VOV4.Bahnar  – 'Năr apŭng plenh teh pơm jang năr 1/5 pơtơm đei đơ̆ng plei tơm jang pran găh kŏng ngĭp noh Chicago, teh đak Mih. Noh jing ăh xơnăm 1886, tơ̆ plei tơm kŏng ngĭp tih Chicago, Hop akŏm Anih Pơm jang kơ teh đak Mih hơlen tơchơ̆t ră hơdăh: "Đơ̆ng năr 1/5/1886, 'năr pơm jang kơ tôm bơngai noh 8 jơ". Kơlih kiơ năr 1/5 đei rơih kơlih lơ̆m 'năr âu, tơdrong pơkăp jang 'nao đơ̆ng bơngai jang păng tơm iŏk bơngai jang gô đei kĭ pơkăp. Khul pơdrŏng băt adrol tơchơ̆t đơ̆ng bơngai jang mă ưh đei trong vă hơ 'ngăh. Mă lei, năr 1/5/1886, yuơ pơkăp đơ̆ng bơngai ưh đei axong trŏ ƀlep tôm tong, khul bơngai lơ̆m jâ̆p teh đak Mih hlôi akŏm pơm greo vă pơđep hăm khul tơm iŏk jang athei pơm kiơ̆ tơdrong pơkăl đơ̆ng po. Mă blŭng noh tơdrong pơm greo tơ̆ plei tơm Chicago. Pơhlom 40 rơbâu 'nu bơngai ưh đei năm jang tơ̆ hnam kơmăi. Đe xư pơgơ̆r akŏm mit-tinh, pơm greo lơ̆m plei tơm hăm chư chih "Đơ̆ng 'năr âu rim bơngai jang ưh gơh jang hloh 8 jơ minh năr! Athei pơm kiơ̆ 8 jơ bơ̆ jang, 8 jơ pơdơh pơdei, 8 jơ pơchơt xô̆!"  Tơdrong iung tơjră hlôi roi năr roi đei kơdrâ̆m bơngai vang akŏm.

- Năr 1/5 đei lăng jing năr chơt hơ iă jơnei tĭh tên, tơbăt hơdăh jơhngơưm đon hơdrin jang keh đang tơdrong jang ‘nao păng toiwbăt hơdăh jơhngơm đon tơgoăt tơgoăl hăm dôm bơngai jang rim tĕ đak anai. Năr 1/5 jei jing năr pôk pơ ư ăn khŭl kang, iung tơ jră pơjing đei rơngeoi hiôk hian, hơtŏ hơnơ̆ng, pơm tơm kơ dĭh, gơ̆h hơgei tơpôl. Năr au, Năr Apŭng plĕnh tĕh Jang 1/5 jing năr lê̆h kơ khŭl kong nhân păng kon pơlei jang tĕh đak bơ̆n, năr tơgoăt tơgoăl khŭl kŏng nhân păng rim hơdrung lơ̆m apŭng plĕnh tĕh răm kơ đe pơgŏ pơđep lơ̆m iung tơ jră kơ yuơ tơdrong rơngei hiôk hian, pơm tơm kơdĭh hơdrĕch hơdrung păng gơ̆h hơgei tơpôl.

Lan – Zưt chih păng pơre nơ̆r