Pơmai Nguyễn Thuý Linh, tơ-'ngla anih jang Coffee & homestay Hoa Sứ tơ̆ thôn Hữu Đức, xah Phước Hữu, dêh char Khánh Hoà oei pơrŏ 2 lăm oei ăn tơmoi truh tơmang pơhiơ̆ lơ̆m lêh akŏm Katê. Anih jang pơdah dơ̆ng tơmam drăm kăp gĭt kơ tơring nhen: Đak măm, tơdrô vang plei rơmu, 'nhĕm kơpô sơ̆k tŏ, iĕr rong păng dôm tơmam drăm đơ̆ng che tanh Chăm noh kơdŭng, ao khuak ou to.

Vă pơjing đei tơdrong chơt hơ-iă ăn năr akŏm Katê, xah Phước Hữu hlôi hơvơn jê̆ 300 hŏk tro, sinh viên, đe hơdruh tơdăm păng đe drăkăn truh đơ̆ng dôm thôn lơ̆m xah vang akŏm lơ̆m khul hơsuang pơlei pơla. Mă tŏ 'mi kial ưh đei sơđơ̆ng mă lei tơdrong pơhrăm tơ̆ cham đă ƀŏng lŏng thôn Hữu Đức adoi hơnơ̆ng hăt hot. Pơmai Nguyễn Thuý Linh ăn tơbăt:  "Lơ̆m dôm năr ou ki, đe pơmai oh drăkăn lơ̆m thôn akŏm pơ-'nguaih cham char păng rim jăl trong lơ̆m pơlei, oei đe hŏk tro kơdih hơmet tơdrong hŏk pơhrăm vă kơsơ̆ noh akŏm pơhrăm joh ayŏ, truh năr Katê vang akŏm lơ̆m khul hơsuang sơng Y trang. Oei tơ̆ rim unh hnam adoi hơmet pơrŏ hnam oei, hơmet ƀanh kĕo, plei 'long xa, mă kăl noh ƀanh juăt jue kơ bơngai Chăm. Atŭm hăm noh, ƀôh lơ pơlei bơngai Chăm nai adoi pơhrăm khul hơsuang tơ̆ pơlei, lơ̆m noh đei tơdrong hơtŏk pơm 'nao dôm tơdrong hơri hơsuang, lăng hiôk dêh. Dôm sơnăm hơdrol ki hơdrô̆ đei minh ƀar pơlei đĕch, sơnăm ou noh kơdrơ̆m hloh".

Atŭm hăm pơhrăm joh ayŏ kơdŏ suang, dôm năr ou ki, rim bơngai jang lơ̆m Hơp tak xah man Lơ̆n Chăm Bàu Trúc akŏm vă pơm tơlĕch đei lơ tơmam drăm lơ̆n tơtom 'măn ăn tơmoi truh tơmang lơ̆m pơyan Katê ou.

Ƀok Phú Hữu Minh Thuần, Kơdră Hơp tak xah man Lơ̆n Gốm Chăm Bàu Trúc, xah Ninh Phước, dêh char Khánh Hòa ăn tơbăt, dang ei rim năr đei hloh 1.000 'nu tơmoi truh tơ̆ pơlei lơ̆n Bàu Trúc chă tơmang lăng, hơlen băt păng răt yua. Sơnăm ou, hơp tak xah hlôi khĭn asong pơjing dơ̆ng anih 'măn pơdah tơmam drăm lơ̆n Chăm Bàu Trúc. Tơdrong ming man ưh hơdrô̆ jing anih 'măn tơroi gah dôm tơdrong hơgei lơ̆m man lơ̆n juăt jue mă oei jing anih akŏm joh ayŏ Chăm kăp gĭt, tơguăt akŏm tơbang hloi brŏ kon kông, tơdrong joh ayŏ juăt jue, tơgŭm ăn tơmoi hlôh vao hơdah hloh gah tơdrong hơrih, khôi juăt kră sơ̆ păng hơdrin vei răk tơƀăk mong joh ayŏ kăp gĭt kơ kon pơlei Chăm. Ƀok Thuần ăn tơbăt dơ̆ng: "Sơnăm ou tơmoi kơdrơ̆m hloh, kơyuơ noh mă Hơp tak xah pơm dơ̆ng hnam 'măn pơdă tơmam drăm ăn tơmoi chă tơmang lăng lơ̆m pơyan Katê ou. Mưh đe tơmoi 'meh chă băt noh đei bơngai chă tơroi tơbăt, hơlen lăng adoi chă reh pơdah brŏ juăt jue kơ bơngai Chăm ăn tơmoi tơmang lăng. Ah mă dêh char Khánh Hoà pơtơm đei tơ-iung pơjing noh tơpă kơsô̆ tơmoi truh lơ hloh, kơlih tơroi tơbăt tơroh hăm dêh char  Ninh Thuận so păng dêh char Khánh Hoà 'nao, kơyuơ noh mă tơdrong pơlan să jơ̆p jang hloh".

Oei tơ̆ dêh char Lâm Đồng, lơ̆m dôm năr ou, rim anih gru grua so sơ̆ nhen: Anih soi ƀlŏk Pô Nit tơ̆ xah Bắc Bình, anih soi ƀlŏk Pô Klaong Mơ-nai tơ̆ xah Lương Sơn, Anih 'măn pơdah tơdrong kăp gĭt kơ Unh hnam pơtao Chăm tơ̆ xah  Hồng Thái, kon pơlei hlôi hơmet pơ-'nguaih cham char păng kơtol hla kơ teh đak tơ̆ rim unh hnam. Mă kăl, tơ̆ kơthôt Pô Sah Inư tơ̆ phương Phú Thuỷ, dêh char Lâm Đồng gô đei 9 xah kon pơlei Chăm truh akŏm hăm lơ tơdrong joh ayŏ kơdŏ suang đei pơgơ̆r noh: Pơdah hlôm klel Saranai, pơlong peh ƀa, pơlong klưng bô̆i đak yak hloh tơmam pơgăn, pơsuh klŭ măt chă teh gŏ lơ̆n păng pơdah tơdrong man lơ̆n juăt jue, tanh brai Chăm, mă kăl noh đei anih akŏm pơdah tơmam drăm xa Chăm.

Ƀok Trần Đức Dũng, Kơdră Jơnŭm vei lăng Anih gru grua kơthôt Pô Sah Inư ăn tơbăt: “Tơdrong jang chă hơmet dang ei adoi vă keh đang tôm bơih. Sơnăm 2025 jĭ sơnăm mă blŭng mă lêh akŏm Katê đei pơgơ̆r đơ̆ng rŏng kơ dêh char Lâm Đồng 'nao đei tơ-iung pơjing. Dôm tơdrong akŏm nai kơ lêh akŏm adoi kiơ̆ khôi juăt păng tơdrong lui kơ kon pơlei Chăm, hlôi đei hơmet păng pơgơ̆r đơ̆ng đunh sơ̆ tơ̆ anih gru grua kơthôt Pô Sah Inư. Atŭm hăm noh, nhôn adoi pơgơ̆r minh ƀar tơdrong jang kăp gĭt vă pơchơt 'măn ăn tơmoi truh tơmang lăng, hơlen băt”.

Katê jĭ lêh akŏm juăt jue rim sơnăm kơ kon pơlei Chăm. 'Nou ưh hơdrô̆ jing 'măng vă bơngai Chăm tơbang đon bơnôh hmach bơnê kơ yă ƀok dơnơm, pôk bơnê kơ yang hơpang, mă oei jing tơdrong pơtih kăp gĭt ăn tơdrong joh ayŏ, đon lui păng tơdrong tơguăt tơguăl pơlei pơla. Kiơ̆ rim pơyan akŏm, dôm kơjă joh ayŏ kăp gĭt kơ bơngai Chăm pơtoi đei vei răk, tơpăr jơ̆p jang hloh, tơgop pơm hơtŏk um rup joh ayŏ kăp gĭt kơ dêh char Khánh Hòa păng Lâm Đồng. 'Nou adoi jĭ trong hiôk vă tơbang joh ayŏ Chăm truh hăm tơmoi lơ̆m păng 'nguaih kơ teh đak, tơgop hơtŏk jang tơmang pơhiơ̆ kơ rim tơring gơh kơjăp sơđơ̆ng hloh.