VOV4.Bahnar - ‘Năr 24/8, tơ̆ Anih jang kơ Trung ương Đảng, Tổng Bí thư Nguyễn Phú Trọng pơ gơ̆r jang bơ̆ jang hăm khul kơ dră chĕp kơ̆l găh tơ drong tang găn jĭ Covid 19. Vang truh akŏm lơ̆m jơ bơ̆ jang đei Kơ dră tĕh đak Nguyễn Xuân Phúc, Thủ tướng Phạm Minh Chính, Kơ dră Kuô̆k hô̆i Vương Đình Huệ, Kơ dră chĕp kơ̆l Ƀan Bí thư Võ Văn Thưởng, Đại tướng Tô Lâm, Kơ dră tơm vei lăng Công an.

Lơ̆m jơ bơ̆ jang, Tổng Bí thư Nguyễn Phú Trọng pơ ma hơ dăh ‘nâu jĭ hop akŏm gĭt kăl ƀât mă tơ drong jĭ oei tơ pŏh tôch hơ mơt hrei ‘nâu. Tổng bí thư pôk pơ ư khul jang pơ gang blŭng a, khul linh tĕh đak, công an, dôm anih jang kơ pal, tơ ring tơ rang pơ ma pha ‘nŏh jĭ đĭ đăng anih jang chinh trĭ vang jang tôch hrĕnh, hăm đon pơ hnŏng khŏm tang găn ‘lơ̆ng tơ drong jĭ, đei lơ kon pơ lei lăp đon tơ gŭm.

Mă đơ̆ng thoi nŏh ră, Tổng Bí thư oei pơ ma tơ ƀôh dôm tơ drong ưh kơ lăp, oei tơ hlăk tăk, ƀât lăp 1,2 tơ ring oei đei đon lăng pơ hơi tơ drong tang găn jĭ; kiơ̆ jơ hngâm đon sơ đơ̆ng, lê̆ kơ hli dăh mă hăt hot, Tổng Bí thư Nguyễn Phú Trọng athei, Khul kơ dră tĕh đak, dôm anih jang kơ pal, tơ ring tơ rang hơ nơ̆ng kơ chăng tơ dra hơ drol, tơ lĕch jang hrơ̆ch ‘lơ̆ng, drơ̆ng 1 nơ̆r, pơ jao tơ drong jang mă rơ đăh, trŏ hơ năp jang vă gơ̆h tang găn ‘lơ̆ng tơ drong jĭ tơ̆ hơ năp kơnh.

Dơ̆ng: Tơ blơ̆