VOV4.Bahnar - Hop ako\m bơ ngai tang măt lơ\m te\h đak ‘măng mă XI kơ Đảng Kon pơ lei Kăch mang Lào đei pơ gơ\r đang ‘lơ\ng, Tổng Bí thư, Kơ dră te\h đak Nguyễn Phú Trọng đei jơ pơ ma điên thoăi hăm Tổng Bí thư Khul kơ dră che\p kơ\l Trung ương Đảng Kon pơ lei kăch mang Lào jăl XI Thongloun Sisoulith.

Tổng Bí thư, Kơ dră te\h đak Nguyễn Phú Trọng pơ ma điên thoăi hăm Tổng Bí thư Lào

Lơ\m jơ pơ ma nuh, Tổng Bí thư, Kơ dră te\h đak Nguyễn Phú Trọng păng Tổng Bí thư Thongloun Sisoulith pơ ma hơ dăh, tơ drong hơ nơ\ng hơ met kơ jăp păng tưk tơ iung tơ drong pơ vei ‘lơ\ng hơ iă, kăp g^t păng jang hơ doi tôm tơ drong Việt Nam - Lào ‘no\h j^ tơ drong jang đunh đai tôch g^t kăl, jing hơ năp jang tih hăm tơ drong vei lăng rơ ngei kơ hơ dre\ch hơ drung;

Tơ drong pơm tơm, kơ jăp ‘lơ\ng kơ te\h đak, pơ jing chủ nghĩa xã hội tơ\ rim te\h đak, tơ gop ‘lơ\ng ăn tơ drong rơ ngei, sơ đơ\ng, jang hơ doi păng jang to\k lơ\m tơ ring păng apu\ng plenh te\h; pơ ma hơ dăh mă đei tơ drong kiơ, 2 păh oei hơ nơ\ng adrin đ^ jơ hngâm vang vei lăng, tưk tơ iung tơ drong pơ vei g^t kăl Việt Nam - Lào roi đunh roi to\k pran, roi ‘lơ\ng hơ iă, rim jơ hnơr kơ jăp ‘lơ\ng păng che\p vei kơ jăp kle\p truh ning mônh.

Dơ\ng: Tơ blơ\