VOV4.Bahnar  -  Lơ̆m ‘măng hơbuh hli đơ̆ng pơrang jĭ COVID -19 ‘măng mă 4 âu, Đăk Lăk hlôi đei hloh 1300 ‘nu bơngai ƀơm jĭ COVID -19, jing dêh char đei kơsô̆ bơngai ƀơm jĭ lơ hloh tơring Tây Nguyên. Kơsô̆ bơngai ƀơm jĭ tŏk lơ rim năr, pơrăm truh tơdrong jang y tê̆ roi năr roi hlăm noh rim bơngai jang y tê̆, thây pơgang, ƀak sih athei pŭ lơ tơnap tap. Chŏng mă hăm rim tơdrong yơ, đe xư adoi kơ ‘nôh kơdâu kiơ̆ khei năr vă tơgŭm pơklaih pơrang jĭ. Lơ bơngai athei lê̆ tơdrong kơdih vă keh đang xơnong jang.

Tơ̆ anih pơkăp oei tơklăh Anih Pơtho vei xơđơ̆ng tơpôl kơ Hnam trưng Đăi hŏk Tây Nguyên, minh chơnang xoi ƀlŏk ‘nao đei bơ̆ vă pơmai Trần Thị Hương (rơneh xơnăm 1983) jang điu yuơng tơ̆ Hnam pơgang Y hŏk cổ truyên Đăk Lăk tŏk bŏk oei pơm jang tơ̆ âu xoi ƀlŏk kơ ƀă kơdih ‘nao lôch hơchăng ăh năr 1/9.

Đak măt jơjrơ̆k ăh pơmai adrô̆ xoi ƀlŏk kơ ƀă đơ̆ng ataih; Um rŭp groong ƀŭ tơ̆ pơlei pơla Nam Định adrô̆ ƀôh kiơ̆ um krao zalo lơ̆m điê̆n thoăi. Pơmai Hương hơpơi, pơrang jĭ COVID -19 dăh hrôih đei hơmet klaih, vă dăh vih tơ̆ pơlei pơla xoh plang hlôt nhang tơ̆ pơxat ƀă: “Pơdơh he âu ki inh pơkăp ‘nhăk kon hơ ioh vih ngôi hăm yă ƀok, kơlih bre yă ƀok adoi ‘lŏ kră, mă lei kơyuơ pơrang jĭ hơbuh hli noh ưh gơh vih, dang ei ƀok lôch hơdral dơ̆ng noh pơkă mă ưh đei pơm keh. ‘Meh vă rim bơngai atŭm tơpuh lê̆ pơrang jĭ vă xơđơ̆ng inh gơh chă vih plang hlôt nhang ăn kơ ƀă”

15 xơnăm pơm jang tơ̆ Khoa Xet ngĭm – Hơlen pơkăp um – Hơlen tơdrong gơh kơ Anih jang Hơlen pơrang jĭ dêh char Đăk Lăk, pơmai Nguyễn Thị Kim Tuyền hlôi ƀôh băt lơ pơrang jĭ hơbuh hăm kon bơngai. Chŏng mă truh ăh jang lơ̆m Khul tơchă akŏm kơsô̆ 3, jing khul jang tơm yuk hơlâu lơ̆m tơdrong jang tơjră pơrang jĭ Covid-19 pơmai pơtơm vao hơdăh tôm tơdrong hrat, tơdrong hli hlơt păng tơdrong plang ƀơ̆t iŏk xơnong năm jang.

Pơmai Tuyền ăn tơbăt, hloh 3 khei kơ âu, ăh pơrang jĭ COVID -19 tơ̆ Đăk Lăk hơbuh hli, ưh mơ̆ng bri kơmăng dăh mă kơ ‘năr, tơ̆ yơ đei bơngai ƀơm jĭ noh khul jang kơ pơmei năm tơchă akŏm hloi. Mă athei jang măng năr lơ̆m hơbăn ao hrŭk hlơp, mă lei xơkơ̆t tơdrong iŏk đak muh, pham vă xet ngĭm jing kăp gĭt hăm tơdrong jang tơjră pơrang jĭ, noh đe pơmai athei pơgenh rim jơ pơnĭt vă keh đang xơnong jang gơh tenh hloh. Tơdrong erih kơdih, xơnong pơm hơkăn, pơm mĕ noh lê̆ tơ̆ rŏng: “Găh jơ ‘năr phŏ pơgê, phŏ tong anê̆ măng athei năm. Lai yơ jang keh đang noh pơtơm gơh xŏng xa, phơ phŏ truh minh ƀar jơ pơgê pơtơm đei chă xa. Ăh pơgê ‘năr đơ̆ng rŏng duh ưh đei jơ vă chă pai xa, kơdih chă xa xăi ƀanh mi dăh mă nhă đak ƀlăng. Dang ei noh đei Zalo, ba krao, ba ƀôh um kon hơ ioh đĕch yơh, băt pơm thoi yơ. ‘Meh vă vei vêr kon hơ ioh păng klo gơh xơđơ̆ng noh ba athei pơm thoi ăi đĕch, păng kơyuơ kơ tơdrong jang dơ̆ng”

Đơ̆ng năr 15/8, ăh Khoa Truyền nhiễm kơ Hnam pơgang tơm tơring Tây Nguyên đei tơplih jing anih hơmet ăn bơngai ƀơm jĭ COVID -19 hlăm tơ̆ tơring Tây Nguyên, 21 ‘nu jang y tê̆, ƀak sih, điu yuơng păng bơngai jang kih thuơ̆t hlôi pơm jang lơ hloh adrol ki vă tơgŭm ăn bơngai gơh vei xơđơ̆ng tơdrong erih.

Ƀak sih chuyên khoa 2 Trịnh Hồng Nhựt, kơdră Khoa hôi sư̆k tơjră pơnhŭl, Iŏk hơlen Anih hơmet bơngai ƀơm jĭ COVID -19 hlăm tơ̆ Hnam pơgang tơm tơring Tây Nguyên ăn tơbăt, dôm bơngai ƀơm jĭ mơ̆t tơ̆ âu adoi đei lơ tơdrong jĭ nai păng tơdrong lôch hơchăng tôch kơ hli. Kơdăn tơdrong erih păng lôch noh hlơ hliak, đe thây pơgang kơ anih hơmet bơngai ƀơm jĭ COVID -19 hlăm hơnơ̆ng kơ ‘nôh rim pơnĭt, rim jơ khŏm mă iŏk jơnei lơ̆m tơdrong tơjră âu: “Nhôn chă tôm trong tơmam drăm păng jơhngơ̆m pran, tơdrong hlôh vao găh tơdrong jang hloi, đon bơnôh kơ thây pơgang vă vei xơđơ̆ng rim pơnĭt rim jơ ăn tơdrong erih bơngai jĭ vă đe yĕt klaih đơ̆ng lôch hơchăng”

Tơdrong jang tơjră pơrang jĭ Covid-19 oei đunh păng hrat hrĭn, dôm bơngai jang tơ̆ dôm anih tơm tơjră pơrang jĭ tơ̆ Đăk Lăk hơnơ̆ng oei kơchăng, hăt hot măng năr chơ chă bơngai ƀơm jĭ, vei xơđơ̆ng tơdrong erih ăn bơngai ƀơm jĭ păng kon pơlei. Đe xư jing dôm bơngai nuih mơng ‘lăn thĕng ‘nu ‘nŏ tơ̆ kơdrăn tơblăh ưh đei jơva phao kơtuang.

Lan chih păng pơre nơ̆r