Tơ̆ Kŏng ty Tơmơ̆t jên jang ming man Hnam tih kơjung Thái Bình (Hơnih sơdrai Quy Nhơn) hơnih đei vă jê̆ 30 tong gre điên tơmang pơhiơ̆ tơ̆ Quy Nhơn, bơ̆ jang dăr lăng, hơmet ming pơ ‘lơ̆ng đei tơlĕch jang kơtang. Ƀok Hồ Thanh Khiết, Kơdră chĕp pơgơ̆r hơnih jang tơbăt, đĭ đăng gre jei đei dăr lăng hơlen tôch kơ brĕ vă tơtom ƀôh, hơmet pơ ‘lơ̆ng hư răm, sơđơ̆ng ‘lơ̆ng hơdrol vă pơvih pơvăn ăn tơmoi.“Kŏng ti hlôi pơjing 1 khul ming hơmet. Mưh gre hư ‘noh tơroi ăn hloi vă Kŏng ty ăn khul jang hơmet năm ming hơmet lơ̆m năr hloi. Tơdăh ming hơmet ưh kơ gơh ‘noh ăn gre ‘noh pơdơ̆h chă chơ tơmoi hloi păng ăn gre nai tơplih ăn. Tơdrong sơđơ̆ng găh gre ‘noh ling lang dăr lăng hơlen ŭnh hơdăh, phen gre ‘nou jĭ ƀar tơdrong kăl hlŏh lơ̆m sơđơ̆ng gre kơdou”.

Tơ̆ rim hơnih jang gre tih tơdrong jang kiơ̆ trong dăr lăng hơlen kih thuơ̆t gre điện jei đei tơlĕch jang kơtang. Ƀok Lê Hùng Thịnh, Kơ iĕng Kơdră chĕp pơgơ̆r Hơnih sơdrai Kŏng ty Sun Taxi tơ̆ Bình Định tơbăt, tơdrong dăr lăng hơlen gre đei tơlĕch jang hơnơ̆ng rim năr păng chă hơlen ming hơmet kiơ̆ khei ‘năr pơkăp.“Lơ̆m jơ ‘năr bơ̆ jang pơvih pơvăn ăn tơmoi rim năr, mưh ‘nhŏng oh năm jang tơplih dih băl jang, sơng iŏk gre ‘noh jei đei khul jang kih thuơ̆t hơnih ming hơmet, khul chĕp pơgơ̆r lăng hơlen găh gre. Hăm tơdrong hơlen ming hơmet gre kiơ̆ khei ‘năr pơkăp ling lang chă hơmet ming bơ̆n phen, ‘long vơ̆r păng rim tơmam anai. Khul jang hơmet gre hơnơ̆ng jang prăt măng prăt năr vă tơtom ming hơmet tơdăh đei gre hư vă pơm sơđơ̆ng ăn gre kơdou”.

Hăm khul vơ̆r gre, tơdrong sơđơ̆ng ăn tơmoi jing tơdrong kăl hloh. ‘Nhŏng Phan Tấn Duy, mĭnh ‘nu bơngai vơ̆r gre điện chơ tơmoi tơmang pơhiơ̆ tơbăt, hơdrol vă lĕch đơ̆ng hơnih jang, bơngai vơ̆r gre lăng hơlen ri tơdrong kih thuơ̆t păng chă pơkă ăn tơmoi pơm kiơ̆ ƀlep tơdrong tơchơ̆t sơđơ̆ng. ‘Nhŏng Phan Tấn Duy tơbăt:“Hơdrol vă kơdou ‘noh bơngai vơ̆r gre kăl lăng hơlen mă brĕ găh ŭnh, jơ̆ng gre, lôp gre; tơdăh sơđơ̆ng ‘noh ‘noh mă ăn gre kơdou. Lơ̆m jơ chơ tơmoi ‘noh hơnơ̆ng chă pơkă athei tơmoi chă ƀăk tơlei mă ‘lơ̆ng, tơ oei mă ‘lơ̆ng lơ̆m gre adoi nhen ưh kơ chơ lơ bơngai vă sơđơ̆ng trong nơnăm 'noh kăl hloh”.

Hrei ou, lơ̆m dêh char Gia Lai đei 3 hơnih jang gre chơ tơmoi hăm gre điện akŏp đei 119 tong gre. Kiơ̆ đơ̆ng hơnih bơ̆ jang vei lăng gre nơnăm dăr lăng hơlen, rim hơnih jang jei đei hla bơar ăn asong jang păng dôm gre sơđơ̆ng ‘lơ̆ng hơ iă ƀlep tơdrong tơchơ̆t sơđơ̆ng kih thuơ̆t. Tơdrong iung jang lăng hơlen kơdih, hơmet ming pơ ‘lơ̆ng gre ưh khan lăp tơgop pơm sơđơ̆ng dơ̆ng kơjăp ăn tơmoi mă oei pơm hơtŏk bơ̆ jang ‘lơ̆ng pơvih pơvăn, pơjing đei tơdrong ‘lơ̆ng hơ iă ăn tơmang pơhiơ̆ kơphô̆ đak dơsĭ Quy Nhơn lơ̆m khei ‘năr kăl hloh truh ou kơnh.