Hăm hloh 5,3 triu bơngai Việt tŏk bŏk oei hơrih păng pơm jang tơ̆ teh đak đe, năr Soi ƀlŏk kơ Ƀok Dơnơm Hùng Vương jĭ “khei năr mah” vă tơrĕk kơ tơm a la chă. Vei sơđơ̆ng đon lui soi ƀlŏk kơ Hùng Vương tơ̆ teh đak đe jing vei răk tơƀăk mong tơdrong joh ayŏ Việt, tơgŭm đe sơnăm mơlôh tơ̆ teh đak đe ưh hiơt tơm a la chă kơdih po.

Đơ̆ng sơnăm 2015, Tơdrong tơlĕch jang Năr Soi ƀlŏk kơ Ƀok Dơnơm Việt Nam lơ̆m kơpal teh đei pơgơ̆r hlôi tơroh kon pơlei Việt tơ̆ lơ teh đak vă atŭm pơgơ̆r Soi ƀlŏk kơ Yă Ƀok Dơnơm kiơ̆ khôi atŭm. Năr Soi ƀlŏk kơ Ƀok Dơnơm Việt Nam lơ̆m plei teh jĭ tơdrong akŏm joh ayŏ kăp gĭt, ưh hơdrô̆ hăm kon pơlei Việt Nam tŏk bŏk oei hơrih, hŏk pơhrăm, păng pơm jang tơ̆ teh đak đe, hơtŏk tơdrong tơbôl rơngei hiôk hian đơ̆ng Việt Nam păng bôl buăl apŭng plenh teh...

Truh dang ei, tơdrong tơlĕch jang hlôi tơroh trư̆k tuyê̆n soi ƀlŏk kơ Yă Ƀok Dơnơm păng pôk pơ-ư kơ kon sou Pơtao Hùng tơ̆ jê̆ 50 teh đak lơ̆m 5 tơring teh, hơtŏk tơguăt kon pơlei Việt lơ̆m kơpal teh, atŭm hăm noh tơbang um rup Việt Nam truh hăm bôl buăl apŭng plenh teh.

Lơ̆m tơdrong grasia kăp gĭt, kon pơlei Việt Nam tơ̆ dêh char Udon Thani, tơring Hlĕch Tu Thái Lan, hlôi kăp gĭt pơgơ̆r Soi ƀlŏk kơ Ƀok Dơnơm Hùng Vương. Ƀok Lương Xuân Hòa, Kơdră Jơnŭm bơngai Việt Nam dêh char Udon Thani sơkơ̆t hơdah tơdrong hơpơi 'meh đơ̆ng kon pơlei hơrih xa tơ̆ ou: "Sơnăm mă yơ nhôn adoi pơgơ̆r soi ƀlŏk thoi ou vă kon sou hơnơ̆ng ƀlŏk hơdơ̆r kơdih po 'noh kon sou Ƀok Pơtao Hùng. Mă rơneh păng tih vơ̆ tơ̆ teh đak Thái, mă lei sĕch pham Việt Nam hơnơ̆ng oei plei nuih, păng nhôn ling lang tơrĕk truh kơ pơlei pơla yă ƀok dơnơm"

Răk vei kơjă kăp gĭt Soi ƀlŏk kơ Ƀok Dơnơm Hùng Vương ưh hơdrô̆ pơdơh ah tơdrong pơgơ̆r khôi soi tơbeh kăp gĭt mă oei jing tơdrong vei răk, tơƀăk mong đon bơnôh băt 'mêm kơ teh đak păng tơdrong tơguăt tơguăl lơ̆m rim bơngai Việt. 'Nou jĭ tơm a la chă kơ jơhngơ̆m pran, jĭ um ai joh ayŏ vă kon pơlei Việt Nam yak kơjăp jang hơdoi mă ưh đei tơklah. Mă oei hơrih tơ̆ tơring ayơ, kăl băt truh năr 10 khei 3, oei soi ƀlŏk kơ Ƀok Pơtao Hùng, noh đon bơnôh kon pơlei adoi hơnơ̆ng oei đei vei, tơguăt kon pơlei Việt jing minh tơpôl tơnăp kơtang, tơguăt tơguăl.