Dôm nơ̆r pơre pơtơm noh hlôi jing juăt hăm lơ chăl bơngai kon kông Tây Nguyên lơ̆m dôm jĭt sơnăm kơ ou. Đei bơngai tơmơ̆ng kơplah năm jang mir, đei bơngai tơmơ̆ng lơ̆m kơplah hao gre năm trong hơtaih. 'Năr ou dôm nơ̆r pơre pơtơm noh pơtoi re ang lơ̆m kơmăi kơsô̆, pơtoi pơlei pơla hăm tơdrong kơtơ̆ng ang kơ teh đak.

Năr 1 khei 7 sơnăm 1993, tơdrong tơroi pơma nơ̆r ÊĐê kơ Rađiô nơ̆r pơma Việt Nam tơ̆ Tây Nguyên đei pơih rapor. Đơ̆ng rŏng kơ noh tơdrong tơroi pơma nơ̆r Jarai, Bahnar, Sê Đăng, K’ho, M’nông đei pơih rapor, jing buăl juăt kăp gĭt hăm kon pơlei kon kông lơ̆m tơring.

Vă gơh đei jơ pơnĭt pơih pơre nơ̆r juăt jue noh jing minh trong yak jang kăp gĭt gah chih akŏm nơ̆r, vei răk nơ̆r pơma kon kông. Lơ̆m khei năr blŭng chih akŏm tơdrong tơroi nơ̆r Jarai, bơngai chih akŏm tơdrong tơroi Nay Jet atŭm hăm khŭl jang ƀơm lơ tơnap tap. Lơ tơdrong chih gah khua hŏk, pơtho pơhrăm, jang pơgang, khôi luơ̆t dah mă dôm tơdrong đei ƀôh 'nao lơ̆m tơdrong hơrih pơlei pơla. Ưh đei nơ̆r pơma gah tơdrong juăt jang, hăm dôm nơ̆r tơbang gah đak kơ-ang dah mă nơ̆r pơma juăt jue lơ̆m tơdrong hơrih adoi kăl chơ chă, chih akŏm păng hơmet trŏ: “Lơ̆m tơdrong jang hloh 30 sơnăm tơguăt hăm nơ̆r pơma Jrai rapor lơ̆m Rađiô nơ̆r pơma Việt Nam, ƀơ̆t blŭng nhôn ƀơm lơ tơdrong tơnap tap. Kơlih nơ̆r pơma rim năr lơ̆m pơlei pơla ưh kơ mah ăn kơ nhôn chă chih akŏm, tơblơ̆ hăm nơ̆r Jarai, mă kăl 'noh dôm nơ̆r tơroi gah khua hŏk ki thuơ̆t. Nhôn chă apinh đe kră pơlei, bơngai hŏk jrŭ, apinh dôm bơngai băt kloh klĕch gah nơ̆r Jarai. Đei nơ̆r mă yơ 'noh chih akŏm lơ̆m hla bơ-ar hloi. Nhôn athei pơm jang đơ̆ng blŭng a hloi”.

Mưh nơ̆r pơma 'noh pơhngol kơ joh ayŏ 'noh chư chih jĭ hơnih vei răk đon ƀlŏk hơdơ̆r kơ rim hơdrung bơngai. Lơ̆m tơdrong tơplih gah kơmăi kơsô̆, dôm bơngai jang rapor pơre nơ̆r kon kông tơ̆ Tây Nguyên pơtoi ƀơm lơ tơnap tap 'nao. Lơ chư chih kăp gĭt lơ̆m chư kon kông Tây Nguyên ưh kơ đei lơ̆m ƀan phim kơmăi tĭnh teh nơ̆r. Tơdrong mă noh pơm tơnap tap ăn tơdrong chih akŏm, vei răk păng tơbang dôm tơdrong tơroi lơ̆m pơkăp mạng tơpôl. Vă pơ-'lơ̆ng tơdrong mă ou, rim bơngai jang chih akŏm păng đe kih sư gah kơmăi vi tĭnh hlôi hơlen pơjing đei chư iŏk hơnăn TaynguyenKey. Đơ̆ng 'noh tơdrong teh chư kăp gĭt lơ̆m ƀan phim kơmăi vi tĭnh ƀônh ƀŏ hloh: “Adoi tơ̆ Hơnih jang tơ̆ Tây Nguyên kơ Rađiô nơ̆r pơma Việt Nam đei đê tai khua hŏk mă blŭng, inh atŭm hăm ki sư Võ Ngọc Hiệp chih akŏm đê tai TaynguyenKey vă pơklaih tơnap tap gah chư chih kon kông Tây Nguyên lơ̆m ƀan phim kơmăi vi tĭnh; đơ̆ng rŏng kơ 'noh nhôn hlôi keh kong lơ̆m tơdrong hơtŏk nơ̆r chih kon kông lơ̆m website. 'Noh jing tơdrong ƀônh hiôk lơ̆m tơdrong chih chư kon kông Tây Nguyên lơ̆m kơmăi vi tĭnh”.

Đơ̆ng tơdrong kăl kơ tơdrong jang hơdah, lơ tơdrong hơlen chih akŏm đei iung jing nhen chih chư Tây Nguyên, hla bar tơblang Jarai - Việt, Việt - Jarai atŭm hăm dôm jĭt nơ̆r chih đei pơkăp hơdah. Dôm tơdrong jang ou mă ưh đei rơ-ông rơ-ang mă lei hlôi tơgop hơ-'nhăk chư chih, nơ̆r pơma kon kông Tây Nguyên gơh tơbang lơ̆m kơmăi kơsô̆, pơm trong hiôk vă đe sơnăm mơlôh gơh tơrĕk păng yua nơ̆r kon kông kơdih lơ̆m tơdrong hơrih hrei ou.

Atŭm hăm vei răk chư chih, dôm tơdrong tơroi pơma nơ̆r kon kông oei tơgop vei răk tơƀăk mong joh ayŏ tơdrong hơri bua kon kông Tây Nguyên. Lơ̆m rim tơdrong tơroi, nơ̆r chĭng chêng, nơ̆r chĭng klơk (T’rưng), Klông Pút, dôm tơdrong hơri kră sơ̆ dah mă dôm tơdrong hơ-'mon sơ̆ ki adoi oei đei răk vei păng pơtruh ăn bơngai mơ̆ng. Bơngai chih akŏm tơdrong tơroi Nhat Lisa – Phŏ Kơdră lăm jang Nơ̆r Kon kông – adoi jang kơdră Khŭl rapor pơre nơ̆r Xơ Đăng tơroi: Rapor pơre nơ̆r kon kông ưh hơdrô̆ tơroi gah kơtơ̆ng ang mă oei vei nơ̆r pơma, chư chih, vei răk tơdrong hơrih joh ayŏ kơ pơlei pơla lơ̆m hơnih rapor pơre nơ̆r. Vă hrip iŏk đei tơdra 'noh, lơ bơngai chih kơtơ̆ng ang, bơngai chih akŏm tơdrong tơroi hlôi yak găn lơ tơring kông krang hang nak, năm truh pơlei pơla hơtaih yaih, tơƀơ̆p đe ngê̆ 'lŏ kră kloh klĕch gah tơdrong joh ayŏ kră sơ̆: “Dôm tơdrong hơri brông, nơ̆r chĭng chêng jĭ dôm tơdrong kăp gĭt ưh đei kiơ gơh tơplih. Tơdrong hơri ang bang nhen kơdih klak klơm kơ pơlei pơla. Kơyua 'noh, tơdrong tơroi nơ̆r kon kông, ưh hơdrô̆ pơ-'lơ̆ng ăn tơdrong tơroi mă oei jing gơng tơroh vă hơ-'nhăk nơ̆r pơma gơh hram lơ̆m đon bơnôh kon bơngai. Nhôn chă yak truh lơ tơring, tơƀơ̆p đe ngê̆ nhơ̆n vă hrip nơ̆r dôm ƀai hơri brông, tơdra chĭng chêng so sơ̆. Phơ phŏ năm truh tơ̆ pơlei 'noh đe ngê̆ nhơ̆n năm jang tơ̆ mir, 'nhŏng oh nhôn pơtoi năm tơchă truh. Vă hrip đei ƀai hơri brông noh tôch kơ hrat 'mơ̆i pơtơm gơh hrip nơ̆r, mă lei nhôn hơnơ̆ng adrin tôch ai vă vei răk mă 'lơ̆ng”

Dôm nơ̆r hơri brông, dôm tơdrong hơ-'mon đei pơdjoi hăm ƀơ̆r dah mă hăm tơmam reh tôn juăt jue đei vei răk ưh hơdrô̆ 'măn ăn tơdrong tơroi mă oei tơgop vei răk tơƀăk mong joh ayŏ ăn kôn mon kon sou ning nai kơnh.

Lơ̆m tơdrong hơrih hrei ou, tơdrong vei răk nơ̆r pơma kon kông tŏk bŏk oei ƀơm lơ tơnap tap. Lơ̆m kơplah điê̆n thuăi thŏng minh, mạng tơpôl păng dôm tơdrong tơroi tơbăt hơtŏk kơtang, nơ̆r Yuăn roi năr roi đei pơma lơ. Tơ̆ lơ pơlei pơla Tây Nguyên, đei lơ đe sơnăm mơlôh adoi oei vao nơ̆r pơma kon kông kơdih mă lei ưh đei pơma lơ lơ̆m rim năr. Tơdrong mă noh pơm ăn lơ bơngai tơguăt dăp đon dăp bơnôh hăm joh ayŏ kon kông hơnơ̆ng pơngơ̆t kơ đon chă trong hơ-'nhăk nơ̆r kon kông vih hơlơ̆k tơjê̆ hloh hăm đe sơnăm mơlôh. Bơngai chih akŏm tơdrong tơroi H'Zawut, rapor pơre nơ̆r Êđê kơ Rađiô nơ̆r pơma Việt Nam jĭ minh lơ̆m dôm bơngai tŏk bŏk oei pơm jang tơdrong noh. 'Nguaih kơ tơdrong jang rapor pơre nơ̆r ÊĐê, sư oei chă chih akŏm hla bar đŏk 2 nơ̆r, pơih dôm lăm hŏk ăn kon pơlei păng dôm tơdrong jang 'măn ăn đe hơ-ioh lơ̆m khei phang pơdơh kơ hŏk: “Inh tơchĕng, bơngai jang rapor pơre nơ̆r kon kông hrei ou, ưh hơdrô̆ tơgop vei răk nơ̆r pơma mă athei pơm ăn nơ̆r pơma 'noh gơh pơyua hloh. Dôm tơdrong tơroi pơre nơ̆r tơgŭm ăn kơ nhôn tơjê̆ hăm kon pơlei, mă lei thoi 'noh adoi tam mă tôm ôh. Đei lơ đe sơnăm mơlôh vao nơ̆r ÊĐê mă lei ưh kơ 'meh pơma. Đei buăl gơh pơma mă lei ưh kơ pơ̆n. Kơyua noh inh hlôi chih akŏm hla bơ-ar kiơ̆ 2 nơ̆r, pơih lăm pơtho ăn đe hơ-ioh lơ̆m khei pơdơh kơ hŏk tơ̆ pơlei pơla. Kơdih inh 'meh iŏk tơdrong jang inh vă pơm trong hiôk ăn rim bơngai tơguăt tơjê̆ hloh hăm nơ̆r Êđê”.