VOV4.Bahnar - Pơ gê 9/12, tơ̆ Hà Nội, Tổng Bí thư Nguyễn Phú Trọng pơ gơ̆r Hop akŏm kăn ƀô̆ lơ̆m tĕh đak hŏk pơ hrăm, hlôh vao kơ jăp, tơ lĕch jang kiơ̆ Nơ̆r pơ kăp păng tơ drong Hơ găt đơ̆ng Khul kơ dră chĕp kơ̆l Trung ương găh tơ drong tơ iung pơ jing păng hơ met ming Đảng. Hop akŏm yoa Anih tơm Chinh trĭ, Ban Bí thư pơ gơ̆r kiơ̆ trong pơ gơ̆r kơ tă păng pơ gơ̆r trư̆k tuyê̆n. 

Jơ bơ̆ jang lơ̆m Hop akŏm

Pơ ma nơ̆r pơ tho lơ̆m hop akŏm, Tổng Bí thư Nguyễn Phú Trọng roi tơ ƀôh đon tơ chĕng tôch rơ đăh ‘nŏh Pơ jing Đảng athei năm hơ doi hăm tơ drong hơ met pơ ‘lơ̆ng Đảng; Đảng athei hơ nơ̆ng rơ gŏh ‘lơ̆ng, pran kơ jăp găh chinh trĭ, đon tơ chĕng păng tơ drong pơ gơ̆r. Ƀok Hô ‘mêm kơ eng kơ đĭ đăng bơ̆n adrol kơ lôch hơ chăng, lơ̆m Nơ̆r tơ tă kăp gĭt, Ƀok akhan: Đơ̆ng rŏng kơ tơ blăh iŏk rơ ngei tơ ring Pơ băh, pơ jing đei 1 tĕh đak kơ jăp ‘lơ̆ng ‘nŏh tơ drong jang mă blŭng jĭ athei hơ met pơ ‘lơ̆ng Đảng. Đảng pran ‘mơ̆i mă kăch mang gơ̆h iŏk đei jơ nei, kŭm nhen bơ ngai chĕp ‘long huơ̆r kơ jăp ‘lơ̆ng ‘mơ̆i kơ na thŏng nan gơ̆h kơ dâu.

Dơ̆ng: Tơ blơ̆