VOV4.Bahnar - Ƀlep ƀât hop akŏm lơ̆m tĕh đak ‘măng mă VIII kơ Đảng Cộng sản Cuba đei pơ gơ̆r đang ‘lơ̆ng hơ iă, Tổng Bí thư Nguyễn Phú Trọng hlôi pơ ma điên thoăi hăm ƀok Miguel Díaz-Canel Bermudez, Bí thư mă mônh kơ Khul kơ dră chĕp kơ̆l Trung ương Đảng Cộng sản Cuba, Kơ dră tĕh đak Cộng hòa Cuba. 

Tổng Bí thư Nguyễn Phú Trọng tôch hơ iă hăm Đảng Cộng sản Cuba hlôi pơ gơ̆r đang ‘lơ̆ng hop akŏm lơ̆m tĕh đak ‘măng mă VIII; hơ iă hăm ƀok Miguel Díaz-Canel Bermudez đei Trung ương Đảng Cộng sản Cuba lui pôk pơm Bí thư mă mônh; tơ ƀôh đon lui Đảng Cộng sản Cuba hơ nơ̆ng chĕp kơ̆l pơ gơ̆r kon pơ lei Cuba yak hlŏh rim tơ drong mơ mat tat, pơ long nol, bơ̆ jang ‘lơ̆ng dôm tơ drong ‘mĕh vă, trong jang đơ̆ng Hop akŏm mă VIII tơ lĕch, pơ jing tĕh đak Cuba xã hội chủ nghĩa pơ drŏng, hơ nŭk hơ noa păng pran kơ jăp.

Tổng Bí thư Nguyễn Phú Trọng pơ ma hơ dăh, Việt nam ling lang năng kăl păng hơ pơi ‘mĕh pơm pơ ‘lơ̆ng hlŏh dơ̆ng tơ drong pơ vei kăp gĭt đơ̆ng 2 Đảng, 2 tĕh đak Việt Nam - Cuba; athei tơ̆ hơ năp kơnh, 2 păh hơ nơ̆ng jang hơ doi, tơ lĕch jang đei yoa ‘lơ̆ng dôm tơ drong drơ̆ng nơ̆r 2 pang, hơ nhăk tơ drong pơ vei Việt Nam – Cuba tŏk ‘lơ̆ng hơ iă, đei yoa păng pran kơ jăp.

Dơ̆ng: Tơ blơ̆