VOV4.Bahnar - Pơ gê brei (18/3), tơ̆ Hà Nội, Khŭl chĕp kơ̆l Anih pơ gơ̆r jang  kơ Trung ương găh tang găn sa pơ jĭp hlôi pơ gơ̆r ‘măng hop akŏm hăm tơ drong pơ gơ̆r đơ̆ng Tổng Bí thư, Kơ dră teh đak Nguyên Phú Trọng, Kơ dră Anih pơ gơ̆r jang vă pơ ma dơ nŭh, ăn tơ gop nơ̆r athei hơ met ‘lơ̆ng hăm 1,2 tơ drong glăi găh Anih pơ gơ̆r jang răp hơ len lăng, pơ gơ̆r đơ̆ng rŏng ‘măng hop akŏm mă 19 truh dang ei. Găh tơ drong jang tơ̆ hơ năp kơnh, Tổng Bí thư, Kơ dră teh đak drơ̆ng 1 nơ̆r hăm dôm nơ̆r tơ gop đơ̆ng bơ ngai jang lơ̆m khŭl chĕp kơ̆l Anih pơ gơ̆r jang, athei rim kơ dră đảng, khŭl jang đảng hơ nơ̆ng tŭn pran tơ drong jang iung tang găn sa pơ jĭp hăm jơ hngơ̆m đon hơ drin chinh trĭ kơ tang hloh, bơ̆ jang pran kơ tang, đei yua hloh; athei pơ gơ̆r mă brĕ, hơ nơ̆ng. Tổng Bí thư, Kơ dră teh đak athei khŭl jang chih iŏk dôm nơ̆r tơ gop đơ̆ng bơ ngai jang lơ̆m Khŭl chĕp kơ̆l Anih pơ gơ̆r jang chih tơ mơ̆t dơ̆ng, chih pơ keh hla ar tơ roi tơ băt; lui ngeh hăm dôm jơ nei iŏk đei gô pơm tơ drong pran ‘nao, đon lui ‘nao păng hơ drin hloh dơ̆ng lơ̆m đĭ đăng đảng, đĭ đăng kon pơ lei hơ nơ̆ng jang ‘lơ̆ng hloh dơ̆ng tơ drong jang tang găn sa pơ jĭp tơ̆ hơ năp kơnh.

Thuem: Tơ blơ̆