VOV4.Bahnar  – Lơ̆m 4 khei blŭng xơnăm, tơmam mă dêh char Gia Lai tĕch ăn teh đak đe hơmet hơtŏk pran hăm vă jê̆ 48% pơtêng hăm khei năr âu xơnăm 2020. Yuơ noh, hơbŏ keh đang tơchơ̆t 610 trĭu đôlar lơ̆m xơnăm 2021 noh đei jơnei keh kong. Dang ei, tơmam tĕch ăn teh đak đe kơ dêh char mă tơm noh ka phê, kơsu, tiu, 'nhot, plei 'long xa... Dôm tơmam âu hlôi đei tĕch ăn 40 teh đak. Mă kăl, minh ƀar anih jang hlôi pơm trŏ tơdrong pơkăl 'lơ̆ng xơđơ̆ng hăm dôm teh đak tơnap nhen Mih, EU, Nhâ̆t. Hơdăh nhen ka phê tĕch ăn teh đak đe hloh 300 trĭu đôlar minh xơnăm. Jâ̆p dêh char đei pơhlom 30 anih jang mŭk drăm tĕch tơmam ăn teh đak đe, lơ̆m noh đei 11 anih jang mŭk drăm tĕch tơmam choh pơtăm. Dang ei kơjă tơmam tĕch ăn teh đak đe kơ khul tơmam choh pơtăm đei pơhlom 80%. Khul kơpal kơ Anih jang Kŏng thương Gia Lai 'nao pơm jang hăm dôm anih jang mŭk drăm vă hơlen lăng tơdrong tĕch răt tơmam hăm teh đak đe vă dăh tom băt dôm tơdrong tơnap tap, tơdrong đei ƀôh lơ̆m tơdrong tơlĕch jang kiơ̆ pơkăp đơ̆ng Khul kơpal teh đak hăm tơdrong jang tĕch răt tơmam drăm hăm teh đak đe.

Lan chih păng pơre nơ̆r