Yă Nguyễn Thái Tường Vân, Kơdră Anih jang Tơmang pơhiơ̆ Thái Loan, đei anih pơm jang tơ̆ dêh char Đồng Nai ăn tơbăt, anih jang mŭk drăm đei Anih jang Joh ayŏ, Tơplŏng kơdou păng Tơmang pơhiơ̆ dêh char Lâm Đồng hơvơn khul truh chă hơlen lăng dôm anih tơmang lăng, anih gru gra jơhnơr hơrih – joh ayŏ, tơmam xa, anih pơchơt pơhiơ̆... mă đe ư ang tơ̆ 3 tơring: Mũi Né, Đà Lạt păng Gia Nghĩa.

Hơdah, khul jang hlôi chă hơlen cham char 'lơ̆ng rŏ Bàu Trắng, Anih 'măn pơdah Nước Mắm păng lăng Fisherman Show (Mũi Né), Delight Park Đà Lạt, XQ Sử kuan; anih tơmang pơhiơ̆ Langbiang Land păng tơdrong pơdah joh ayŏ kơdŏ suang “Ang hơdah tơring teh kơdrơ̆ng” (Đà Lạt); Anih tơmang pơhiơ̆ Tà Đùng, Pơlei tơmang cham char Eva Village, Hnam 'măn pơdah tơdra (Gia Nghĩa),..Hăm yă Vân, dôm tơring ou akŏm đei lơ tơdrong hơlen băt kăp gĭt: “Gah Phan Thiết (so), inh ƀôh đei tơdrong pơdah Fisherman Show hiôk 'lơ̆ng mă kon pơlei Việt Nam lơ bơngai tam mă băt truh. Nhôn năm truh Đà Lạt noh adoi đei dôm anih 'nao, đei ming man keh đang lơ̆m dôm khei ou ki. Inh hơpơi 'meh dôm tơdrong akŏm ou gô pơtruh ăn tơmoi dôm tơdrong hiôk 'lơ̆ng. Kơdih inh hlôi jang gah tơdrong jang tơmang pơhiơ̆ 29 sơnăm adoi hơ-iă hăm dôm tơdrong akŏm yơ̆ng ou ki”.

Oei hăm ƀok Hoàng Công Định, Kơdră Anih jang Dima-tour sơkơ̆t hơdah, dêh char Lâm Đồng 'nao jĭ minh tơring tơmang pơhiơ̆ 'lơ̆ng hloh, akŏm tôm tơdrong nhen kông kơjung, dơnou đak să, đak dơsĭ jơk păng achon teh 'lơ̆ng. Kơyuơ noh, hơnăn tơmang pơhiơ̆ gô đei pơih să hloh. Hăm mŭk drăm hlôi đei noh, rim anih jang mŭk drăm gô pơjing tơmam drăm hơdoi kơ tơring pơtăl kơ tĕch tour tơmang lăng rah rai. Hơdah noh pơjing dôm tơdrong tơmang pơhiơ̆ nhen đak dơsĭ jơk, bri kông kơdrơ̆ng tơguăt hăm pơdơh pơdei tơ̆ Mũi Né, Phú Quý păng chă tơmang lăng Đà Lạt, groi kông păng tơmang lăng kiơ̆ dôm tour tơpôl tơ̆ Đăk Nông (so). Mă đei lơ tơdrong hiôk, mă lei kiơ̆ kơ ƀok Định, trong nơnăm tŏk bŏk pơm tơhlăk tăk ăn tơdrong tơguăt jang đơ̆ng Mũi Né, Đà Lạt păng Gia Nghĩa: “Đơ̆ng tơmơ̆t hơdoi, nhôn hlôi akŏm tour tơmang đơ̆ng Mũi Né păng Đà Lạt hơnơ̆ng, mă lei tŏk bŏk oei tơhlăk gah tơdrong năm truh Đăk Nông (so) kơlih trong nơnăm hơtaih yaih păng tơmoi chă tơmang pơhiơ̆ adoi tam mă lăp kiơ̆ tơdrong năm đơ̆ng Mũi Né truh Đăk Nông đunh lơ̆m 10 jơ hloi. Bơ̆n gơh chă pơjing đei jăl trong kơđeh hloh, dah mă ning mônh kơnh ah mă Mũi Né kĕ ming man cham gre păr noh gô 'nhăk tơmoi đơ̆ng Mũi Né năm truh Đà Lạt, păng đơ̆ng Đà Lạt năm truh Đăk Nông gô hrĕnh hloh.

Hăm mŭk drăm cham char hlôi đei, dêh char Lâm Đồng tŏk bŏk oei sơkơ̆t anih kăp gĭt truh tơmang pơhiơ̆ păng phara kơdih. Mă lei, vă tơguăt dôm tơmam drăm, tơdrong tơmang pơhiơ̆ tơ̆ dôm tơring jing tơmam drăm 'lơ̆ng, kăp gĭt, kĕ tơgar kơtang jing minh tơdrong jang kăl kơ hơlen pơkăp ăn đe kơdră kơpal păng dôm bơngai jang tơmang pơhiơ̆. PGS.TS. Phạm Thị Huyền – Đăi hŏk Kinh tê̆ Kuôk dân Hà Nội pơtih: "Lâm Đồng dang ei ưh hơdrô̆ đei 1 dah mă 2 pơyan, mă đei truh 4 pơyan". Pơm thoi yơ vă chă đei minh anih pran kơtang, anih atŭm, vă ah mă tơmoi truh Lâm Đồng gơh đei tơdrong tơmang hơlen pơhiơ̆ kăp gĭt hloh: “Tơdrong mă Lâm Đồng ('nao) gô athei jang noh hơkŏp đei tôm tơdrong kiơ mă bơ̆n hlôi đei lơ̆m minh tơdrong pơkăp atŭm vă tơroi tơbăt truh tơmoi. Kơdih inh kơchĕng tơdrong jang dang ei kơ Lâm Đồng tam mă đei tơroh kơjăp hăm dih băl, pơm ăn tơdrong tơroh gah jang tơmang pơhiơ̆ kơ 3 tơring so oei tơjruh dêh. Athei pơm thoi yơ vă đei minh Lâm Đồng hơdrô̆, pơtăl kơ đei 3 Lâm Đồng nhen dang ei”.

Vă sek tơlang keh kong gah trong nơnăm tơguăt dôm tơring tơmang pơhiơ̆ lơ̆m tơring, Lâm Đồng tŏk bŏk pơtruh nơ̆r hăm Trung ương tơmơ̆t lơ̆m pơkăp man jăl trong kơdou hrenh Hlĕch – Pơmơ̆t pơtoi Phan Thiết - Bảo Lộc - Gia Nghĩa. Ƀok Phạm Văn Mạnh, Phŏ Kơdră Anih jang Ming man dêh char ăn tơbăt: “Dang ei, Anih tơm jang Ming man tơgŭm hăm tơdrong jang ou. Gah ming hơmet jăl trong pơtoi đơ̆ng Gia Nghĩa năm truh Di Linh păng Jăl trong 28B, noh dang ei Jăl trong 28B tŏk bŏk đei ming hơmet; jăl đơ̆ng Di Linh năm truh Gia Nghĩa tŏk bŏk pơtruh nơ̆r hăm Trung ương asong jên vă ming hơmet. Tơ̆ hơnăp, nhôn pơtruh nơ̆r hăm dêh char asong jên vă ming hơmet vă ăn kơ tơmoi chă vih vơ̆t ƀônh hiôk hloh”.  

Atŭm hăm tơdrong asong ming man trong nơnăm, anih jang tơmang pơhiơ̆ Lâm Đồng kŭm tŏk bŏk oei sơkơ̆t hơdah minh trong jang tơmang pơhiơ̆ tôm tong, kơjăp sơđơ̆ng păng hơtŏk. Ƀok Nguyễn Văn Lộc, Kơdră Anih Joh ayŏ, Tơplŏng kơdou păng Tơmang pơhiơ̆ dêh char Lâm Đồng ăn tơbăt, anih jang tơmang pơhiơ̆ hlôi tơlĕch trong jang iŏk yua mŭk drăm păng dôm tơdrong hiôk hlôi đei kơ dêh char Lâm Đồng lơ̆m um la kak tơmang pơhiơ̆ kơ jơ̆p teh đak: “Nhôn gô pơgơ̆r lơ tơdrong chă hơlen băt, minh hơnih truh 3 tơring lơ̆m tơring teh kơ Lâm Đồng. Atŭm hăm noh akŏm dôm tour tơmang pơhiơ̆ tơroh 3 tơring; tơgŭm ăn Anih jang vei lăng kon pơlei dêh char, Anih jang Tĭnh uy tơbang Tơchơ̆t gah hơtŏk tơmang pơhiơ̆ jăl sơnăm 2025 - 2030 păng pơkăp lăng truh sơnăm 2045”.

Dôm pơkăp jang trŏ ƀlep lơ̆m pơkăp tơroh tơring jang păng sơkơ̆t hơdah hơtŏk tơmam drăm tơmang pơhiơ̆ kăp gĭt, ăn ƀôh tơdrong kơ-'nôh khŏm mă jang đei kơ anih jang tơmang pơhiơ̆ dêh char Lâm Đồng. Kiơ̆ đơ̆ng noh sơkơ̆t hơdah anih dơ̆ng kơ minh anih truh pran kơtang păng tơpă pha lơ̆m rim 'măng chă tơmang pơhiơ̆ hơlen băt đơ̆ng tơmoi.