VOV4.Bahnar - Tơ̆ Hà Nội, Hơnih jang vei lăng sơđơ̆ng pôk rơ̆ih kơdră tang măt Kuôk hô̆i jăl XV păng kơdră tang măt Jơnŭm vei lăng kon pơlei jăl jang 2021 - 2026 pơgơ̆r Hop akŏm mă 3 vă dăr lăng, lăng hơlen đĭ đăng tơdrong jang hlôi tơlĕch jang păng drơ̆ng minh nơ̆r trong bơ̆ jang kăl lơ̆m khei năr kơnh. Trung tướng Lương Tam Quang, Kơ iĕng Kơdră chĕp pơgơ̆r Dơnŏ anĭh tơm Kŏng ang, Kơdră Hơnĭh jang vei lăng sơđơ̆ng pơm tơm hop akŏm. Kiơ̆ đơ̆ng Hơnĭh au tơbăt, trŭh dang ei, bơ̆ jang hơmet ăn vei lăng sơđơ̆ng kơdră tang măt Kuô̆k hô̆i jăl XV păng Jơnŭm vei lăng kon pơlei, jăl jang 2021 - 2026 hlôi ‘lơ̆ng hơ iă ƀlep hăm trong tơlĕch jang. Tơ̆ hop akŏm, rim kơdră tang măt hlôi akŏm pơm hơdăh dôm tơdrong tơnap tap, tơhlăk tơhlĭn păng chă pơma dơnŭh pơdrơ̆ng kiơ̆ trong jang, tơdrong jang lơ̆m khei năr kơnh, tơgop pơm sơđơ̆ng ‘lơ̆ng hơ iă hăm tơdrong yan au; hơdrin đĭ jơhngơ̆m vei lăng sơđơ̆ng dơ̆ng kơ jăp lơ̆m tĕh đak, pơjing đei hơ yak kơ jăp iăp kơtang vă pôk rơ̆ih đei jơnei kơtang, ƀlep hăm trong tơlĕch jang.

Tơblơ̆ nơ̆r: Amazưt