VOV4.Bahnar - Hloh 2 xơnăm kơ âu, kâu lak ƀô̆ Kơyuơ đe hơ ioh 'mêm kơ eng tơ̆ apŭng Chư̆ Mgar, dêh char Dak Lak hlôi tơlĕch lơ tơdrong jang tơrĕk hăm đe hŏk tro hin dơnuh, tơnap tap tơ̆ tơring. Dôm tơdrong jang kăp gĭt kơ kâu lak ƀô̆ hlôi tơgop pơtho pơhrăm đe hơ ioh, tơgŭm jơhngơ̆m vă đe hơ ioh adrin hŏk pơhrăm tơnăp.

          Xơng iŏk tơmam axong ăn jê̆ đĭ xơnăm đei phe, đak toh păng minh ƀar tơmam 'măn hŏk pơhrăm, H'Yến Niê, hŏk lăm 8B, hnam trưng THCS Ngô Mây, xăh Ea Mdroh, apŭng Cư Mgar, chơt hơ iă kơlih tơmam axong âu tơgŭm mĕ ƀă da ƀiơ̆ kơ huach jên răt tơmam xa rim năr. Kơdih po oh đei dơ̆ng tơmam kăl vă hŏk pơhrăm. Kơsô̆ tơmam âu noh đơ̆ng tơdrong jang  “Tơgŭm jơhngơ̆m trong ataih”, kâu lak ƀô̆ Kơyuơ đe oh 'mêm kơ eng apŭng Cư M’Gar duh đei axong rim khei lơ̆m jê̆ 1 xơnăm kơ âu, hơtŏk jơhngơ̆m vă H’Yến roi adrin hloh dơ̆ng lơ̆m tơdrong hŏk pơhrăm: Khei năr âu ki, oh đei iŏk jên hŏk tơgŭm trong ataih, đei đe thây kô tơgŭm ăn rim khei tơmam 'nhăk pơtruh tơ̆ hnam. 'Nguaih kơ noh oh oei đei hŏk lăm 'mêm kơ eng, đei đe thây kô pơtho thêm môn toán, văn, anh, đei đŏk tơroi păng pơxuh pơchơt. Inh ƀôh xô̆ jơhngơ̆m, oh gô adrin hŏk pơhrăm tơnăp, lui ngua, mơ̆ng kiơ̆ nơ̆r mĕ ƀă vă thây kô ưh đei hĕl kơ đon.

          Tơgŭm jơhngơ̆m trong ataih jing tơdrong jang đei kâu lak ƀô̆ Kơyuơ đei oh 'mêm kơ eng apŭng Cư Mgar tơlĕch đơ̆ng blŭng xơnăm 2021 ăn hŏk tro tơnap tap păng hŏk tro kon kông lơ̆m tơring kơ apŭng. Kiơ̆ kơ noh, dôm bơngai jang lơ̆m kâu lak ƀô̆ gô tơroh, hơvơn rim anih jang 'mêm bơnat  “tơgŭm jơhngơ̆m” ăn minh hŏk tro đei tơdrong erih tơnap tap hăm trong tơgŭm jên hŏk rim khei lơ̆m khei năr đe oh năm hŏk, pơdui truh ăh đĭ jăl hŏk. Jên tơgŭm noh 240 rơbâu rim khei hăm minh 'nu hŏk tro jăl mầm non păng jăl kơđeh, 290 rơbâu hlj minh khei hăm hŏk tro jăl trung học cơ sở. Lơ̆m xơnăm 2021, kâu lak ƀô̆ hlôi tơguăt tơgŭm ăn 103 'nu oh, hăm kơsô̆ jên jê̆ 150 trĭu hlj.

          Kâu lak ƀô̆ duh đei lơ tơdrong vă jang nai tơguăt hăm hŏk tro kon kông nhen: Lăm hŏk 'mêm kơ eng pơtho thêm ưh kơ iŏk jên ăn hŏk tro, axong bơbe yŏng ăn unh hnam hŏk tro tơnap tap chă jang xa; pơtho glơi ưh kơ iŏk jên ăn đe hơ ioh, pơjing Hnam 'mêm kơ eng dăh mă axong Kơtuh săch lăm hŏk vă hơtŏk tơdrong đŏk hơlen ăn đe oh.

          Mă kăl, lơ̆m 'măng pơrang jĭ Covid-19 hơbuh hli mă 4, kâu lak ƀô̆ duh đei lơ tơdrong jang tơgŭm đe hŏk tro nhen tơdrong Săch yao khoa ăn oh dăh mă axong điê̆n thoăi tơgŭm hŏk trư̆k tuyê̆n. Oh H'Mít Knul, hŏk lăm 8B, hnam trưng THCS Ngô Mây, xăh Ea Mdroh, apŭng Cư Mgar, đei iŏk điê̆n thoăi thŏng minh păng sim 4G đơ̆ng tơdrong jang axong ăn tơroi:  Lơ̆m khei năr âu ki noh oh đei iŏk minh pôm điê̆n thoăi vă hŏk online. Điê̆n thoăi tơgŭm ăn kơ oh hŏk tơnăp hloh. Oh hmach bơnê kơ đe thây kô păng met ma 'mêm bơnat hlôi tơgŭm ăn kơ oh gơh hŏk pơhrăm tơnăp hloh păng ning mônh kơnh tih vơ̆ oh hơpơi gô đei tơdrong jang xơđơ̆ng vă tơgŭm ăn đe hơ ioh hin dơnuh nhen inh hrei âu.

          Đei tơ iung pơjing đơ̆ng khei 8 xơnăm 2019, Kâu lak ƀô̆ Kơyuơ đe hơ ioh 'mêm kơ eng lơ̆m Hô̆i đŏng đô̆i apŭng Cư Mgar păng jing bơngai jang lơ̆m Khul jang 'mêm bơnat kơ teh đak tơ̆ tơring Tây Nguyên (lơ̆m Anih jang 'Mêm bơnat kơ teh đak, Trung ương Đoan). Kâu lak ƀô̆ dang ei đei 32 'nu jang, rim 'nu minh tơdrong jang mă lei đei atŭm minh đon pơkăp noh vei lăng, pơtho pơhrăm đe hŏk tro tơ̆ tơring tơnap tap. 'Nhŏng Mai Văn Chuyền, pơtho tơ̆ hnam trưng THCS Ngô Mây, Kơdră Kâu lak ƀô̆ tơroi: Tơdrong tơnap tap kơ đe oh mưh đei glơng đơ̆ng rim bơngai, đơ̆ng jơnŭm tơpôl noh duh gô jing tơdrong tơm ăn đe oh ƀôh đei kơjă kơ tơdrong glơng tơgŭm đơ̆ng rim bơngai ăn đe oh, noh ning mônh kơnh âu gô jing minh ƀai hŏk găh đon bơnôh ăn đe oh erih lơ̆m khei năr anô̆ anăp kơnh. Lơ̆m khei năr truh hăm pơkăp păng xơkơ̆t pơm jang thoi âu noh kâu lak ƀô̆ tŏk bŏk tơrĕk dôm tơdrong jang kơjăp xơđơ̆ng, đunh đai păng đei tơdrong tơrĕk kăp gĭt hăm đe oh păng jơnŭm tơpôl, pơjing tơdrong tơgŭm đơ̆ng rim bơngai hăm tơdrong tơgŭm truh tơdrong pơtho pơhrăm păng hơtŏk kơ đe hơ ioh, mă kăl noh đe hơ ioh tơring ataih yaih, tơring pơxĕl pơxŏ.

          Lơ̆m xơnăm 2021, kâu lak ƀô̆ hlôi hơvơn đei jê̆ 1 tih hlj vă tơlĕch dôm tơdrong jang. Kiơ̆ đơ̆ng noh tơgŭm ăn kơ hrĕng 'nu hơ ioh păng hŏk tro đei xa yua. Pơmai Lý Thị Hồng Trị, Kơdră Anih jang 'mêm bơnat kơ teh đak tơ̆ tơring Tây Nguyên (lơ̆m Anih tơm jang 'mêm bơnat kơ teh đak, Trung ương Đoan) xơkơ̆t, âu jing minh lơ̆m dôm kâu lak ƀô̆ jang 'mêm kơ eng kơyuơ tơpôl gơh rơgei tơ̆ Dak Lak păng hlôi đei lơ tơgop kăp gĭt lơ̆m dôm tơdrong tơgŭm tang găn păng tơjră pơrang jĭ Covid-19, đei Trung ương đoan pôk hơpăh lơ̆m xơnăm âu ki: Kâu lak ƀô̆ kơ Mai Văn Chuyền noh tơnăp lơ̆m dôm tơdrong jang 'mêm bơnat. Tơ̆ âu noh bơngai pơtho mă lei đe boăl duh hăt hot păng dôm tơdrong jang kơ đe boăl adoi kăp gĭt, axong tơgŭm ăn hŏk tro. Pơtih nhen pơtho ăn đe oh hŏk tơjruh, unh hnam hin dơnuh ưh kĕ năm hŏk. Tơgŭm hla bar săch ƀơ̆t đe oh hơmet mơ̆t hŏk xơnăm hŏk 'nao, axong ao tơnŏ,  bảo hiểm y tế. Pơtho ăn đe hŏk tro tơ̆ tơring ataih yaih, ăn đe boăl hlôh vao hơdăh păng adrin găn hloh tơnap tap.

          Pơtôch xơnăm 2021, dôm bơngai jang lơ̆m kâu lak ƀô̆ Kơyuơ đe oh 'mêm kơ eng apŭng Cư Mgar akŏm pơm jang, atŭm pơma đam vă tơlĕch trong pơm jang 'mêm kơ eng lơ̆m xơnăm 'nao. Duh kơyuơ tơchơ̆t atŭm noh tơrĕk hăm đe hơ ioh tơring tơnap tap, kâu lak ƀô̆ pơtoi tơlĕch dôm trong jang kăp gĭt nhen axong theh bảo hiểm y tê̆ ăn hŏk tro tơnap tap, pơih lăm hŏk găh tơdrong hlôh vao ăn đe hŏk tro vă tơgŭm jơhngơ̆m pơtoi yak hadoi hăm đe oh. Gơnơm đơ̆ng noh, đei lơ hơ ioh đei iŏk tơgŭm, pơtoi jơhngơ̆m pran păng pơtoi hŏk pơhrăm, rong akŏm tơdrong hơpơi po, jing bơngai pơyua ăn unh hnam păng tơpôl.

Lan chih păng pơre nơ̆r