Yak hloh 35 sơnăm pơjing păng hơtŏk rơiung, Kâu lak ƀô̆ phĭn Rup drŏ kăn Hải Âu- pơbŭng hnam hơdai kơ đe drŏ kăn chă phĭn rup hơgei păng đei bưng ai lơ̆m khŭl joh ayŏ kơdŏ soang hlôi chih iŏk hăm dôm jơnei tôch kơ hơgei, lơ bơngai jang lơ̆m khŭl iŏk đei hơnăn gĭt kăl lơ̆m hơnih phĭn rup Việt Nam păng Apŭng plĕnh teh. Ƀlep ƀơ̆t tơbăt 35 sơnăm pơjing Kâu lak ƀô̆ Hải Âu ăn tơƀôh kơsâp hla ar rup đei hơnăn”: “Um ai tơdrong hơrih kơ dôm hơdrĕch kon kông Việt Nam”.

54 hlak rup tôch kơ ‘lơ̆ng tơƀôh tơ̆ ‘măng pơdă ‘măng âu ‘noh dôm rup ‘lơ̆ng đei rơih iŏk đơ̆ng 298 hlak rup kơ 25 ‘nu bơngai vang phĭn lơ̆m hla ar rup “Um ai tơdrong hơrih kơ dôm hơdrĕch kon kông Việt Nam”. Yă Nguyễn Hồng Nga, Bơngai jang lơ̆m Khŭl chĕp kơ̆l Khŭl bơngai joăt phĭn rup Việt Nam, Phŏ Kơdră Khŭl Phĭn rup pơlei tơm Hồ Chí Minh, Phŏ vei lăng phĭn rup Kâu lak ƀô̆ Hải Âu roi tơbăt:

“Vă đei đăi dôm rup in lơ̆m hla ar Um ai tơdrong hơrih kơ dôm hơdrĕch kon kông Việt Nam, Kâu lak ƀô̆ nhôn hlôi athei tơlĕch jang lơ̆m dang 2 sơnăm păng rơih iŏk đơ̆ng rơbâu hlak rup, vă rơih dôm hlak rup tơmơ̆t lơ̆m kơ sâp hla ar păng pơdă. ‘Nâu jĭ tơdrong jang tôch kơ hơnat, ‘măng âu đei 36 hơdrĕch kon kông nhôn tơmơ̆t rup lơ̆m hla ar ‘noh jĭ 1 tơdrong hơdrin tôch kơ tih. Yua kơ lơ̆m rim hơdrĕch kon kông ‘noh đei tôch kơ lơ kơtŏng, nhôn ‘meh hơnhăk đĭ đăng dôm hơdrĕch kon kông đơ̆ng tơring găh Tu truh Pơbăh, đơ̆ng tơring Tây Nguyên, tơring tơmăn truh tơring hơtăih hơtŏ, dôm hơnih mă nhôn hlôi năm truh lơ̆m prăt 35 sơnăm.”

Truh lăng tơ̆ ‘măng pơdă, kon pơlei đei lăng ƀôh tơdrong ‘lơ̆ng hơiă đơ̆ng bri brăh, kon bơngai păng tơdrong juăt jŏh ayŏ kơ dŏ xoang jơ̆p tơring lơ̆m teh đak kiơ̆ tơdrong lăng ƀôh, phĭn, čhơ̆ tôch hơlen đơ̆ng đe drŏ kăn phĭn rup tơ̆ câu lak ƀô̆ Hải Âu. Ƀok Nguyễn Trùng Nhị, tơ̆ pơlei tơm Hồ Chí Minh, akhan:

“Tơdrong trĕng lăng đơ̆ng đe mŏ oh tơ̆ kâu lak ƀô̆ phĭn rup Hải Âu ăn ƀôh tơdrong tơchĕng tôch hơiă găh bơngai kon kông, tôch gĭt kăl, sư hơnhăk ba lơ tơdrong juăt ‘lơ̆ng đơ̆ng sơ̆, tơdrong đei hơdrô̆ đơ̆ng rim hơdrĕch kon kông lơ̆m tơdrong juăt jŏh ayŏ kơ dŏ xoang atŭm kơ Việt Nam.

Oh Trà My, sinh viên hnam trưng Đăi hŏk Rmit, tơroi: 

 “Truh hăm ‘măng pơdă tơƀôh năr ‘nâu, inh tôch hơiă ƀôh lơ kơmâu ‘lơ̆ng rŏ, đĭ đăng um rup tă kơ ‘lơ̆ng ngăl. Kon bơngai đei phĭn tơƀôh ưh khan lăp găh muh măt đĕch mă đei hloi cham char, kon bơngai lơ̆m plenh teh, bri brăh păng kon bơngai lơ̆m chăl hơrih đe sư đei rơneh.”

Hơdai hăm tơdrong ming pơdă rup, Kâu lak ƀô̆ Hải Âu oei tơlĕch 1 păh jên đơ̆ng tĕch um rup, kơsơ̆p hla ar păng pơgơ̆r pơdă tơƀôh vă mong akŏm jên bơ̆ jang tơgŭm, vang tơgŭm ăn dôm bơngai ưh pŭn ai, đei tơdrong arih xa pơmat tat, bơngai răm đơ̆ng pơgang dioxin. ‘Măng pơdă “Um ai tơdrong hơrih kơ dôm hơdrĕch kon kông Việt Nam” pơih ‘măng mơ̆t lĕch mơ̆ng kơ dih vă tơ̆ Anih ‘măn răk tơmam Drŏ kăn Việt Nam vă pơgơ̆r truh đĭ ‘năr 15/10./.