Pơgê năr 21/8, Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdu păng Tơmang pơhiơ̆ hlôi pơgơ̆r hop akom hơmet ăn pơgơ̆r blŭng a, pơgơ̆r pơtôch Pơdă “80 sơnăm iung yak Pơm tơm kơdih-Rơngei hiôk hian-Hơnŭk hơnoa” ƀlep lơ̆m năr tơbăt 80 sơnăm Kĕch mang Khei Tơhngam jơnei păng Quốc khánh (2/9).  Pơm lêh pơgơ̆r blŭng a Pơdă “80 sơnăm iung yak Pơm tơm kơdih-Rơngei hiôk hian-Hơnŭk hơnoa” gô iung pơgơ̆r đơ̆ng 9 jơ năr 28/8; Pơm lêh pơtôch gô pơgơ̆r lơ̆m 8 jơ gơmăng năr 5/9. Pơm lêh pơgơ̆r blŭng a păng Pơm lêh pơgơ̆r pơtôch jei đei pơgơ̆r tơ̆ ‘ngoăih, cham găh Tu Hơnih tơm Pơdă Việt Nam. Pơđĭ dôm tơdrong pơgpơ̆r kơ 2 hơyuh pơm lêh gô đei rapor păng pơdăh Tivi kơtă truh hăm kon pơlei kiơ̆ trong hơyuh rapor kơ Radiô Nơ̆r Pơma Việt Nam hăm Radiô Pơdăh Tivi Việt Nam. 2.400 ‘nu đoàn viên hơdruh tơdăm năm jang jei gô đei hơvơn vang iung jang lơ̆m pơtho tơbăt dôm tơdrong pơrô̆ pơrôp, tơgŭm djru kon pơlei păng tơmoi găh tơmang pơhiơ̆. Tơchĕng hơlou gô đei dang 5.000-6.000 ‘nu bơngai tang măt vang năm pơm lêh pơgơ̆r blŭng a, pơgơ̆r pơtôch Pơdă.