VOV4.Bahnar - Đei kơ tơ̆ng ang tơ drong jĭ hơ buh Covid-19 tơ̆ Campuchia đei ƀôh, Tổng Bí thư Anih chĕp kơ̆l pơ gơ̆r Trung ương Đảng bơ̆n Nguyễn Phú Trọng hlôi đei chih kơ thơ apĭnh jet gia gơ̆ih kơ Xăm-đéc Tê-chô Hun Xen, Kơ dră Đảng kon pơ lei Campuchia, Thủ tướng teh đak Campuchia. Tang măt Đảng, teh đak, kon pơ lei Việt Nam, Tổng Bí thư Nguyễn Phú Trọng gơ̆ih truh Xăm-đéc Tê-chô păng rim kơ dră chĕp kơ̆l Đảng kon pơ lei Campuchia, teh đak păng kon pơ lei Campuchia dôm tơ drong ‘mêm buăl joăt, ‘nhŏng oh păng nơ̆r apĭnh jet gia tơ păt hloh găh dôm tơ drong hiong răm yua đơ̆ng  jĭ Covid-19 pơm ăn tơ̆ Campuchia. Hăm tơ drong joăt joe tơ goăt tơ goăl, tơ klep hơ dai, ‘mêm băl, tơ gŭm băl đơ̆ng 2 Đảng, 2 teh đak păng kon pơ lei 2 teh đak, Việt Nam ling lang khŏm jang hơ dai, tơ gŭm, vang tơ roi băl tơ drong hlôh vao lơ̆m tơ drong kĕ jang păng tơ drong ‘lơ̆ng ăn phep vă hơ dai hăm Campuchia lơ̆m tơ drong jang tang găn jĭ Covid-19, vă 2 teh đak bơ̆n vang jăh sơ đơ̆ng tơ drong.

Thuem: Tơ blơ̆