Ah drơ̆m kơsơ̆ tơ̆ thôn Đăk Trăm 1, xah Kon Đào, dêh char Quảng Ngãi. Đơ̆ng rŏng minh năr jang mir ƀa, cham hnam Ngê̆ nhơ̆n Ưu tŭ A Thu re ang jơva chĭng chêng, t’rưng, klông pút, chĭng tơmo. Bơngai 'lŏ, đe tơdăm, đei hloi đei hơ-ioh iĕ truh hŏk pơhrăm. Bơngai pơhrăm tôn chĭng, bơngai pơlong năng reh brŏ, bơngai tơhăt mơ̆ng A Thu klĕng klŏng hơmet tơdra chĭng chêng.

Lơ̆m tơdrong vei răk tơƀăk mong joh ayŏ kră sơ̆, A Thu ưh hơdrô̆ jĭ bơngai gơh tôn chĭng chêng, mă ƀok oei tơchă, pơm tơlĕch păng hơmet lơ tơmam tôn reh juăt jue. Mă kăl, đơ̆ng sơnăm 2017, ƀok pơtơm chă hơlen băt gah chĭng tơmo. Đơ̆ng 5 hlak tơmo mă blŭng, A Thu hơlen pơlong năng, hơmet tơdra brông brŏng vă hơtŏk jing chĭng tơmo 15 hlak. Atŭm hăm chĭng chêng, t’rưng, klông pút, pơ̆t pơng, hơgơ̆r... dôm tơmam tôn reh noh hlôi jing minh tơmam kăp gĭt ăn dôm tơdrong pơdah kơ khul hơri brông mă ƀok pơtơm. A Thu tơroi: “Đơ̆ng đei lơ bơngai băt truh tơ inh, đe sư hơvơn inh năm pơtho chĭng chêng. Xah ayơ đei chĭng chêng 'noh đe sư hơvơn inh truh pơtho. Đơ̆ng noh truh dang ei, inh hlôi pơtho hloh minh hrĕng lăm bơih. Inh pơtho tơ̆ dôm hnam trưng, hnam trưng jăl 2 păng hnam trưng hŏk teh đak rong 'me. Thôn pơlei ayơ 'meh pơhrăm tôn chĭng chêng noh inh truh pơtho. Inh pơtho chĭng chêng, hơmet chĭng chêng hloi; 'nguaih kơ noh inh oei pơtho tôn chĭng klơ̆k, chĭng tơmo, tap pơ̆t pơng ăn kơ dôm bơngai 'meh pơhrăm”

Tơdrong kăp gĭt hăm ngê̆ nhơ̆n A Thu ưh hơdrô̆ hăm tơdrong mă ƀok băt reh tôn dah mă băt pơm tơlĕch dôm tơmam reh tôn. Ƀok tŏk bŏk hơdrin vă tôm đe sơnăm mơlôh lơ̆m pơlei adoi băt chă reh tôn, băt tơmơ̆ng păng hlôh vao hơdah gah tơdrong kăp gĭt kơ dôm tơdra noh. Khul chĭng chêng, hơsuang păng tơmam tôn reh kon kông kơyuơ A Thu akŏm đei dôm jĭt 'nu bơngai vang jang, đei hloi bơngai 'lŏ sơnăm păng đe sơnăm mơlôh. Đơ̆ng sơnăm 2019 truh dang ei, khul đei lơ 'măng năm akŏm pơlong, pơdah lơ̆m păng 'nguaih kơ dêh char. Sơnăm 2025, đe ngê̆ nhơ̆n oei hơnhăk tơdra Xơ Đăng truh hăm Pơlei Joh ayŏ - Tơmang pơhiơ̆ hơdrung kon kông Việt Nam tơ̆ Đồng Mô, Hà Nội. Ngê̆ nhơ̆n A Hương, 47 sơnăm, oei tơ̆ thôn Đăk Trăm 1, jĭ minh lơ̆m dôm bơngai tơguăt lơ sơnăm hăm khul joh ayŏ kơ A Thu tơroi: “Hơdrol ki, inh băt chrah mul meo, đơ̆ng rŏng 'noh inh vang jang lơ̆m khul chĭng chêng păng tơmam tôn reh kon kông kơ ngê̆ nhơ̆n A Thu. Sư hlôi pơtho tôn chĭng chêng păng tơmam tôn reh kon kông ăn kơ nhôn. Sư 'nhăk nhôn năm pơdah tơ̆ lơ tơring, truh hloi Pơlei Joh ayŏ - Tơmang pơhiơ̆ Đồng Mô tơ̆ Hà Nội, Lâm Đồng, Đăk Lăk. Kiơ̆ đơ̆ng noh nhôn chă hŏk hơlen păng tơroi tơbăt gah joh ayŏ kon kông po”

Ƀok A Don, Phŏ Kơdră Hơnih Joh ayŏ xah Kon Đào, dêh char Quảng Ngãi akhan, dôm tơdrong mă ngê̆ nhơ̆n ưu tŭ A Thu jang đei ưh pơdơh ah tơdrong vei răk tơƀăk mong minh ƀar tơmam tôn reh dah mă akŏm đei minh khul joh hơri. 'Noh jing tơdrong pơjing đei khul chă pơdjoi. Ƀok hlôi pơtho gah chĭng chêng păng tơmam tôn reh juăt jue ăn kơhrĕng bơngai hŏk tơ̆ dôm hnam trưng păng pơlei pơla; atŭm hăm noh pơtho ăn lơ ngê̆ nhơ̆n băt gah kih thuơ̆t hơmet nơ̆r chĭng chêng. Đei lơ bơngai hŏk đơ̆ng rŏng kơ juaih bơih noh pơtoi akŏm lơ̆m khul ngê̆ nhơ̆n, atŭm hăm ƀok pơtho ăn khul hơ-ioh iĕ. Ƀok A Don, Phŏ Kơdră Hơnih jang Joh ayŏ xah Kon Đào sơkơ̆t hơdah:  “Inh ƀôh ngê̆ nhơ̆n A Thu hlôi tơgop lơ ăn tơdrong jang vei răk tơƀăk mong chĭng chêng, tơmam tôn reh kon kông Xơ Đăng. Ngê̆ nhơ̆n hlôi hơdrin pơtho chĭng chêng păng tơmam tôn reh ăn đe 'nhŏng oh lơ̆m pơlei păng pơlei ah nai lơ̆m xah. 'Nguaih kơ pơtho lơ̆m xah, ngê̆ nhơ̆n A Thu oei năm truh dôm xah nai lơ̆m dêh char, vă pơtho ăn dôm hnam trưng hŏk păng rim pơlei pơla đei chĭng chêng, tơmam tôn reh păng 'meh vă pơhrăm. Inh ƀôh ngê̆ nhơ̆n A Thu jĭ bơngai tôch hơdrin lơ̆m tơdrong vei răk tơƀăk mong joh ayŏ chĭng chêng păng tơmam tôn reh kon kông Xơ Đăng, 'noh jĭ minh tơdrong kăp gĭt tơgăl kơ pôk bơnê”

Tơdrong kăp gĭt hăm Ngê̆ nhơ̆n Ưu tŭ A Thu 'noh ƀok ưh hơdrô̆ vei vêr dôm tơdra so kơ bơngai Xơ Đăng hăm tơpang ti kơ bơngai ngê̆ nhơ̆n, mă oei pơdjoi đon 'mêm hăm dôm tơdrong noh lơ̆m jơhngŏm đon đe sơnăm mơlôh. Noh jing tơdrong kăp gĭt tih tên lơ̆m tơdrong jang kơ Ngê̆ nhơ̆n Ưu tŭ A Thu: ưh đei lê̆ dôm tơdra juăt jue mă yă ƀok pơsư̆ ăn hiơt hiong ôh, mă pơm ăn kơ hăp pơtoi re ang lơ̆m tơdrong hơrih hrei ou.