VOV4.Bahnar - Pơgê năr 24/9, tơ̆ Hơnĭh bơ̆ jang Trung ương Đảng, Tổng Bí thư Nguyễn Phú Trọng pơma dơnŭh păng điên thoăi hăm Tổng Bí thư, Kơdră chĕp pơgơ̆r tĕh đak Trung Quốc Tập Cận Bình. Tổng Bí thư Nguyễn Phú Trọng hmach chơt hơ iă 72 sơnăm năr Kuô̆k khanh Trung Quốc, pơma hơdăh, mă đơ̆ng jĭ hơbŭh Covid-19 pơm kơnê̆ kơtang trŭh tơdrong erĭh sa lơ̆m kơpal tĕh păng tơ ƀơ̆p, jang hơdoi ƀar tĕh đak, ƀar păh ƀar Đảng, ƀar Tĕh đak Việt Nam-Trung Quốc hơnơ̆ng vei kơ jăp hơyak ‘lơ̆ng; pơma tơbăt jơhngơ̆m đon bơnê kơ Trung Quốc hlôi tơgŭm tơbăt trong jang hơ iă, tơgŭm djru vaccine ăn Việt Nam lơ̆m bơ̆ jang tang găn jĭ hơbŭh Covid-19 păng ‘mĕh vă ƀar păh hơnơ̆ng hơmet ăn ‘lơ̆ng hơ iă tơlĕch jang hơdoi lơ̆m tang găn jĭ hơbŭh Covid-19 păng hơmet pơ ‘lơ̆ng, atok tơ iung đơ̆ng rŏng jĭ hơbŭh Covid-19. Tổng Bí thư Nguyễn Phú Trọng jei athei, ƀar păh hơnơ̆ng jang hơdoi kơ jăp lơ̆m vei lăng năng tông tơring sơlam tĕh đak, tơ iung pơjing trong sơlam tĕh đak rơngei hiôk hian, sơđơ̆ng, jang hơdoi păng atŏk tơ iung.

Tơblơ̆ nơ̆r: Amazưt