Pơma đam yoa Anih tơchĕng hơlen bri ‘long tơ̆ tơring đei tŏ ‘mi lơ (Tropenbos) pơgơ̆r, hăm tơdrong vang akŏm đơ̆ng dôm bơngai jang khoa hŏk, bơngai tang măt ăn dôm anih jang kơpal păng tơpôl jang chă tơmang lăng tơ̆ bri brăh lơ̆m tơring. 4 khul tơpôl vang truh hop akŏm iung pơma tơƀôh đon tơchĕng găh tơdrong jang tơiung ming bri tơklep hăm atŏk tơiung chă tơmang lăng păng iŏk đei lơ nơ̆r tơgop tôch lăp. Dôm bơngai tang măt akhan: Chă tơmang lăng tơ̆ bri brăh lơ̆m tơpôl ưh lăp tơgŭm vei lăng ‘lơ̆ng bri brăh đĕch mă oei pơm hơtŏk tơdrong arih xa, jang xa ăn kon pơlei dơ̆ng, mă loi ‘nŏh jĭ kon pơlei kon kông.

Găh tơring, ƀok Nguyễn Sơn Hưng, Kơdră Anih vei lăng tơdrong chă tơmang lăng, găh Anih vei lăng jŏh ayŏ kơ dŏ xoang, tơplŏng kơdâu păng chă tơmang lăng dêh char Đắk Lắk, tôch lăp đon hăm dôm nơ̆r tơblang găh tơdrong hơmĕng- tơdrong ‘lơ̆ng-tơdrong pơmat tat đơ̆ng tơiung ming dơ̆ng bri tơklep hăm chă tơmang lăng tơ̆ bri brăh, atŭm hăm ‘nŏh ăn tơbăt, Đắk Lắk gô đei tơdrong jang ‘nao ăn tơdrong ‘nâu vă sư gơ̆h đei yoa roi ‘lơ̆ng ƀiơ̆.