VOV4.Bahnar – Kơyuơ răm đơ̆ng pơrang jĭ Covid19,lơ anih jang mŭk drăm, unh hnam pơm jang tĕch pơdro lơ̆m tơring kơ dêh char Đăk Lăk athei tơjră hăm lơ tơnap tap. Pơm jang tĕch pơdro kơ lơ anih jang mŭk drăm jing tơhlăk tơhlĭn, ưh đei yua. Anih mong jên Choh jang xa Hơtŏkt ơ iung tơring pơxĕl Đăk Lăk (Agribank jang tơ̆ Đăk Lăk) jing minh lơ̆m dôm anih mong jên hlôi pơm kiơ̆ pơkăp pơdui hre, tơjur jên cheh tŏk iŏk tơgŭm ăn bơngai jang da ƀiơ̆ tơnap tap. Mă lei anih mong jên teh đak kăl hơmet tơchơ̆t 03/ 2021 vă bơngai tŏk iŏk jên kĕ hơmet hơtŏk tơ iung choh jang xa.

          Unh hnam yă Nguyễn Thị Phơn, tơ̆ kueng 3 thĭ trâ̆n Buôn Trấp, apŭng Krông Ana đei 3 ha teh pơtăm tiu, ka phê, sâu riêng, păng 13 ha teh na pơtăm ƀa. Hăm 13 ha teh na, dôm xơnăm tơjê̆ âu yă Phơn adrô̆ jang minh pơyan ƀa đĕch, oei pơyan nai noh yă pơtăm ƀum ngô Nhâ̆t. Hăm trong jang âu, tơdrong pơyua hloh 2 ‘măng pơtêng hăm jang ƀa na 2 pơyan adrol ki. Dang ei yă Phơn oei hre kơ Anih mong jên Choh jang xa păng Hơtŏk tơring pơxĕl 2 tih hlj, kơsô̆ jên âu mă lơ noh răt hơdrĕch păng phŏng rei ăn ‘long pơtăm. Xơnăm âu kơjă phŏng rei tŏk kăp, đei kơloăi phŏng u-rê tŏk hloh 2 ‘măng pơtêng hăm xơnăm xơ̆. Mă lei tơmam choh pơtăm đei tơjur păng tơnap kơ tĕch tơlĕch.

Yă Phơn ăn tơbăt: unh hnam duh hlôi đei anih mong jên tơroi tơjur 10% jên cheh kơyuơ ƀơm răm đơ̆ng pơrang jĭ Covid - 19. Kiơ̆ kơ yă Phơn, choh jang xa kiơ̆ pơkăp pơm tơlĕch  tơmam drăm lơ̆m khei năr âu noh tơnap tap:  “Hơpăh bơngai jang noh ưh gơh akŏm lơ bơngai. Mă dang ei noh mir na unh hnam inh xă lơ. Phơ phŏ athei hơpăh bơngai jang truh pêng puăn jĭt ‘nu jang hloi. Pơrang jĭ thoi âu duh pơm tơnap ăn bơngai pơm jang ƀơ̆t năm jang ưh gơh akŏm lơ bơngai hli tơpoh pơrang jĭ”.

Khei năr âu ki lơ̆m tơring kơ apŭng Krông Ana, dêh char Đăk Lăk hơnơ̆ng pơm kiơ̆ pơkăp oei tơklăh lơ̆m tơpôl kiơ̆ Tơchơ̆t 15. Dôm unh hnam tĕch pơdro, anih pơm jang hadoi pơdơh kơ jang, bơngai jang ưh đei tơdrong jang. Lơ unh hnam pơngơ̆t kơ đon kơlih kon hơ ioh năm jang tơ̆ tơring nai chôt vih kơdâu kơ pơrang jĭ. Chŏng mă 60 ‘nu bơngai jang kơ Anih jang Nam Hà, xăh Ea Bông, apŭng Krông Ana duh oei đei tơdrong jang. Ƀok Trần Văn Thương, Kơdră Anih jang ăn tơbăt: jên khei kơ rim bơngai jang adoi oei đei đơ̆ng 10 truh 11 trĭu hlj minh khei. Mă lei ăh khei 8 âu ki, kơyuơ athei pơdơh kơ jang noh Anih jang Nam Hà tơhlăk akŏm hloh 1 trĭu minh puơ̆t tŏ găch. Tơnap tap, hre hrông ƀôh đang măt hloi. Pơtoi pơm jang păng vei xơđơ̆ng jên khei jang tơtom ăn bơngai jang lơ̆m khei năr âu jing minh tơdrong tơnap tap hloh:  “Inh tŏk iŏk đơ̆ng anih mong jên hăm kơsô̆ jên lơ. Anih mong jên adoi tơgŭm, tơjur ăn anih jang mŭk drăm găh jên cheh. Mă lei dang ei anih jang mŭk drăm duh tơnap găh tơdrong tĕch pơdro, noh anih mong jên hơlen pơkăp pơdui khei năr, dăh mă tơjur ƀiơ̆ jên cheh ăn anih jang mŭk drăm pơtoi pơm jang xơđơ̆ng tơdrong jang ăn ‘nhŏng oh iŏk pơm jang”.

Anih Axong jang Tĕch pơdro Thông Phát kơ bre klo hơkăn ƀok Đinh Văn Kháng đei minh khăch sạn tơ̆ anih ‘lơ̆ng tơ̆ trong Hùng Vương, plei tơm Buôn Ma Thuột. Adrol ki, tơmoi đơ̆ng jâ̆p tơring truh lang lap. Mă lei rim khei khăch sạn adrô̆ đei minh ‘nu jang gak ‘măng. Ƀok Kháng hmach bơnê hăm tơdrong tơjur jên cheh đơ̆ng Anih mong jên Choh jang xa păng Hơtŏk tơring pơxĕl tơ̆ Hoà Thắng, anih mă ƀok tŏk bŏk oei hre truh 6 tih hlj: “Đơ̆ng mă pơrang jĭ hơbuh hli noh hăm anih jang khăch sạn, tơmoi đe ưh đei truh lơ, noh pơm jang tơnap tap tap kơlih tơmoi ưh đei hloi. Găh anih mong jên hlôi đei tơdrong tơgŭm tôch tơnăp. Noh Anih mong jên tơroi ăn anih jang mŭk drăm đei tơjur jên cheh 10% hăm kơsô̆ jên tŏk iŏk”

Ƀok Vương Hồng Lĩnh, Kơdră Anih mong jên Choh jang xa păng Hơtŏk tơring pơxĕl dêh char Đăk Lăk ăn tơbăt: dang ei anih mong jên hlôi hơmet jên cheh ăn hloh 50 rơbâu ‘nu bơngai tŏk iŏk hăm jên hre 12.400 tih hlj, tơjur 10% ăn tŏk iŏk hăm tôm hla bar pơkăp. ‘Nguaih kơ noh, anih mong jên oei axong 30 rơbâu tih hlj mong ăn tơmoi jing dôm anih jang mŭk drăm păh lăp păng iĕ hăm jên cheh 7% 1 xơnăm.

Khei năr ki, tơdrong jang pơyua ăn tơpôl duh đei anih mong jên tơlĕch jang tơnăp, hlôi tơgŭm jơnŭm pơgơ̆r tơring hloh 5 tih 400 trĭu hlj, lơ̆m noh tơgŭm ăn hnam pơgang plei tơm Buôn Ma Thuột 1 tong gre kư̆u thương, păng dôm tơmam drăm y tê̆ đei kơjă 2 tih 950 trĭu hlj. Vă tơgŭm tơmoi tơrĕk hăm jên tơgŭm hơdăh, pơyua, ƀok Vương Hồng Lĩnh pơkăl:  “Lơ̆m tơdrong tơlĕch tơgŭm ăn bơngai tŏk iŏk noh Agribank tơ̆ Đăk Lăk hlôi đei minh ƀar tơdrong tơhlăk noh jing: Xơkơ̆t tơdrong mă bơngai tŏk iŏk ƀơm răm dang yơ đơ̆ng covid-19 vă kiơ̆ đơ̆ng noh tơjur jên cheh, vei xơđơ̆ng khul hre ăn bơngai tŏk iŏk oei pơxuơ̆k pơxuơ̆l, ưh đei bơ̆ng pang hơdăh. Mă ƀar, hre kơ Agribank tơ̆ Đăk Lăk gô pơtoi tŏk lơ, kơyuơ bơngai tŏk iŏk jên ƀơm răm đơ̆ng covid-19. Pơtruh nơ̆r hăm Agribank tơ̆ Đăk Lăk noh: Anih mong jên Teh đak hơlen pơdui khei năr kla hre ăn tơmoi vă pơklaih tơnap tap ăn bơngai tŏk iŏk hre da ƀiơ̆ tơnap hloh, hiôk hian hloh; hloh kơ noh dơ̆ng hơlen hơmet tơchơ̆t 03 xơnăm 2021 kơ anih mong jên teh đak găh hơlen dôm pơkăp axong tŏk iŏk đơ̆ng rŏng kơ năr 10/6/2020 ăn bơngai tŏk iŏk, vă đe hiôk hian hloh hơmet pơm jang tĕch pơdro đei yua hloh.

Lan chih păng pơre nơ̆r