VOV4.Bahnar - Pơgê năr 5/1, tơ̆ Hơnih bơ̆ jang Khŭl kơdră tĕh đak kơ yuơ Thủ tướng Phạm Minh Chính chĕp pơgơ̆r, Khŭl kơdră tĕh đak pơgơ̆r hop akŏm trư̆k tuyên lơ̆m tĕh đak tơlĕch jang kiơ̆ Nơ̆r pơma pơtôch đơ̆ng Trung ương păng Tơdrong tơchơ̆t đơ̆ng Kuô̆k hô̆i jăl XV găh trong pơ prŏ atŏk tơ iung mŭk drăm tơpôl sơnăm 2022.

Vang năm păng iung pơma pơrô̆ tơ̆ hop akŏm, Tổng Bí thư Nguyễn Phú Trọng pơma hơdăh, khei năr kơnh Khŭl kơdră tĕh đak kăl akŏm jang keh đang Tơdrong jang hơmet pơ ‘lơ̆ng păng atŏk tơ iung mŭk drăm, tơklep hăm jang kiơ̆ trong tơlĕch jang vei lăng kơ jăp tŏk jur kơ jă, pơm sơđơ̆ng jang mŭk drăm păng hơmet pơ ‘lơ̆ng tơdrong jang mŭk drăm. Hơnơ̆ng pơjing ‘lơ̆ng hơ iă ăn tơdrong tơmơ̆t jên jang mơdro sa, pơtrut kơtang tŏk kơtang păng kơ jăp, ‘lơ̆ng hơ iă hlŏh dơ̆ng. Thủ tướng Tĕh đak Phạm Minh Chính pơma hơdăh, hop akŏm au gô akŏm hơlen hơdăh pơtôch jang kiơ̆ tơdrong jang chĭnh trĭ sơnăm 2021, sơkơ̆t hơdăh dôm tơdrong jang kăl iung jang hơdrol păng tơ ƀôh hơdăh dôm tơdrong jang tim mă ‘lơ̆ng hơ iă păng tơdrong tơm pơm ăn, mă kăl kơ yuơ đơ̆ng ư̆h kơ chăng. Adoi jei tơlĕch rim trong jang hơmet pơ ‘lơ̆ng, pơma dơnŭh tôch hơlen păng drơ̆ng mĭnh nơ̆r găh trong tơlĕch jang, tơdrong jang vă jang kiơ̆ tơdrong jang chĭnh trĭ gĭt kăl đei Đảng, Tĕh đak păng kon pơlei pơjao ăn.

Tơblơ̆ nơ̆r: Amazưt