VOV4.Bahnar - Lơ̆m jơ năr năm tơ mang tơ̆ Việt Nam, pơ gê ‘năr 29/6, Tổng Bí thư, Kơ dră teh đak Cộng hòa Dân chủ Nhân dân Lào Thongloun Sisoulith hlôi sơng Bí thư Trung ương Đảng, Kơ dră Anih jang Trung ương Mặt trận Tổ quốc Việt Nam Đỗ Văn Chiến păng kơ dră chĕp kơ̆l Jơ nŭm jang tơ bôl Việt Nam – Lào, Khŭl pơ ma dơ nuh Jơ nŭm vei lăng bơ ngai joăt jang, linh năm jang tơ gŭm sơ̆ kơ Việt Nam tơ̆ Lào. Hmach chơt hơ iă jơ nei Hop akŏm ‘măng mă 11 kơ Đảng kon pơ lei Kach mang Lào, Kơ dră anih jang Trung ương Mặt trận Tổ quốc Việt Nam pơ ma hơ dăh ‘măng năm tơ mang đơ̆ng Tổng Bí thư, Kơ dră teh đak Lào gô pơ trŭt tơ drong pơ vei Việt Nam- Lào hơ tŏk tơ iung ‘lơ̆ng nao. Tổng Bí thư, Kơ dră teh đak Thongloun Sisoulith hơ mĕng đơ̆ng rŏng kơ vei lăng kĕ jĭ Covid-19, Mặt trận Tổ quốc Việt Nam păng Mặt trận Lào pơ jing teh đak hơ nơ̆ng pơ ma dơ nuh, vei lăng, hơ tŏk tơ drong pơ vei gĭt kăl, tơ găl hăm dôm pham lĕch sĕch huŏng đơ̆ng rim jơ hnơr năm hơ drol.

Thuem: Tơ blơ̆