VOV4.Bahnar - Kơsơ̆ năr 29/10, tơ̆ Hơnĭh bơ̆ jang Trung ương Đảng, Tổng Bí thư Nguyễn Phú Trọng sơng pơma dơnŭh hăm Kơdră tang măt Cộng hoà Cuba trŭh kŭh ka hla bat ƀlep lơ̆m năr tơbăt 55 sơnăm, ‘măng tơ ƀơ̆p gĭt kăl ƀar ‘nu Kơdră chĕp pơgơ̆r Tĕh đak Hồ Chí Minh hăm Kơdră chĕp pơgơ̆r Kĕch mang Cuba Ra-un Cát-xtơ-rô (29/10/1966-29/10/2021) păng Kơdră tang măt iŏk bơ̆ jang tơ̆ Việt Nam. Ƀlep lơ̆m jơ ‘năr au, Tổng Bí thư Nguyễn Phú Trọng sơkơ̆t hơdăh dơ̆ng tơdrong tơgoăt tơgoăl hơdrol đơ̆ng rŏng nhen mĭnh, tơgoăt tơgoăl ‘nhŏng ŏh dĭh băl kơ Đảng, Tĕh đak păng kon pơlei Việt Nam hăm Đảng, Tĕh đak păng kon pơlei Cuba; Việt Nam hơnơ̆ng yak hơdoi hăm Cuba lơ̆m trong iung jang hơmet pơ ‘lơ̆ng jang mŭk drăm-tơpôl xã hội chủ nghĩa. Tổng Bí thư Nguyễn Phú Trọng hôn bơnê kơ Đảng, Tĕh đak păng kon pơlei Cuba ‘nhŏng ŏh, jơhngơ̆m đon ‘lơ̆ng hơ iă đơ̆ng Kơdră chĕp pơgơ̆r Ra-un Cát-xtơ-rô hăm rim kơdră chĕp pơgơ̆r Cuba, mă đơ̆ng oei tơnap tap mă lei oei hơnơ̆ng tơgŭm djru Việt Nam, mă kăl ‘nŏh jang hơdoi găh vaccine Covid-19.

Tơblơ̆ nơ̆r: Amazưt