VOV4.Bahnar - Pơgê brei, năr 17/3, tơ̆ Hơnĭh bơ̆ jang Kơdră chĕp pơgơ̆r Tĕh đak, Kơdră tang măt Panama Eligio Alberto Salas De Leon, Kơdră tang măt Singapore Jaya Ratnam, Kơdră tang măt Indonesia Denny Abdi hlôi pơtrŭh kơthơ Tĕh đak ăn kơ Tổng Bí thư, Kơdră chĕp pơgơ̆r Tĕh đak Nguyễn Phú Trọng. Lăp đơ̆ng rŏng pơm lê̆h pơtrŭh ăn kơthơ Tĕh đak, Tổng Bí thư, Kơdră chĕp pơgơ̆r Tĕh đak Nguyễn Phú Trọng hlôi sơng pơma dơnuh hăm rim Kơdră tang măt.

Tơ̆ jơ sơng pơma dơnŭh, Tổng Bí thư, Kơdră chĕp pơgơ̆r tĕh đak lui kiơ̆ hăm tơdrong joăt jang păng hlô̆h vao găh Việt Nam, rim Kơdră tang măt tĕh đak đe gô jang keh đang ‘lơ̆ng hơnăp jang đơ̆ng kơ dih, pơtrŭt kơtang tơgoăt tơgoăl jang hơdoi ƀar păh Việt Nam hăm rim tĕh đak mă rim Kơdră tang măt iŏk jang. Tổng Bí thư, Kơdră chĕp pơgơ̆r tĕh đak tơbăt, Việt Nam ‘nao pơgơ̆r jơnei keh kong Pơm lê̆h Hop akŏm Đảng lơ̆m tĕh đak ‘măng mă 13. Mă kăl găh jang tơbôl, Pơm lê̆h hop akŏm 13 sơkŏt hơdăh Việt Nam gô hơnơ̆ng jang kiơ̆ trong jang tơbôl kơdih, rơngei hiôk hian, tơgoăt tơgoăl, jang hơdoi păng atŏk tơ iung, lơ tơdrong, lơ pang tơgoăt tơgoăl tơbôl; iung jang hơdoi kơtang lơ̆m apŭng plĕnh tĕh; atŏk kơtang păng iung jang kơtang hlŏh dơ̆ng tơgoăt tơgoăl jang hơdoi ƀar păh hăm rim tĕh đak jang hơdoi, lơ̆m au đei rim tĕh đak mă rim Kơdră tang măt ‘nŏh bơ̆ng pang tang măt ăn.

Tơblơ̆ nơ̆r: Amazưt