă, kon pơlei tơƀlŏk dih băl pơm kiơ̆ tơnăp tơchơ̆t đơ̆ng Đảng, teh đak păng akŏm pơm jang mŭk drăm unh hnam, pơjing joh ayŏ hơgei tơ̆ tơring kon pơlei. Ƀok Đỗ Xuân Thu, jang lơ̆m Jơnŭm bơngai minh pơlei Vĩnh Phú tơ̆ dêh char Gia Lai ăn tơbăt: “Sơnăm mă yơ nhôn adoi pơgơ̆r soi ƀlŏk kơ Ƀok Pơtao Hùng, Pơtao kơ tôm kon pơlei Việt Nam. Nhôn ling lang pơ-ư pơ-ang jĭ bơngai kon kơ tơring teh Yă Ƀok Dơnơm, noh chơt hơ-iă dêh”.