'Năr hŏk hơtuch giĕng, cham hnam trưng Jăl kơđeh Tô Hiệu, phương Ea Kao, dêh char Đăk Lăk rơ-ông rơ-ang kơ dôm tơdrong hŏk hơlen gah joh ayŏ juăt jue. Đe hŏk tro akŏm chă pơhrăm bieh, kăt, pơklep um rup. Dôm hlak hla bar kok ang bang um dok che tanh, um rup pơlei pơla, tơdrong hơrih rim năr. Um rup hnam kơjung, tơmam tôn reh đei tơƀôh hơdah hăm tơmam drăm pơm đei, atŭm hăm nơ̆r tơblang lơ̆m jơ̆p hnam trưng. Oh H'Trâm Niê, hŏk lăm 5E, tơroi: “Inh lăp hloh noh akŏm hŏk STEM kơ dôm lăm hlôi akŏm pơdah kơlih akŏm đei joh ayŏ kon kông ÊĐê. Inh pơ-ư pơ-ang gah joh ayŏ kon kông po kơdih, inh hơpơi 'meh hnam trưng gô pơgơ̆r lơ tơdrong akŏm hloh vă inh gơh pơtoi vei răk tơƀăk mong joh ayŏ kon kông po”.

Rơ-ông rơ-ang hloh noh tơdrong pơlong Gơgŭ Teng neng Maih hăm lơ tơdrong apinh tăp dăr hlôh vao gah joh ayŏ kon kông tơ̆ tơring nhen ÊĐê, M’Nông. Oh Đinh Diệp Anh, hŏk tro lăm 3A ăn tơbăt: Dôm nơ̆r tơl ăn ƀôh tơdrong kơchăng chă hŏk hơlen đơ̆ng hŏk tro hăm dôm tơdrong băt vao gah hnam kơjung, tơdrong et xa, chĭng chêng: “Inh ƀôh tôch sô̆ hơ-iă. Inh đei băt lơ tơdrong hloh gah joh ayŏ ÊĐê nhen hnam kơjung, chĭng chêng, hơbăn ao tanh păng dôm tơdrong akŏm juăt jue kăp gĭt hloh kơ kon pơlei  ÊĐê”.

Jơhngơ̆m đon chơt hơ iă kơ đe hơ ioh jei lang să truh rim đe mĕ ƀă. Ƀok Lê Đình Nam, đei kon hŏk lơ̆m hnam trương Jăl kơđeh Tô Hiệu akhan, hăm trong hŏk pơhrăm lơ lou, đe hơ ioh hlôi đei tơplih hơ iă kơtang bơih: “Đe kon tôch hưch hanh păng hơmet ăn năr pơgơ̆r STEM, năr ayơ brŏk đơ̆ng hŏk jei tơroi năr ou kon chhuơ̆ rup, năr ou kon đei pơhrăm hơsuang hăm rim kô, ĭnh chang dêh, hăp tep ưh kơsŏk kơna mĕ ƀă jei pơngơ̆t, hiôk chơt hăm kon.”

Kiơ̆ đơ̆ng yă Đoàn Thị Tuyết Yến, Kơdră chĕp pơgơ̆r Hnam trưng jăl kơđeh Tô Hiệu, hnam trưng đei vă jê̆ 1.200 ‘nu hŏk tro, lơ̆m ou đei lơ oh ‘noh bơngai kon kông, dôm tơdrong pơgơ̆r ou pơjing đei jơ ‘năr đe oh chă tơƀơ̆p dih băl, hŏk pơhrăm dih băl, pơtho tơbăt dơ̆ng dôm tơdrong hlôh vao hơ iă, vei kơ jăp păng lang să tơdrong oei sa juăt joe sơ̆ ki ‘lơ̆ng liĕm: “ ‘Nou ưh khan tơdrong pơgơ̆r hmă đĕch ôh mă lei oei jing jơ ‘năr vă đe oh ƀôh hơdăh, đei chă tơchăr păng pơm kiơ̆ dôm tơdrong đei hŏk pơhrăm STEM vă pơjing dơ̆ng dôm tơmam drăm, trong pơgơ̆r joh ayŏ kơ bơngai  Ê Đê, vă vei răk tơƀăk mong păng lang să dôm tơdrong oei sa ‘lơ̆ng rŏ sơ̆ ki kơ tơring”.

Tơ̆ Đăk Lăk, lơ hnam trưng jăl ƀar pêng hlôi pơgơ̆r tơdrong băt hlôh ƀôh hơdăh dôm tơdrong oei sa joăt joe ‘lơ̆ng rŏ sơ̆ ki kiơ̆ lơ trong pơgơ̆r phara dih băl. Mưh đei vang pơjing, hơlen băt vao păng tơbăt dih băl, rim đe oh băt hlôh ƀôh hơdăh tôm tơdrong đơ̆ng noh pơm ăn jơhngơ̆m đon hưch hanh hơmanh bơnê, đei jơhngơ̆m đon vei răk tơƀăk mong dôm tơdrong gĭt kăl oei sa ‘lơ̆ng rŏ kơ pơlei pơla. Dôm trong ou vă tơdrong oei sa juăt joe sơ̆ ki hơnơ̆ng đei vei kơjăp, lang să lơ̆m kon pơlei pơla.