VOV4.Bahnar - Pơgê năr 17/6, tơ̆ Hơnĭh bơ̆ jang Dơnŏ anĭh tơm Ƀô̆ đô̆i vei lăng sơlam tĕh đak, Khŭl Đảng Ƀô̆ đô̆i Trung ương jăl 2020-2025 pơgơ̆r hop akŏm ‘măng mă blŭng kơ yuơ Tổng Bí thư Nguyễn Phú Trọng, Bí thư Khŭl Đảng Ƀô̆ đô̆i Trung ương pơm tơm tơbăt hơdăh Tơdrong tơchơ̆t đơ̆ng Dơnŏ anĭh tơm Chĭnh trĭ pôk tơmơ̆t rim kơdră vang jang lơ̆m Khŭl Đảng Ƀô̆i đô̆i Trung ương, Kơdră chĕp pơgơ̆r Khŭl Đảng Ƀô̆ đô̆i Trung ương jăl jang 2020-2025, pơdrơ̆ng kiơ̆ hla bơar chĭh tơbăt pơtôch chĕp pơgơ̆r, pơrô̆ jang kiơ̆ tơdrong jang khŭl ƀô̆ đô̆i vei lăng tĕh đak 6 khei au ki, sơkơ̆t hơdăh trong bơ̆ jang lơ̆m khei năr kơnh. Vang năm hop akŏm đei Kơdră chĕp pơgơ̆r Tĕh đak Nguyễn Xuân Phúc, Thủ tướng Tĕh đak Phạm Minh Chính, Kơdră chĕp pơgơ̆r Hơnĭh bơ̆ jang Ban Bí thư Võ Văn Thưởng, Thượng tướng Phan Văn Giang, Yŏng ƀô̆ đô̆i vei lăng sơlam tĕh đak, atŭm hăm rim kơdră bơ̆ jang lơ̆m Dơnŏ anĭh tơm Chĭnh trĭ, Bí thư Trung ương Đảng, kơdră chĕp pơgơ̆r mĭnh ƀar hơnĭh tơm, hơnĭh bơ̆ jang Trung ương. Iung pơma tơ̆ hop akŏm, Tổng Bí thư Nguyễn Phú Trọng athei, Khŭl Đảng Đô̆ đô̆i Trung ương jăl jang ‘nao kăl lăng kơ jăp găh hơnăp jang bơ̆n, hơnơ̆ng krơ̆ng kơ jăp jơhngơ̆m đon, tơgoăt pôm nơ̆r, drơ̆ng mĭnh nơ̆r, vei kơ jăp trong bơ̆ jang, chĕp pơgơ̆r hơgei, hơtŏ hơnơ̆ng, tơpăt, tơ iung pơjing Khŭl ƀô̆ đô̆i mĭnh nơ̆r ƀơ̆r đon hăm Tĕh đak, hăm Đảng păng kon pơlei, mă kăl tơ iung pơjing Khŭl Đảng Ƀô̆ đô̆i rơgŏh ‘lơ̆ng pran kơtang, pơm jŭk yuk trong hơlau păng chĕp pơgơ̆r khŭl ƀô̆ đô̆i iung jang kiơ̆ keh kong rim tơdrong đei pơjao vă hơnơ̆ng pơm ‘lơ̆ng dơ̆ng um rup ƀô̆i đô̆i Ƀok Hô.

Tơblơ̆ nơ̆r: Amazưt