Lêh tơchĕng hơdrol pơih blŭng lơ̆m kơmăng 29/8, đei hơnăn “Hơpơi ‘meh đak dơsĭ jơk - bri kông hơdăh ‘lơ̆ng” tơ̆ kơphô̆ đak dơsĭ Quy Nhơn. Kŭm hăm ‘noh jĭ lơ tơdrong jang hơiă nhen: lêh trong kơphô̆ “ ‘lơ̆ng hơiă đak dơsĭ”; Năr joh ayŏ cheh phe, chĭng chêng Tây Nguyên; Lêh tơmam sa “Tơmam ‘lơ̆ng đơ̆ng teh bazan păng đak dơsĭ”; pơdă tơƀôh tơmam OCOP păng pơlei tơdrong jang joăt joe; dôm tơdrong jang pơm tơƀôh ƀyoh Bình Định gô đei tơmơ̆t hơdai hăm tôn chĭng chêng Tây Nguyên, pơm tuồng păng hơri chòi.

Lêh gô pơtôch hăm tơdrong pơdăh ŭnh hơdăh ‘lơ̆ng rŏ tơ̆ cham să Nguyễn Tất Thành. ‘Nâu jĭ 1 tơdrong jang gĭt kăl vă tơklep dôm kơjă kăp gĭt joăt joe, pơm jing tơdrong ‘lơ̆ng hơdrô̆ ăn kơ Gia Lai tơ̆ hơnăp kơnh./.