Hơlen vei lăng pơkao tơ̆ hơnăp hnam, mŏ Y Doan roi tơbăt, hơmet ăn năr Lêh Quốc khánh 2/9, bơngai Xơ Đăng oei tơ̆ Kon Jong hlôi hơmet tôm dôm tơdrong hiôk vă sơng tơmoi tơmang lăng. Iŏk đơ̆ng jang hơdai pơjing Hơp tak xăh Choh jang sa pơvih pơvăn, tơmang lăng Ngọk Réo, kon pơlei hlôi băt vei lăng hơnih cham char ‘lơ̆ng, hơtŏk tơdrong oei sa ‘lơ̆ng hơiă đơ̆ng sơ̆ nhen tôn chĭng chêng, hơri brông, hơtŏk tơiung tơdrong jang pai pơđih tơdrô, tanh brai vai khăn, pơm pai dôm tơmam sa kon kông... pơyua ăn tơmoi tơmang lăng. Mŏ Y Doan chhôk hơiă tơroi:

 “Nhôn hlôi hơmet ăn tôm găh tơdrô ge, dôm tơmam sa joăt joe, đak nhă ăn tơmoi truh tơ̆ âu tơmang lăng vă et sa. Nhôn ling lang pơvih tôm vă tơmoi đei ngôi pơchơt ‘lơ̆ng lơ̆m năr lêh Quốc khánh 2/9 mă chơt hơiă hloh, vă đơ̆ng rŏng âu tơmoi ƀlŏk kơ nhôn, tơmoi hlôi truh tơ̆ âu 1 ‘măng, đang kơ ‘noh gô truh tơ̆ âu ‘măng mă 2 ‘măng mă 3 dơ̆ng....”

Sơng chơt hơiă tơmoi tơmang lăng, mŏ Y Hoa kŭm hăm dôm mŏ oh lơ̆m pơlei hlôi pơrŏ hơmet ‘lơ̆ng hơnih tĕch tơmam lăng jơ̆ng ti tơ̆ hơnih tơmang lăng thong Đắk Lôi. Tơ̆ âu đei lơ tơmam OCOP kơ tơring, nhen đak sut kơdrot, tơƀăng kro, cheh phe... păng mă loi ‘noh jĭ tơdrô ge joăt joe - 1 tơmam ‘lơ̆ng tơ̆ Kon Jong. Mŏ Y Hoa roi tơbăt, blŭng a mŏ pai pơđih tơdrô ge vă tĕch ăn kon pơlei lơ̆m tơring. Đơ̆ng rŏng ‘noh roi lơ bơngai răt kiơ̆ lơ̆m mạng tơpôl, đang kơ ‘noh hơnih tơmang lăng pơih pơm pai tơdrô ge jing 1 tơdrong jang pơm iŏk yua ăn lơ drŏ kăn lơ̆m pơlei. Mŏ Y Hoa, bơngai pơgơ̆r grŭp jang hơdai pai pơđih tơdrô ge Kon Jong, chơt hơiă roi tơƀôh: tơdrô pơm đơ̆ng phe tơh tơyông yua đơ̆ng kon pơlei pơtăm, yua ƀuih đơ̆ng hla bri, ăn ƀâu phu ‘lơ̆ng pơm soai jơhngơ̆m bơngai:

“Vă pơvih pơvăn ‘lơ̆ng ăn tơmang lăng, ĭnh pơm pai tơdrô ge kiơ̆ trong vei răk ƀâu joăt joe hai, vei sơđơ̆ng rơgoh ‘lơ̆ng tơmam sa hai, đei hla ar pơklep, tơpu lăng ‘lơ̆ng. Đơ̆ng năr pơm tơlĕch tơdrô ge ĭnh ƀôh sư ưh khan lăp hơnhăk ăn kơjă mŭk drăm, đơ̆ng noh sơng đei đe mŏ oh lơ̆m pơlei vang jang pơm pai tơdrô ge. Nhôn hlôi pơih să teh pơtăm ƀa tơh tơyông ‘noh jĭ tơmam vă pai pơđih tơdrô ge pơvih pơvăn ăn tơmoi tơmang lăng”.

Hơnih thong Đăk Lôi, xăh Ngọc Réo, đei tơmo tih, 2 păh bơnơ̆ ‘long bri gip gap, ‘năr hiôk ‘lơ̆ng, rơngơp prăt sơnăm, hơnih ‘lơ̆ng rŏ. Hơnih âu hlôi đei khŭl kơdră chĕp kơ̆l tơring chĕng hơmet teh jing hơnih tơmang lăng tơpôl. Hăm tơdrong tơgŭm đơ̆ng teh đak, kon pơlei vang hơdai băl pơjing Hơp tak xăh Choh jang sa pơvih pơvăn, tơmang lăng Ngọk Réo, pơm dôm jĭt pơsŭn hăm dôm tơmam đei kơtă, pơih kơdeng tơmam pơdă tĕch tơmam ‘lơ̆ng pơyua ăn tơmoi tơmang lăng. ‘Nhŏng A Thảo, Bí thư Chi bộ plei Kon Jong, roi tơbăt, tơmang lăng tơpôl tŏk bŏk pơih ăn trong năm ‘nao hăm bơngai Xơ đăng. Dang ei ‘noh Kơdră vei lăng Hơp tak xăh Choh jang sa pơvih pơvăn, tơmang lăng Ngọk Réo, ‘nhŏng A Thảo tơroi: jơnei tih hloh đơ̆ng tơdrong jang ‘nâu ‘noh jĭ tơgŭm kon pơlei tơplih răh đon tơchĕng, trong jang, đơ̆ng oei sa rim năr truh tơdrong jang mŭk drăm.

“Mă hơdăh nhen lơ̆m tơring lơ̆m pơlei, ĭnh pơgơ̆r ơng pơkao, ‘long pơm yơ̆p rơngơp păng asong ăn rim ŭnh hnam vă pơtăm tơ ter trong păng jih pơgar ŭnh hnam hloi. Tơ̆ thong Đăk Lôi kŭm pơvei hơnơ̆ng ‘noh hơpuih hơmet rơgoh, pơtăm ‘long, pơm pơsŭn păng apĭnh kơdră kơpal tơgŭm jên vă ming man anih jang kăl. Truh dang ei kon pơlei lơ̆m pơlei vang jang hơp tak xăh pơm tơmang lăng thong Đăk Lôi đĭ tŏk truh 20 ‘nu bơih”.

Truh tơmang lăng tơpôl thong Đăk Lôi năr lêh âu, tơmoi đei mơ̆t hơdai hăm cham char bri brăh, lăng joh ayŏ, sa tơmam sa joăt joe kơ bơngai Xơ đăng. Cham char bri brăh ‘lơ̆ng rŏ păng joh ayŏ ‘lơ̆ng hơiă tŏk bŏk tơgŭm bơngai Xơ Đăng tơ̆ Kon Jong, Ngọc Réo, Quảng Ngãi, ƀrư̆ ƀrư̆ đei tơdrong hơrih sa phĭ tơnŏ hiôk.