VOV4.Bahnar -  Jang kiơ̆ ‘Măng năm tơ ƀơ̆p pơms dơnŭh hăm bơngai tăh hla lăp đơ̆ng rŏng hop akŏm mă 2, Kuô̆k hô̆i jăl XV, pơgê năr 26/11, Tổng Bí thư Nguyễn Phú Trọng atŭm hăm rim kơdră tang măt Kuô̆k hô̆i găh Hơnĭh pôk rơ̆ih kơsô̆ 1, Khul kơdră tang măt Kuô̆k hô̆i pơlei tơm Hà Nội tơ ƀơ̆p pơma dơnŭh hăm bơngai tăh hla rim kuân Ba Đình, Đống Đa păng Hai Bà Trưng ‘moi kiơ̆ pơgơ̆r kơtă păng trư̆k tuyên trŭh hăm 56 phương hăm 1.225 ‘nu bơngai tăh hla, vă tơroi tơbăt pơtôch hop akŏm mă 2 păng tơl nơ̆r tơgop đơ̆ng bơngai tăh hla. Găh lơ bơngai tăh hla hơlen ‘măng hop akŏm mă 2 Kuô̆k hô̆i jăl XV đei pơgơ̆r lơ̆m khei ‘năr tôch mơmat tat, rim kơdră tang măt Kuô̆k hô̆i bơ̆ jang tơnăp păng iŏk đei drơ̆ng mĭnh nơ̆r kơtang. Mă kăl găh dôm tơdrong tơplĭh ‘nao, hơmet ming hơ̆m bơ̆ jang kơ Kuô̆k hô̆i. Găh tơdrong tang găn jĭ hơbŭh Covid-19, bơngai tăh hla athei Kuô̆k hô̆i, Khŭl kơdră Tĕh đak, rim hơnĭh bơ̆ jang atŏk kơtang tơmơ̆t jên jang găh tơdrong jang pơgang tơ̆ tơring, bơ̆ jang tang găn jĭ jăn; pơjing păng iŏk yua lei lăi dĭh băl kmăi kmŏk lơ̆m tĕh đak găh tơdrong jang tang găn jĭ Covid-19. Kiơ̆ đơ̆ng, Tổng Bí thư Nguyễn Phú Trọng, vă rim Tơdrong tơchơ̆t kơ Kuô̆k hô̆i đei tơlĕch jang kiơ̆ lơ̆m tơdrong erĭh sa, rim hơnĭh bơ̆ jang Tĕh đak kăl tĕnh koăng pơgơ̆r jang kiơ̆ rim khôi luơ̆t, tơdrong tơchơ̆t ‘nao đei pơdrơ̆ng kiơ̆; hơnơ̆ng tơplĭh ‘nao, atŏk kơtang jang ‘lơ̆ng, jơnei, lăng kơ jăp trŭh dăr lăng, lăng hơlen vă jang kiơ̆ dôm trong jang ‘lơ̆ng păng hơmet pơ ‘lơ̆ng dôm tơdrong jang tim mă lăp.

Tơblơ̆ nơ̆r: Amazưt