Găn ga lơ tơdrong hrat kơ khei năr dăr sơnăm, kơthôt Pô Sah Inư adoi oei dơ̆ng kơjăp nhen minh tơdrong bơ̆ng pang ăn kơ chăl hơrih, răk vei dôm kơjă kăp gĭt kơ joh ayŏ kon kông Chăm tơ̆ tơring teh Bình Thuận so, dang ei noh dêh char Lâm Đồng. Khei năr ou ki, atŭm hăm tơdrong vei răk tơƀăk mong mŭk drăm, dôm tơdrong akŏm hơlen băt gah joh ayŏ đei pơgơ̆r hơnơ̆ng, mă kăl noh lơ̆m khei lêh têt, khei pơdơh kơ hŏk, hlôi tơgop pơjing jơhngơ̆m pran 'nao ăn hơnih tơmang Gru grua kơthôt Pô Sah Inư. Tơmoi Nguyễn Anh Tuân, truh đơ̆ng dêh char An Giang ăn tơbăt: “Inh ƀôh dôm mŭk drăm so Chăm ou 'lơ̆ng tơpă, athei vei lăng mŭk drăm joh ayŏ ăn tôm kon pơlei Việt Nam đơ̆ng rŏng kơnh vă hơtŏk pơm jang đei jơnei 'lơ̆ng”

Gru grua kơthôt Pô Sah Inư, jĭ minh hơnih ming man, hơnih khop apinh kăp gĭt kơ kon pơlei Chăm oei đei răk vei 'lơ̆ng. Hăm tơdrong ming man kăp gĭt hloh, kơthôt Pô Sah Inư hlôi đei pơkăp jĭ Hơnih Gru grua kơ teh đak păng dang ei tŏk bŏk jĭ minh lơ̆m dôm hơnih tơmang pơhiơ̆  'lơ̆ng ăn tơmoi lơ̆m păng 'nguaih kơ teh đak.

Truh dang ei, tơmoi oei đei akŏm lăng tơdra hơsuang Apsara kơ bơngai Chăm. Dôm tơdra hơsuang atŭm hăm nơ̆r hơri, hrau atŭm hăm tơdra kơ tơmam tôn reh juăt jue kơ bơngai Chăm nhen: Hơgơ̆r ghinăng, hơgơ̆r paranưng, đing hlôm saranai… pơm ăn lơ bơngai mah wơch kơ đon. Atŭm hăm noh, tơmoi oei đei hơlen băt gah tơdrong jang man lơ̆n, tanh brai juăt jue kơ bơngai Chăm. Ƀok Bá Sinh Tý, Khul joh ayŏ kơdŏ suang juăt jue Chăm tơ̆ Pô Sah Inư ăn tơbăt: “Khul joh hơri Chăm pơm jang tơ̆ ou đunh bơih. Inh jang lơ̆m khul joh hơri ou vă chă reh tôn dôm tơmam tôn reh kơ kon pơlei Chăm, tơmoi đe lăp păng hưch hanh dêh. Tŏk tơ̆ kơthôt, tơmoi 'meh lăng dôm tơdrong hơri hơsuang kră sơ̆ kơ bơngai Chăm.”

Atŭm hăm tơdrong jang vei răk tơƀăk mong gru grua joh ayŏ kră sơ̆, dôm sơnăm tơjê̆ ou Jơnŭm vei lăng Hơnih gru grua kơthôt Pô Sah Inư hlôi akŏm hơtŏk tơdrong 'lơ̆ng vă 'măn pơdah păng hơtŏk dôm tơdrong hơlen băt 'măn ăn tơmoi, Pơmai Châu Thị Cẩm Tú, tơmoi truh đơ̆ng dêh char Vĩnh Long tơroi:  “Inh ƀôh hiôk dêh, păng ƀenh kơ yang grasia. Inh ƀôh yuh plenh păng kon bơngai tơ̆ ou 'mêm kơ tơmoi dêh. Kơdih inh păng unh hnam inh tơgĭt gah dôm tơdrong kiơ mă kơdih po đei tơmang lăng tơ̆ ou”.

Tơdrong tơguăt đơ̆ng tơmang lăng, hơlen băt chăl hơrih atŭm hăm tơmơ̆ng tơdrong joh hơri juăt jue hlôi tơgop pơjing đei tơmam drăm tơmang pơhiơ̆ akŏm đei um ai phara kơdih. Hơnih kơthôt Pô Sah Inư so sĕch tŏk bŏk jing hơnih truh akŏm kăp gĭt kơ chăl hơrih, joh ayŏ păng đon lui kơ kon pơlei Chăm lơ̆m tơring teh gah Hơlĕch Lâm Đồng, roi năr roi hơvơn đei lơ tơmoi truh tơmang lăng.