Pơlong đă ƀŏng lŏng tơplŏng kơdâu pơgơ̆r 21 môn đă ƀŏng lŏng tơplŏng kơdâu, hơvơn đei 3.000 'nu bơngai pơlong, hloh 600 'nu bơngai pơtho păng 500 'nu bơngai pơm hơlam lơ̆m jơ̆p dêh char vang akŏm. Pơih blŭng tơdrong pơgơ̆r blŭng a 'noh jĭ tơdrong yak pơrŏ pôk pơ ư khul linh hăm tơdrong vang akŏm đơ̆ng rim khul pơgơ̆r lêh, 31 khul pơlong păng khul pơm hơlam, tơƀôh hơdăh tơdrong pơgơ̆r tih păng jơhngơ̆m đon hơdai băl đơ̆ng rim tơring, anih jang. Đang kơ ‘noh jĭ tơdrong joăt iŏk păng tơ̆k tơhnit unh Pơlong.

Unh khơ̆ng đei iŏk đơ̆ng Hnam soi Tây Sơn Tam kiệt, đei tơdrong ‘lơ̆ng pơtrơp dơ̆ng tơdrong joăt joe, jơhngơ̆m đon hơdai băl păng hơpơi ‘meh yak tŏk đơ̆ng rim jơhnơr mơlôh Gia Lai. Hăm hơnăn “Đă ƀŏng lŏng tơplŏng kơdâu Gia Lai - Hơpơi ‘meh hơtŏk tơiung”, Tơdrong pơlong tơgop păr ang tơdrong jang “Đĭ đăng kon pơlei pơhrăm hơkâu jăn pran kiơ̆ rok ƀok Hồ pran kơtang”; hơdai hăm tơklep tơplŏng kơdâu hăm joh ayŏ, chă tơmang lăng, roi tơƀôh um rup Gia Lai hơbĕch hơbal, ƀĕnh tơdrong hơiă lơ̆m Sơnăm Chă tơmang lăng kơ teh đak 2026.