VOV4.Bahnar - Pơgê năr 28/6, lăp đơ̆ng rŏng pơm lê̆h sơng, tơ̆ Hơnĭh bơ̆ jang Trung ương Đảng, Tổng Bí thư Nguyễn Phú Trọng pơma dơnŭh hăm Tổng Bí thư, Kơdră chĕp pơgơ̆r tĕh đak Lào Thongloun Sisoulith.

Tổng Bí thư Nguyễn Phú Trọng hăm Tổng Bí thư, Kơdră chĕp pơgơ̆r Tĕh đak Lào Thongloun Sisoulith yak mơ̆t tơ̆ hơnĭh pơma dơnŭh

Lơ̆m tơdrong lui kiơ̆ dĭh băl kơtang, tơgoăt tơgoăl gĭt kăl, ƀar păh hlôi tơroi tơbăt dĭh băl găh tơdrong bơ̆ jang kơ Đảng, Tĕh đak kơ dĭh; chă pơma dơnŭh găh trong vă iung jang, trong jang hơnơ̆ng atŏk tơ iung tơgoăt tơgoăl ƀar păh Đảng, ƀar tĕh đak adoi nhen dôm tơdrong lơ̆m apung plĕnh tĕh păng tơring mă ƀar păh vang lăng trŭh. ‘Măng iung năm tơmang đơ̆ng Kơdră chĕp pơgơ̆r Đảng, Tĕh đak Lào lăp hăm tơdrong ‘mĕh vă kơ ƀar păh vă hơnơ̆ng pơma dơnŭh dôm trong jang hơ iă lơ̆m atŏk tơ iung, rim trong pơtrŭt kơtang jang kiơ̆ keh kong rim tơdrong drơ̆ng mĭnh nơ̆r kơdră chĕp pơgơ̆r ƀar Đảng, Tĕh đak lơ̆m sơnăm au păng dôm sơnăm trŭh au kơnh. Hlŏh đơ̆ng nŏh sơkơ̆t hơdăh tơdrong tơgoăt tơgoăl, lui kiơ̆ dĭh băl kơ jăp, ‘lơ̆ng hơ iă hơdrol đơ̆ng rŏng nhen mĭnh kơ Đảng păng Tĕh đak, kon pơlei 2 tĕh đak vă atŭm dĭh băl tơbăt dĭl băl trong jang hơ iă lơ̆m atŏk tơ iung, rim trong pơtrŭt jang kiơ̆ jơnei rim tơdrong Drơ̆ng mĭnh nơ̆r khŭl kơdră 2 Đảng, ƀar tĕh đak.

Tơblơ̆ nơ̆r: Amazưt