Kơsơ̆p săch hơƀơ̆l jê̆ 500 hlak chih akŏm kơ dôm tơdrong juăt jue, đon bơnôh găn hloh tơnap tap, sơkơ̆t anih dơ̆ng kơ VOV, tơroi gah tơdrong plang đơ̆ng chăl kang ƀô̆, bơngai chih kơtơ̆ng ang, bơngai jang kih thuơ̆t păng sơkơ̆t hơdah trong hơtŏk tơ-iung lơ̆m chăl jang kơmăi kơsô̆. Atŭm năr, Lêh pôk Tơmam hơpah Nơ̆r pơma Việt Nam – Hơnglŏng khei 9 sơnăm 2025 đei pơgơ̆r, pôk hơpah ăn 38 tak phâm lơ̆m 6 tơdrong pơkăp ƀăo chĭ păng dôm tơdrong hơtŏk gah kih thuơ̆t.

Tơmam hơpah akŏm đei 85 tak phâm pơtruh pơlong, lơ̆m noh ƀăo in, ƀăo điên tư păng kơmăi kơsô̆ đei hloh 75%. Jơnŭm châ̆m hơlen hlôi rơih pôk 9 hơpah Mah, 11 hơpah Hu, păng 11 hơpah Kong. Dôm tơdrong jang hlôi sơkơ̆t anih dơ̆ng, đon lui kơ VOV lơ̆m tơdrong hơrih pơm jang ƀăo chĭ - tơroi tơbăt, atŭm hăm noh hơlêm hơtŏk tơdrong hơgei, tơplih 'nao lơ̆m khul bơngai jang ƀăo.