VOV4.Bahnar - Pơgê brei, năr 19/3, tơ̆ Hơnih bơ̆ jang Khul kơdră Tĕh đak, Khŭl kơdră chĕp pơgơ̆r Dơnŏ anĭh bơ̆ jang tĕh đak tang găn jĭ Covid-19 hlôi akŏm pơma dơnuh găh trong jang gơ̆h jang kiơ̆ “hộ chiếu vaccine” lơ̆m khei ‘năr kơnh, tơgop pơjing rơvơn sơng bơngai Việt Nam đơ̆ng tĕh đak đe vĭh tơ̆ tĕh đak, lơ̆m au tơlĕch athei pơjing trong jang tingring găh tơdrong ƀet vaccine Covid-19 kơ kon pơlei hăm tơdrong chih răk hơnăn kon pơlei lơ̆m tĕh đak. Hăm kon pơlei lơ̆m tĕh đak, Dơnŏ anih tơm jang pơgang tơbăt, gô ƀơk ăn  mã QR code ăn rim bơngai hlôi đei ƀet pơgang vaccine Covid-19 păng tơmơ̆t lơ̆m hla bơar vei lăng jơhngơ̆m jăn vă đei tôm tong mư̆h ‘mĕh vă băt hơdăh hlôi ƀet pơgang mư̆h vă năm tơ̆ tĕh đak đe. Găh tơdrong au, Kơ iĕng Thủ tướng Vũ Đức Đam pơma hơdăh: Trong jang kơ Việt Nam ‘nŏh vei lăng ‘moi kiơ̆ kmăi kmŏk vei lăng hla bơar chih tơbăt jơhngơ̆m jăn kon pơlei, chih tơmơ̆t dôm tơdrong găh ƀet bơ̆ng păng gô đei mơ̆t lĕch lơ̆m hla bơar chih hơnăn kon pơlei, pơjing rơvơn mưh đei pơrang jĭ đơ̆ng rŏng au kơnh iung jang tang găn ‘lơ̆ng hơ iă hlŏh.

Tơblơ̆ nơ̆r: Amazưt