Đei pơih pơgơ̆r đơ̆ng ‘năr 28/8 păng pơdui truh đĭ ‘năr 5/9 tơ̆ Hà Nội, ‘Măng pơdă Tơdrong jơnei đơ̆ng teh đak lơ̆m 80 sơnăm chĕp kơ̆l pơgơ̆r teh đak kơdih, rơngei hiôk hian ming tơƀôh dôm tơdrong jơnei đơ̆ng jang atŏk tơiung teh đak lơ̆m lơ tơdrong.

Ƀok Tạ Quang Đông, Phŏ Kơdră tơm vei lăng joh ayŏ kơ dŏ xoang, Tơplŏng kơdâu păng chă tơmang lăng pơma hơdăh: “’Nâu jĭ 1 tơdrong pơdă mă bơ̆n ming tơƀôh đei lơ um rup găh kon bơngai, teh đak Việt Nam, dôm tơdrong jơnei đơ̆ng Việt Nam hăm bôl boăl lơ̆m apŭng plenh teh, hăm kon pơlei lơ̆m teh đak ƀlep ƀât ‘năr 2/9 âu. ‘Nâu jĭ 1 anih akŏm, 1 anih truh gô sơng đei lơ kon pơlei đơ̆ng dôm dêh char truh tơ̆ anih tơm vă lăng tơmam đei ming pơdă vă pôk pơ ư tơdrong jơnei đơ̆ng teh đak bơ̆n”.

Vang truh hăm tơdrong pơdă đei 34 kơdeng ming pơdă tôch hơiă, kiơ̆ rim tơring kơdih đơ̆ng 34 dêh char, plt păng dôm anih jang kơpal kơ Trung ương. Mĭnh lơ̆m dôm tơdrong hơiă hlŏh lơ̆m ‘măng pơdă ‘nŏh jĭ anih pơdă tơmam khul linh, tơƀôh hơdăh tơdrong kơtang nuih mơng đơ̆ng khul linh kon pơlei Việt Nam.

Thiếu tướng Tống Văn Thanh, Phŏ Kơdră Anih pơtâp pơhrăm, Anih jang Chinh trĭ kơ Khul linh kon pơlei Việt Nam tơroi: “Tơ̆ âu nhôn iŏk yoa kơmăy kơmŏk mưh ming pơdă, roi tơƀôh tơdrong juăt ‘lơ̆ng đơ̆ng sơ̆ păng chăl ‘nao hrei ‘nâu, mă loi jĭ pơm anih ăn đe truh năng tơ̆ yăn âu tôch hơiă, kŭm sơng đei lơ bơngai truh. Mă 2 ‘nŏh vang ming pơdă tơ̆ ‘ngoăih hăm hơnăn “Đao păng khêl” – hăm teh đei anih pơgơ̆r asong ming pơdă xă hlŏh 2ha. Tơ̆ âu nhôn ming tơƀôh lơ tơmam khul linh, lơ kơloăi phao kơtoang, kơmăy kơmŏk ‘nao yoa đom khul linh, anih jang găh khul linh tơchĕng hơlen, pơm tơlĕch”.

Tơ̆ Anih roi tơbăt kơ ‘măng pơdă “Tơdrong jơnei kơ teh đak 80 sơnăm Chĕp kơ̆l pơgơ̆r teh đak kơdih, rơngei hiôk hian”, ƀok Lê Hải Bình, Phŏ Kơdră chĕp kơ̆l Anih tơm vei lăng joh ayŏ kơ dŏ xoang, tơplŏng kơdâu păng chă tơmang lăng ăn tơbăt: “Anih roi tơbăt jĭ anih pơtruh rim tơdrong vă pơvih ‘lơ̆ng hlŏh ăn tơdrong jang đơ̆ng dôm bơngai chih tơdrong kơtơ̆ng ang lơ̆m păng ‘ngoăih kơ teh đak, kŭm nhen sek tơlang rim nơ̆r athei lơ̆m tơdrong jang đơ̆ng bơngai chih tơdrong kơtơ̆ng ang. Hăm đon pơhnŏng thoi noh, nhôn pơjing rim tơdrong ‘lơ̆ng ăn dôm bơngai chih tơdrong kơtơ̆ng ang lơ̆m păng ‘ngoăih kơ teh đak chih tơroi găh ‘măng Pơdă kŭm nhen dôm bơngai chih tơdrong kơtơ̆ng ang gô iŏk đei nơ̆r roi tơbăt hrôih hlŏh đơ̆ng dôm tơdrong jang lơ̆m ‘măng Pơdă”.

Tơ̆ âu kŭm pơgơ̆r lơ tơdrong hơri hơxoang, hop akŏm, ngôi pơchơt, truh lăng ngôi tơmam tơ̆ yăn âu tôch hơiă. ‘Măng pơdă ưh lăp tơdrong jang chinh trĭ – joh ayŏ kơ dŏ xoang gĭt kăl đĕch mă oei tơgop tưk tơiung jơhngâm đon hưch hanh kơ hơdrĕch hơdrung, tơiung jơhngâm đon ‘mĕh pơjing teh đak pran kơtang. ‘Nâu kŭm jing tơdrong tôch hơiă lơ̆m dôm tơdrong jang hơiă kơ kăch mang khei 8 păng Quốc khánh 2/9./.